ဘာပန်၊ အံက်တဝ်ဗာ(၂၀)
ပ္ဍဲတိဍာ်ဒပ်မဟာ (၅) ခရိုၚ်ဘာပန် ဗော်သွးကောန်ဂကူကရေၚ် KNU ဂှ် ပ္ဍဲကဵုပေါဲဗတိုက်ၜါလ္ပာ်ဒှ်လဝ် ပွိုၚ်လ္ပာ်ဂိတုဏံ ကောန်ဒပ်ကံၚ်ဇြဳပၞာန် ဒးချိုတ်လဝ် ဂၠိုၚ်ကဵုဒါန်ဇြေန်ရဂှ် KNU ဒပ်မဟာ(၅) လလောၚ်တြးလဝ်ရ။
နူဂိတုအံက်တဝ်ဗာ စၟတ်တ္ၚဲ (၁) စဵုကဵုစၟတ်တ္ၚဲ (၁၅) ပ္ဍဲပွိုၚ်လ္ပာ်ဂိတုဏံ အကြာဒပ်ကံၚ်ဇြဳပၞာန်ကဵု ဒပ်မဟာ ၅ KNLA တအ်ဂှ် အပံၚ်လၟိဟ်ပေါဲဗတိုက် (၃၈) ဝါ ဒှ်လဝ်တုဲ လ္ပာ်ဒပ်ကံၚ်ဇြဳပၞာန် ဒးချိုတ်လဝ် (၁၃) တၠတုဲ ဇီုကပိုက်ဒလဝ်ဘဲဝပ် (၂၉) တၠရဂှ် ဓမံက်လဝ် ပ္ဍဲတၚ်လလောၚ်တြးရ။
ပ္ဍဲကဵုပေါဲဗတိုက်တအ်ဂှ် လ္ပာ်ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ (၅) ကောန်ဒပ်မွဲတၠ ဇီုကပိုက်ဒးလဝ်ဘဲဝပ်ရဂှ် ဓမံက်ထ္ၜးလဝ်ရ။
ပ္ဍဲကဵုဂိတုဏံ ဒပ်ကံၚ်ဇြဳပၞာန်ဂှ် ပ္ဍဲဍုၚ်ဘာပန် အရာပ်စၟတ် ၃ ၊ ပ္ဍဲကဵုဂကောံကွာန်ပါဟိုက်ကဵု ဂကောံကွာန်မေဝ်ခူ ခရိုၚ်ဘာပန်ဂှ် သီုရန်တၟံနွံနွံ ပ္တဝ်လဝ်တုဲ ပန်ပှော်ဖျေံလဝ်လွဟ်ဇၞော် အမၠံက်ပန်ခရာဇမ္ၚောဲ ၁၂၂ -မမ ကဵု၁၂၀မ -မမ ၁၀ မ ပေၚ်ၚ်ရဂှ် ဟီုလဝ်ရ။
သ္အာၚ်နူဂှ်ပၠန် ပ္ဍဲဂိတုအံက်တဝ်ဗာ စၟတ်တ္ၚဲ (၅) ဂှ်လေဝ် ပ္ဍဲကဵုကွာန်ဗဝ်လေဒေဝ် မၞုံပ္ဍဲပွိုၚ်ဍုၚ်လူတဝ်ဂှ် ၜိုန်ရဒပ်ကံၚ်ဇြဳပၞာန် ကၠုၚ်ဂြာတ်ထောံဖျေံဗုမ် နူကဵုက္ၜၚ်ကျာ ဗုမ်ကလေတ်သတာ (၂)မကီုလေဝ် ကောန်အရာပ်ညးဍုကွာန် နွံပ္ဍဲကွာန်တအ် ဇီုကပိုက်ဒးလဝ်ဟၟဲရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပရေၚ်ဒပ်ကံၚ်ဇြဳပၞာန် ဗတိုက်ဒၟံၚ်ကဵုက္ၜၚ်ကျာ ပ္ဍဲခရိုၚ်ဘာပန်တအ်ဂှ် ပ္တဝ်လဝ်ကဵုဌာန်ပ္တန်ပၞာန် ဗတိုက်ဒၟံၚ်ဟွံသေၚ်တုဲ ပ္ဍဲကဵုဒေသ ဒၞာဲဌာန်ကောန်အရာပ်တအ်မံၚ်ဒၟံၚ်ဂှ်ဟေၚ် ပ္တဝ်လဝ် ဗတိုက်ဒၟံၚ်ဒှ်တုဲ ဟိုတ်နူကောန်အရာပ်တအ် ပရဟ်ဒုၚ်ပလေဝ်ပလေတ် မံၚ်ဒၟံၚ်ကဵုသတိဂှ်ရ ပရေၚ်ဇီုကပိုက်ဒးသ္ကာတ်မြဟ် ကေုာံပရေၚ်ဒးလဝ်ဘဲဝပ် ဟၟဲရဂှ် ဂကောံအခေါၚ်အရာမၞိဟ်ကရေၚ် KHRG လလောၚ်တြးလဝ်ရ။
အတိုၚ်တၚ်လလောၚ်တြး ဗဟဵု ဗော်သွးကောန်ဂကူကရေၚ် KNU လလောၚ်တြးလဝ်မ္ဂး ပ္ဍဲမွဲကာလသီအဝဵုဏံ ပ္ဍဲကဵုခရိုၚ်ဘာပန် လၟိဟ်ညးပါဲဘဲပၞာန် စဵုကဵုဗ္ဒာဲမွဲကိုတ် နွံကၠုၚ်တုဲ ညးပါဲဘဲပၞာန်တအ်ဂှ် ဒးဆဵုဂဗဒၟံၚ်ကဵုအခက်ခုဲ ဒၞာဲမံၚ်စံၚ်၊ ဇွောံမစၞစ ကေုာံ ဂဥုဲဇဗဟွံရုံဂပ်တုဲ အရီုဗၚ်ဗ္စာရဏာပရေၚ်မၞိဟ်တအ်လေဝ် နွံဒၟံၚ်ပၟိက်ဗွဲမဂၠိုၚ်ရဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
ဗီု – CJ
sanlontai