လံၚ်လုၚ်၊ ဂျောန် ၂၈
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ် ရးတၞၚ်သဳဂှ် ၜုၚ်တက်ပျဲပျာံလဝ် မၞိဟ်တြုံဒေသၜါတၠတုဲ ရေက်ဏာလဝ်ကအ်ဂစိုတ်လဝ်ဂှ် ညးမစုက်လုက်ကဵုဂြောဝ်ဂတာညးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်မၞုံ ဗ္ဒါဲ ၂၀၀ ဂှ်ဝွံ စနူဂိတုဂျောန် စၟတ်တ္ၚဲ ၁၃ ဂှ်တုဲ ဂေတ်ကွာန်အပ္ဍဲပွိုၚ်ဍုၚ်လံၚ်လုၚ်ဂှ်တုဲ ထ္ပက်လဝ်ကရောၚ်ပၞာန်ရ။
ကရောၚ်ပၞာန်ဏံဝွံ ကြဴနူရပ်ကၠုၚ် ဥူလှဝေန် အာယုက် ၅၀ သၞာံ ကောန်ကွာန်(သဗျာ) ကဵု ဥူမျဵုဇြဝ်အံၚ် ကောန်ကွာန်ကညုၚ်ကျောန်တအ်တုဲဂှ် ရေက်ကအ်ဂစိုတ်လဝ်ညးတအ်ရ။
ဇွရုပ်ညးဒေသၜါတၠ ဒးဒုၚ်ရေက်ကအ်ဂစိုတ်လဝ်ဂှ် ပ္ဍဲတ္ၚဲကရောၚ်ပၞာန်ကံၚ်ဇြဳပၞာန် ကလေၚ်တိတ်အာ ပ္ဍဲဂိတုဂျောန် ၂၆ ဂှ် ညးဒေသတအ် ဂွံကလေၚ်ဆဵုလဝ်ရ။
ဆ္ဂး ကုညးဒေသကညုၚ်ကျောန်ပိတၠ နူကဵုကရောၚ်ပၞာန်ကံၚ်ဇြဳပၞာန် မရပ်ဒက်ဏာလဝ်ဂှ် ဟွံဂွံကလေၚ်ဆဵုလဝ်ဏီတုဲ ဂြောဝ်ဂတာညးတအ် ဒှ်ဒၟံၚ်ဓဝိၚ် ဘဲဒှ်အန္တရာယ်လမျီုညးတံရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ညးဒေသဂၠိုၚ်ကဵုလ္ၚီ နူကဵုပွိုၚ်ဍုၚ်လံၚ်လုၚ် ဟွံအောန်နူကဵု ၅ ကွာန် ထောံလသာဌာန်ဒၟံၚ် ဒးဂြိပ်ဒဴပါဲဒလေတ်လဝ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ