ဗရာသ်သေဲ၊ ဂျောန် ၂၈
ညံၚ်ယူကရုၚ် ဂွံဆက်ဗ္တိုက်အာရုယှာ မၜက်ၜေတ်ဗတိုက်ကၠုၚ်ဂှ်မာန် အမေရိကာန် မပါလုပ် ဂကောံနေတိုဝ်သီုဖအိုတ် ဒဒှ်ရကဵုလဝ်ကတိဂှ် ဂအုပ်ညးအုပ်ကာ ဂကောံမဟာမိတ် မက်ရူတဳ ဟီုလဝ် အပ္ဍဲပေါဲဆဵုဂဗသၟာန်သၟုက် ကုဌာန်ပရိုၚ်ရိုက်တာ ပ္ဍဲဂိတုဂျောန် ၂၅ တေံရ။
ကောံဓရီုက္ဍိုပ်သ္ကိုပ်နေတိုဝ် မကၠောန်ဗဒှ်လဝ် ပ္ဍဲဍုၚ်ဒဳဟုက်တုဲဂှ် ဂအုပ်ညးအုပ်ကာ မက်ရူတဳဂှ်တှ်ေ စပ်ကဵုရုယှာတုဲ ပ္ဍဲကဵုဂကောံမဟာမိတ်ဂှ် မၞိဟ်မဒိုဟ်ဓီုမွဲတၠလေဝ်ဟွံမွဲဂှ်ကီု၊ လစွံစိုတ်ကောန်ဂကောံသီုဖအိုတ် လ္တူရုယှာဂှ်တှ်ေ တုပ်ပ်ရဂှ် ဟီုကၠုၚ်လဝ်ရ။
ဟိုတ်နူ သမ္မတအမေရိကာန် ဒဝ်နေဝ်ထြာမ် မၞုံကဵုလစွံစိုတ်ဍိုန်ဂၠိုၚ် လ္တူရုယှာဂှ်တုဲ စပ်ကဵုကတိကဝတ် အမေရိကာန် ကဵုလဝ်ယူကရုၚ်ဂှ်တုဲ ဒှ်ကၠုၚ်လဝ်သံသယရ။
ဂွံဂွံတၚ်တုပ်စိုတ်ပရေၚ်ၜိုဟ်လလမ်မာန် နကဵုယူကရုၚ် ဆက်တုဲဂွံလုပ်အာပေါဲဗ္တိုက်ဂှ် ကောန်ဂကောံမဟာမိတ်ဂမၠိုၚ် တုပ်လဝ်စိုတ်တုဲ တၚ်တုပ်စိုတ်ပရေၚ်ၜိုဟ်လလမ် ဟွံသေၚ်မ္ဂး တၚ်တုပ်စိုတ်ဒေါအ်ပန်ပှော်တံဂှ်ဝွံ ဒးဗိုန်ခိုၚ် သွက်ဍာ်ဇမၠိၚ်ဏောၚ်ဂှ် မက်ရူတဳ ဟီုရ။
အတိုၚ်သၞောတ်တြေံ အမေရိကာန် ဆက်တုဲပါ်ပရအ်ကဵုအာ ပရိုၚ်ထံၚ်ပရိုၚ် ကုယူရုၚ်ဏောၚ်တုဲ ဆက်ကဵုအာ အရီုဗၚ်ပရေၚ်ပၞာန်ကျာ မစှ်ေကဵုနတဲတံဂှ်ဏောၚ်ဂှ်လေဝ် ညးဟီုဗပေၚ်လဝ်ရ။
ပ္ဍဲကဵုအရီုဗၚ်ပရေၚ်ပၞာန် အမေရိကာန် မပလံၚ်ဗစိုပ်ကဵုသွက်ယူကရုၚ်ဂှ် သၞောတ်စဵုဒၞါပၞာန်ကျာလေဝ် ပါလုပ်မာန်ရောၚ် ရူတဳ ဟီုရ။
နကဵုဍုၚ်ယူရောပ်ဂမၠိုၚ် စၞးဒးသ္ပပဓာန်ဒၟံၚ်အမေရိကာန် သွက်ပရေၚ်ဂီုကၠီုဂှ် ဒးပတှ်ေဇကုဇကုဏောၚ်ဂှ် ညးဟီုရ။
ကောန်ဂကောံနေတိုဝ်ဂမၠိုၚ်ဝွံ ကဵုလဝ်ကတိ သွက်ဂွံရပ်စပ်အာသြန်လုပ်ဍုၚ်ညးတအ် ၅ တၟံကၠံ သွက်ပရေၚ်ဂီုကၠီု ကေုာံ ပရေၚ်စဵုဒၞါဂှ်တုဲ သွက်ဂွံကဵုဂလိုၚ်ပတိုန် အရီုဗၚ်ပရေၚ်ပၞာန် ကုယူကရုၚ်ဂှ် ကဵုလဝ်ကတိရ။
Ref: Reuters