သၞာဲဒဴဴ UWSA ကြုက်ပ္တိတ်လဝ်ဝရာန်ရပ် ၜါတၠဂှ် ကံၚ်ဇြဳပၞာန် ထပ်ပ္တိတ်ဝရာန်ရပ်ပၠန်

​နေပျဳဒဝ် – အံက်တဝ်ဗာ (၂၀)

ဆက်စပ်ဒၟံၚ်ကဵုဂိုဏ်လီဠာန်သြန်အောန်လိုၚ်နွံဂးတုဲ သၞာဲဒဴဴ ဒပ်ပၞာန်ပရေၚ်ညဳသၟဟ်ဍုၚ် “ဝ” (UWSA) ကြုက်ပ္တိတ်လဝ်ဝရာန်ရပ်ၜါတၠဂှ် ကံၚ်ဇြဳပၞာန် ထပ်ပ္တိတ်လဝ်ဝရာန်ရပ် ပၠန်ရဂှ် ဓမံက်ထ္ၜးလဝ် ပ္ဍဲမဳဒဳယာတြးဝါဒတအ်ရ။

ပ္ဍဲတိဍာ် “ဝ” ဂွံအခေါၚ်အုပ်ဓုပ်ထိၚ်ဒဝ်ဇကုဇကုဂှ် ဟိုတ်နူပါလုပ်ဒၟံၚ် ပ္ဍဲပရေၚ်လီဠာန်သြန်အောန်လာၚ်ကီု၊ ပရေၚ်တံဓဇက်မၞိဟ်သ္ပဒၞန်ကေတ်သြန်ကီု၊ ကလိလောန်လဝ် ပရေၚ်ဘပဠအာတ်မိက် ကေုာံ ပ္တိတ်လဝ်ဇြဟတ် သွက်ဂွံက္လိလောန်ကီု၊ ဟိုတ်နူကဵုလဝ် ဇြဟတ်ညးကလိလောန်တအ်ကီုတုဲ သွက်ဂွံကေတ်အရေဝ် အတိုၚ်သၞောဝ်ဥပဒေဂှ် ရုၚ်သၞောဝ်ဓဝ် ခရိုၚ်ဟိုဝ်ပါန် ပ္တိတ်လဝ်ဝရာန်ရပ်ရဂှ် လ္ပာ်ကံၚ်ဇြဳပၞာန်ဟီုဂးလဝ်ရ။

ညးတအ်ညးၜါတၠဂှ် ဒပ်ပၞာန် UWSA လေဝ် နကဵုတၚ်စောတ်စောဲကၠောန်သ္ပလဝ် ညံၚ်ဂွံဇီုကပိုက်ဒး ပရေၚ်ဆက်ဆောံ ဒေသ “ဝ”ကဵု ကၟိန်ဍုၚ်ဇိုၚ်ဝုတ်ဒိုဟ် သီုကၟိန်ဍုၚ်နာနာတုဲ ပလှ်ဖျေံလဝ် နူကဆံၚ်ဌာနန္တရရ။

ဆက်စပ်ဒၟံၚ်ကဵုဂိုဏ်လီဠာန်သြန်အောန်လိုၚ်ဂးတုဲ ယဝ်ရပ်ဂွံ သ္ကိုပ်ဌာနဇၞော်ပရေၚ်သိုၚ်ခၞံတွဵုရး “ဝ” UWSA ပေါက်အိုက်ပါန် ကေုာံ သ္ကိုပ်ခရိုၚ်မိုၚ်လေန် အိုက်ဟအ်တအ်ညးၜါတၠဂှ်မ္ဂး ဖျေံကဵုလာဘ်သြန်ယွောန်ကြုက် နူမွဲကိုတ် စဵုကဵုမသုန်ကိုတ်ရောၚ်ဂှ် ကၟိန်ဍုၚ်ကြုက် ကဵုလဝ်သမ္တီရ။

နူကဵုဂိတုသေပ်တေမ်ဗာတေံ UWSA ဂှ် ညးမၞုံသံသယ ပါလုပ်ဒၟံၚ် ပ္ဍဲဂိုဏ်လီဠာန်သြန်အောန်လာၚ်တအ်ဂှ် ပြံၚ်စၠောံကဵုလဝ် လ္ပာ်ကၟိန်ဍုၚ်ကြုက် နွံရဂှ် ဂွံတီကေတ်ရ။

စပ်ကဵုကိစ္စ ပ္တိတ်လဝ်ဝရာန်ရပ် သၞာဲဒဴဴ UWSA ၜါတၠတုဲ နကဵုသြၚ်လောန်တိုၚ်မ် ၜိုန်ရဆက်စၠောံသၟာန်လဝ်ကဵု ညးမၞုံအခေါၚ်ဟီုဂးကံၚ်ဇြဳပၞာန် ဂအုပ်ဗိုလ်ဇၞော်ဇြဝ်မေန်ထောန်ကီုလေဝ် ဆက်စၠောံဟွံဂွံလဝ်ရ။

ပရိုၚ် – သြၚ်လောန်တိုၚ်မ်

ဗီု – Social Media