လ္ဂုၚ်၊ သေပ်တေမ်ဗာ (၃)
ဗွဲကြဴကံၚ်ဇြဳပၞာန် စသွံတြးကၠုၚ် ထဝ်တၚ်္ကာလယိုၚ်မၞုံ မွဲဒ္ကေဝ်၊ ၜါမး၊ မွဲမး တံတုဲဂှ် ထဝ်မွဲဒ္ကေဝ် ၚုဟ်ကလေၚ်စိုပ်ကၠုၚ် သၟဝ် (၃၀) ကိုဋ်ဒ္ကေဝ်ပၠန်ဂှ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူဌာနဝန်ဇၞော် သယံဇာတ ကေုာံ ပရေၚ်ထိၚ်ဒဝ်ပွဳပွူသဘာဝ သွံတြးကဵုအာ ထဝ်တၚ်္ကာလယိုၚ်မၞုံ မွဲဒ္ကေဝ်၊ ၜါမး၊ မွဲမး တံရောၚ် လလောၚ်ပ္တိတ်လဝ်ပရိုၚ် ပ္ဍဲဂိတုသေပ်တေမ်ဗာ (၁) ဇိုၚ်သဝ်တ္ၚဲတေံတုဲ ပ္ဍဲဂိတုသေပ်တေမ်ဗာ (၂) ဏံ စသွံတြးဒၟံၚ် ပ္ဍဲရုၚ်မတ်ရတ် ကမ္ဗာဨ လ္ဂုၚ်ဂှ်ရ။
ကံၚ်ဇြဳပၞာန်ဝွံ ထဝ်မွဲဒ္ကေဝ်ဂှ် သွံကဵုဒၟံၚ် (၁,၉၉၈,၀၀၀) ဒ္ကေဝ်တုဲ လျိုၚ်တာန်ထဝ် ဒဵုမူစိ သွံကဵုမံၚ်ရောၚ်ဟီုဂှ် လလောၚ်တြးလဝ် ဗွဲမလုပ်သၞောဝ်ဟွံမွဲရ၊ စနူကံၚ်ဇြဳပၞာန် သွံတြးထဝ်တၚ်္ကာတုဲဂှ် ပ္ဍဲဗွဝ်ဖျာမ္ၚးဏံ ထဝ်မွဲဒ္ကေဝ် ၚုဟ်စှ်ေကၠုၚ် စဵုကဵု ပွဳပွူ (၂၈) ကိုဋ်ဒ္ကေဝ်ရ။
စပ်ကဵုအကာဲအရာ ၚုဟ်ထဝ်စှ်ေကၠုၚ်တုဲ တၠကမၠောန်ထဝ်ရးလ္ဂုၚ်မွဲတၠ ဟီုလဝ်ဗီုဏံရ။
“ၚုဟ်ထဝ်ဂှ် စှ်ေဒၟံၚ်ရ၊ အလဵုအသဳရကၠောန်ဒၟံၚ်တှ်ေ စှ်ေတွဵုရ၊ သွံကဵု ဒဝ်ဠာ၊ သွံကဵု ထဝ်ရောၚ်ဟီုမ္ဂး ဂတက်စှ်ေအာဟဂှ်ရ၊ ဣဏံ မူဂစိုတ်ဍေံ နွံဒၟံၚ်တုဲတုဲတံတုဲ ပ္တိတ်သွံကဵုထဝ်မ္ဂး စှ်ေအာဟဂှ်ရ၊ ဣဏံဂှ် ကၠောန်ဒၟံၚ် မူဂစိုတ်ညးကဵုညးဏောၚ်၊ အလဵုအသဳ ကၠောန်ကဵုတှ်ေ စှ်ေဟဂှ်ရ၊ ပ္ဍဲဍေံဂှ် ထဝ်လေဝ် နွံဒၟံၚ်ရ၊ ထဝ်မကဵုလဝ် အခေါန် နူကဵုက္တိုၚ်တံဂှ် နွံဒၟံၚ်တၟာဂလိုၚ်ရ၊ ဍေံလေဝ် မုပသွံရော တီဟာ ရုယှာဖျေံသွံဒၟံၚ် (၃၀) တၟံကၠံတုဲ ကဵုသြန်သွံဂွံထဝ်ဏံဂှ် ကလေၚ်ရာန်နူရုယှာ (၃၀) တၟံကၠံပၠန်မ္ဂး ပရဲဒၟံၚ် တၟာဂလိုၚ်ဏီရောၚ်၊ စိုပ်တရဴဍာံဍာံရ” သာ်ဝွံ သ္ဂးရ။
ကံၚ်ဇြဳပၞာန်ဂှ် ထဝ်တၚ်္ကာဏံဝွံ သွံတြးကဵုဒၟံၚ် နူကဵုအခေါန် မဂွံနၚ် နူဒၞါဲကၠောန်ထဝ် ဌာနဝန်ဇၞော် သယံဇာတ ကေုာံ ပရေၚ်ထိၚ်ဒဝ် ပွဳပွူသဘာဝတံတုဲ သြန်အရန် ကၟိန်ဍုၚ်ပါလုပ် သီုကဵုထဝ်တံလေဝ် ဟွံဆေၚ်စပ်ပုဟ်ဂှ် သ္ဂးရ။
ထဝ်တၚ်္ကာဏံဂှ် ဒးပံက်ဒၞါဲသွံ (ကောၚ်တာ) ပ္ဍဲဍုၚ်ဇၞော် သွံတြးကဵုဂှ်ကီု၊ သွံကဵုအာ ညးဍုၚ်ကွာန်တံ နကဵုတၞးကာဒ်ကောန်ဍုၚ်တံရောၚ်ဂှ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန် ဟီုဂးလဝ်ရ။
ကံၚ်ဇြဳပၞာန် ကၠာဂွိုအ်သွံ ထဝ်တၚ်္ကာတံဂှ် ဂိတုသေပ်တေမ်ဗာ (၁) ဂှ် ထဝ်ဒကောၚ် (မဳဠေန်) မွဲဒ္ကေဝ် ၚုဟ်သၠုၚ်တိုန် စဵုကဵု (၃၅) ကိုဋ်ဒ္ကေဝ်ရ၊ တၠကမၠောန်ထဝ်တံဂှ် တန်တဴကဵု ကံၚ်ဇြဳပၞာန် သွံတြးကဵုထဝ်တၚ်္ကာတံဂှ်တုဲ ၚုဟ်ထဝ် ထပ်စှ်ေကၠုၚ်မာန်ရောၚ် သ္ၚဳဂၠိပ်လဝ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ဟိုတ်နူကၠေၚ်စက် က္ဍၚ်တုဲ ညံၚ်ၚုဟ်ဖျာသ္ဇိုၚ် မဇၞော်သၠုၚ်မံၚ် ဂွံသက်သာဂှ် နူဗွဝ်ဖျာသြန်ဍုၚ်သ္အာၚ် မွဲကဆံၚ် ထံက်ပၚ်ကဵုအာ အမေရိကာန် ဒဝ်ဠာ (၂၀၀) ပြကောဋိကိုဋ်ပြၚ်ရောၚ် လလောၚ်ပ္တိတ်လဝ် ပ္ဍဲဂိတုအဝ်ဂါတ် (၃၁) တေံရ။
ညးလ္ၚတ်သ္ၚဳဂၠိပ် ပရေၚ်ပိုန်ဒြပ်တံဂှ် ကံၚ်ဇြဳပၞာန် ပွမထံက်ပၚ်ကဵု ဒဝ်ဠာ (၂၀၀) ပြကောဋိကိုဋ်ဂှ်ကဵု ပွမသွံတြးကဵု ထဝ်တၚ်္ကာတံဝွံ ဓလီုကၠေံ အလုံဗွဝ်ဖျာမွဲဟွံမာန်တုဲ အစဳဇန်ဏံဝွံ ဂ္စါန်ဒၟံၚ်သွက်ဂွံလွဳကဵု ပရေၚ်ပိုန်ဒြပ်ကၟိန်ဍုၚ် နကဵုဂဥုဲ သ္ကဵုသက်သာကၠေံဝေဒနာ မွဲချိုန်ခဏရဂှ် ပါ်ပါဲလဝ်ရ။
ပရိုၚ်−သြၚ်လောန်တိုၚ်(မ်)