နျူဒေလဳ၊ သေပ်တေမ်ဗာ (၃)
သ္ကိုပ်ဝန်ဇၞော် နရာန်ဒရာမဝ်ဒဳဝွံ သွက်ဂွံထံက်ပၚ် ကုဒပ်ပၞာန်မဖျေံလဝ်ဒပ် ပ္ဍဲဒေသပယျဵုဒၞက်ၜါ မဒှ်ဒၟံၚ်ပရေၚ်ဂယျာန်ဓဝါန်ဂှ် သၠုၚ်ပ္တိုန် ပွမကၠောန်ပ္တိတ်အပ္ဍဲကၟိန်ဍုၚ်တံတုဲ နဒဒှ်ကဵုက္ဍိုပ်ထ္မံက်ထ္ၜး ပရေၚ်လွဳပရာ အလဵုအသဳညးဂှ်တုဲ ပ္ဍဲဂိတုသေပ်တေမ်ဗာ (၂) ဂှ် ပအပ်ကဵုလဝ်တာလျိုၚ် ကုက္ၜၚ်ဖ္ဍိုက်က္ၜၚ်ကျာကၠာအိုတ် မကၠောန်ဗဒှ်အပ္ဍဲကၟိန်ဍုၚ် အိန္ဒိယဂှ်ရ။
က္ၜၚ်ပၞာန်ဇၞော်အိုတ် ၜိုတ်ဒက်ကၠုၚ်လဝ် ပ္ဍဲအိန္ဒိယ INS Vikrant ဂှ် ပ္ဍဲအခိၚ်သိုၚ်ခၞံ ကေုာံ စမ်ၜတ် လလအ်ပွိုၚ် (၁၇) သၞာံတုဲဂှ် မဝ်ဒဳဝွံ နဒဒှ်က္ၜၚ်ဖ္ဍိုက်က္ၜၚ်ကျာ ပရေၚ်ပြုပြေၚ်ပၞာန်ဒပ်ဍာ် မရနုက်ကဵု ဒုတိယဂှ် ပအပ်ကဵုလဝ်တာလျိုၚ် ပ္ဍဲဒၞါဲပဠေဝ်ကၠောန်က္ၜၚ် အလဵုအသဳပိုၚ် မၞုံသ္ကုတ်သၠုၚ်ကျာမွဲဂှ်ရ။
“တ္ၚဲဏံ အိန္ဒိယဝွံ ပံၚ်တောဲလဝ်ကဵု နဲကွတ်ပညာအပ္ဍဲဍုၚ်တံကဵု ကၟိန်ဍုၚ်ကၠောန်ပ္တိတ် က္ၜၚ်ဖ္ဍိုက်က္ၜၚ်ကျာ ဇၞော်ဇၞော်တံရ၊ ဣဏံဝွံ ဒှ်သၚ်္ကေတ အစောံစရာဲ၊ တမ်ရိုဟ်ဌာန်ဒၟံၚ် ကေုာံ ပွမဆိုက်ဗ္ဒက် ကောန်ကၟိန်ဍုၚ်အိန္ဒိယတံ မွဲရ” ဂှ် မဝ်ဒဳ ဟီုဂးလဝ်ရ။
Vikrant မပ္တိတ်လဝ်ဒဳဇြာၚ် သၞာဲဒဴက္ၜၚ်ကျာ ဗၞတ် (၁၆၀၀) ကေုာံ က္ၜၚ်ကျာ (၃၀) ဖ္ဍိုက်လုပ်ဂွံဂှ် လှဲပြံၚ်ကေတ် နူ INS Vikramaditya မဒှ်က္ၜၚ်ဖ္ဍိုက်က္ၜၚ်ကျာအိန္ဒိယတၞဟ်ဟ် မပ္တိတ်လဝ်ဒဳဇြာၚ် နူက္ၜၚ်ကျာ MIG-29K ရုယှာဂှ်ရ။
Boeing ကေုာံ Dassault ပြၚ်သေတ်တံဂှ်လေဝ် သွက်ဂွံထံက်ပၚ်ကဵု အိန္ဒိယ နကဵုက္ၜၚ်ကျာဂျက် (jet) ၜါဒါဇြိန် သွက် Vikrant ဂှ် ဂ္စါန်ဒၟံၚ်ဏီရ။
အိန္ဒိယဝွံ အကြာသၞာံ ၂၀၁၈ ကဵု ၂၀၂၁ ဂှ် ဒုၚ်ဖအိုတ် အမေရိကာန်ဒဝ်ဠာ (၁၂.၄) ဗဳလျာန်တုဲ ဒှ်ကၟိန်ဍုၚ် ပၠောပ်ပ္တိုန်လွဟ်လက်နက် ဂၠးတိဇၞော်အိုတ်ရ။
ရုယှာ ပၠောပ်ပ္တိုန်ဒၟံၚ်အဓိကဂှ် ဟိုတ်နူပေါဲပၞာန်သၠိုၚ်လုပ်ၜက်ၜေတ် ယူကရုၚ်တေံတုဲ ဒးဆေၚ်ဒၟံၚ်မုက်ကဵု ပွမကေတ်အရေဝ်ကၟာတ်ဆိုအ်ဗတံဂှ်ရ သွက်ဂွံသၠုၚ်ပ္တိုန် အစောံစရာဲကၠောန်ပ္တိတ်အလဵုညးတံဂှ် ဂ္စါန်ဒၟံၚ်ရ။
အိန္ဒိယဝွံ အပ္ဍဲသၞာံ ၂၀၂၂−၂၃ ဂှ် ဒဒှ်ရထ္မံက်ထ္ၜးလဝ် ကပေါတ်ပရေၚ်စဵုဒၞါ မၞုံၚုဟ်မး အမေရိကာန်ဒဝ်ဠာ (၁.၀၃) ထရဳလဳယျာန် ဗၞတ် (၈၀၀၀) ဂှ် ဌာနဝန်ဇၞော်ကာစဵုဒၞါ ဟီုဂးလဝ်ရ။
အိန္ဒိယဝွံ ပ္ဍဲကဵုဂကောံဒပ်ရပ်လွဟ်ညးဂှ် ခါန်ကၞက်စွံလဝ် ဇြဟတ် (၁.၃၈) ပြကောဋိကိုဋ်တုဲ လၟိဟ်ဂၞန်ဂၠိုၚ်နူကဵု မၞိဟ်ပြိုၚ်ပ္ကာန်ညး ကြုက် ကေုာံ ပါကေဿတာန် မပိုၚ်ပြဳလဝ် လွဟ်လက်နက်နျူကလဳယျာ တိဍာ်ပယျဵုဒၞက်ရေၚ်သ္ကအ် မစုက်ဒၟံၚ်တံဂှ် ဂွံတီကေတ်ရ။
Ref: CNA