မတ်မလီု၊ ဂျောန် ၂၈
လ္တူဍုၚ်မတ်မလီု မဒှ်ဍုၚ်ဇၞော်တွဵုရးဍုၚ်မန် ကံၚ်ဇြဳပၞာန် မထိၚ်ဂွံလဝ်ပေၚ်ၚ်ဂှ် ဗွဲကြဴဏံ ဒၟါနူဟိုတ်နာနာသာ်တုဲ ညးဗြဴဂမၠိုၚ် ကၠေံခၞၚ်ဂၠိုၚ်ကၠုၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးမကၠေံအာ ဗွဲမဂၠိုၚ်ဝွံ အဃောအာအကြာဂၠံၚ်တုဲ ကၠေံကီု၊ ဟိုတ်နူမၞိဟ်မွဲဂကောံ ရပ်ဏာတုဲ ကၠေံကီု၊ ထေဲပၞတ်ကဵုမၞိဟ်ဇၞော် မိမ ပ္ဍဲသ္ၚိတုဲ ကၠေံကီု ညးပလုၚ်ဂမၠိုၚ် ကော်ဏာတုဲ ကၠေံဒၟံၚ်တံ နွံကၠုၚ်ရ။
ကောန်ၚာ်သၟတ်ကၠေံခၞၚ်ဒၟံၚ်ဂမၠိုၚ်ဝွံ ဒှ်ညးအာယုက်မၞုံ အကြာ ၁၄ ကဵု ၁၉ တံတုဲ ပ္ဍဲကဵုဏံ ကွးဘာတအ်လေဝ် ပါလုပ်တုဲ အပ္ဍဲဂိတုဂျောန်ဏံ သၟတ်ဗြဴကၠေံအာ ဟွံအောန်နူကဵု ၅ တၠ နွံရ။
ညးလ္တူဍုၚ်မတ်မလီုမွဲတၠဂှ်တှ်ေ သၟတ်ဗြဴဂမၠိုၚ် ကၠေံကၠုၚ်မံၚ်ဂှ် ဒှ်ဒၟံၚ်အဆက်က်တုဲ ပ္ဍဲကဵုညးကၠေံအာဂမၠိုၚ် ရဲပလုၚ်ကော်ဏာဒၞါဲသ္ၚောဲသ္ၚောဲတုဲ ကၠေံအာဒၟံၚ်တံဂှ် နွံတုဲ အခိၚ်ဗတံ အာကလာပ် ဟွံဂံၚ်စဴသ္ၚိတုဲ ကၠေံအာဂှ်လေဝ် နွံရောၚ် ဟီုရ။
“အကြာဏံ ဒှ်ဒၟံၚ်အဆက်က်ဏောၚ်။ ဗွဲမဂၠိုၚ်ဂှ် သၟတ်ဗြဴအာယုက်ဍောတ်တ်တံဂှ် ဂၠိုၚ်။ ကၠေံမံၚ်ဗီုလဵုရောဟီုတှ်ေ ဟိုတ်ဍေံဂှ် နွံနာနာ။ လ္ၚဵုဂှ်တှ်ေ ပကောံဂွံရဲပိပန်တုဲ ကေတ်အဆက်ကဵုရဲပလုၚ်နူသ္ၚောဲသ္ၚောဲမွဲတၠတုဲ နူတေံကော်တုဲအာဂှ်လေဝ် နွံ။ မွဲပၠန်ဂှ် လ္တူဍုၚ်မတ်မလီုဂှ် Night Life ဂၠိုၚ်ဒၟံၚ်ညိ။ တိတ်မ္ၚး တိက်ကရောံသ္ကအ်ရဲတအ်တုဲ ကၠေံဒၟံၚ်ဗီုဏံဂှ် ဂၠိုၚ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုသၟတ်ဗြဴလ္ၚဵု ဗဂံၚ်စိုတ်တုဲ တိတ်ကၠောန်ကလောန်ဏောၚ်ဂးတုဲ ကၠေံခၞၚ်အာနွံတုဲ လ္ၚဵုဂှ်ပၠန် ကၠေံမၞိဟ်တၠဓဝ်၊ လ္ၚဵု ကၠေံကဵုဂကောံဂှ်လေဝ် ဂွံဆဵုကေတ်ဂှ် ညးဆက်ဟီုရ။
အပ္ဍဲဒေသဂှ်တှ်ေ သၟတ်ဗြဴဂမၠိုၚ် ကၠေံတုဲ အာတေၚ်မ္ဂး ဒပ်ဗၠာဲသၟိၚ်သၟဝ်တဲကံၚ်ဇြဳပၞာန်တအ် ထ္ၜးဟိုတ်ကဵုပရေၚ်ဂီုကၠီုတုဲ ဟွံဘိုၚ်ရီုကဵုတုဲ ၜိုတ်ကေတ်လဝ်စၟတ်သမ္တီမၞိဟ်ကၠေံဂှ်ရနွံဂှ် ဂွံတီကေတ်ရ။
ကံၚ်ဇြဳပၞာန်ဝွံ အပ္ဍဲဍုၚ်ဂှ် စုတ်လဝ် CCTV စၟအ်ဒၞါဲတုဲ မၚ်ရံၚ်ဒၟံၚ်ကီု၊ မ္ၚးနူဒၞါဲလုပ်တိတ်ဍုၚ်ဂှ် စနူကဵုအပ္ဍဲဍုၚ်တံဒှ်တမ် ကၟာတ်လဒဵုဂၠိုက်ဂၠါဲဒၟံၚ် နွံကီုလေဝ် ညးဍုၚ်ကွာန်ဂမၠိုၚ်ဝွံ မၞိဟ်ကၠေံမ္ဂး ဇကုဇကု ဒးဂၠါဲစကေတ်ရ။
သၟတ်ဗြဴဂမၠိုၚ် ကၠေံခၞၚ်ဂၠိုၚ်ကၠုၚ်တုဲ ဒးဒှ်ဒၟံၚ်ဓဝိၚ် ဖေက်ဒးဒုၚ်သွံစဍုၚ်သ္အာၚ်၊ ဖေက်ဒးဒုၚ်သွံစနဒဒှ်သမ္ဘာကြုက်၊ ဖေက်ဒးဒုၚ်သ္ပမာန် စပ်ကဵုလိၚ်တံကီု သီုကဵုပရေၚ်ဒးဒုၚ်ပြိုက်ဂစိုတ်တံဂှ်ရောၚ် ညးဒေသဂမၠိုၚ် ဟီုအိုတ်ရ။
ပ္ဍဲဍုၚ်မတ်မလီုဂှ် အပ္ဍဲဂိတုမေတုဲကၠုၚ်တေံဂှ်လေဝ် သၟတ်ဗြဴမွဲတၠ ကၠေံအာ နကဵုဗီုပြၚ်တံၚ်ရပ်မၞိဟ်တုဲ၊ လ္ၚဵုဂှ်ပၠန် အခိၚ်အာအကြာဂၠံၚ် ကၠေံဂှ်လေဝ်နွံတုဲ သၟတ်ဗြဴအာယုက် ၁၃ သၞာံမွဲတၠဂှ်တှ်ေ ကြဴနူကၠေံအာတုဲဂှ် ဂွံကလေၚ်ဆဵုကေတ် လမျီုမအိုတ်ဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media