လ္ဂုၚ်၊ သေပ်တေမ်ဗာ (၄)
လၟေၚ်တရဴရုယှာ က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် မအာစိုပ် လလအ်ပွိုၚ် (၄) တ္ၚဲဂှ်ဝွံ ဒှ်အရာဂ္စါန် သွက်ဂွံဂွံပၞော်တိတ် ဆၜိုတ်အကြေပ်ဂြတ်ပရေၚ်ပိုန်ဒြပ်ကၟိန်ဍုၚ်ဗၟာရဂှ် ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ကေုာံ ပရေၚ်ပိုန်ဒြပ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကၠုၚ်စိုပ် ဂိတုသေပ်တေမ်ဗာ စၟတ်တ္ၚဲ (၅) စဵုကဵု စၟတ်တ္ၚဲ (၈) ဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် တိုန်စိုပ်အာ ဝှဝ်ရာမ်(Forum) ပရေၚ်ပိုန်ဒြပ် ကၞောတ်ဗၟံက်−၂၀၂၂ မရနုက်ကဵု (၇၇) ဝါ မကၠောန်ဗဒှ်အာ ပ္ဍဲဍုၚ်ဗလာဒဳဗတ်သတတ် ဍုၚ်ရုယှာဂှ်ရောၚ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ပ္ဍဲလၟေၚ်တရဴဂှ်ဂှ် က္ဍိုပ်သ္ကိုပ်ပၞာန် ဆဵုဂဗအာကဵု ညးတာလျိုၚ် ဂကောံအလဵုအသဳကၟိန်ဍုၚ်ရုယှာဏောၚ်တုဲ ပွမပူဗိုၚ်ရေၚ်တၠုၚ် ပ္ဍဲကဏ္ဍပရေၚ်ဆာန်ကၟိန်၊ ပရေၚ်ပိုန်ဒြပ် ကေုာံ ကဏ္ဍနာနာတံ ညံၚ်ဂွံတောတက်ကၠုၚ် သဳကၠဳအာရောၚ်ဂှ်လေဝ် သ္ဂးလဝ်ရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ကေုာံ ပရေၚ်ပိုန်ဒြပ် ဥူယျေဝ်ထောန် (သီပေါ) ဂှ် ပ္ဍဲကဵုလၟေၚ်တရဴ က္ဍိုပ်သ္ကိုပ်ပၞာန်ဏံ အမေရိကာန် မပါလုပ် ပွမကၟာတ်ဆိုအ်ဗ ပရေၚ်ပိုန်ဒြပ် ကၟိန်ဍုၚ်ပလိုတ်တံဂှ် ၜါဍုၚ်ဏံ ဗီုလဵု သောၚ်ကလးအာရောဂှ်ကဵု ပ္ဍဲအကြေပ်ဂြတ်ပရေၚ်ပိုန်ဒြပ်ဂှ် စၞးဒဝ်ဠာ သွက်ဂွံကလးကဵုသြန်တိုက်ရိုက်တံဂှ်လေဝ် သဳကၠဳကၠုၚ်မာန်ရောၚ် သ္ၚဳဂၠိပ်လဝ်ရ။
“ကိစ္စမပ္တဝ်အာဒၟံၚ် ဗွဲယေဘုယျဂှ်တှ်ေ က္ဍိုပ်သ္ကိုပ်အမေရိကာန် ကေုာံ ဂကောံဍုၚ်ပလိုတ်တေံ အခိၚ်လၟုဟ် နကဵုပရေၚ်ပိုန်ဒြပ် ကၟာတ်ဆိုအ်ဗ၊ ဗကပ်ကၠုၚ်ဗဗေၚ် လ္တူ (နစက) တံတုဲ ကၠောန်သ္ပကၠုၚ် ပွမပြံၚ်လှာဲ ပ္ဍဲသွာၚ်သြန်ဒဝ်ဠာတံဂှ်ကီု၊ ပိုတ်သ္ကုတ်ကၠုၚ်ဗီုဏံတုဲ ဘဝတုပ်အာ ကဵုရုယှာရ၊ ရုယှာလေဝ် ဒးဒုၚ်ကၠောန်သ္ပလဝ် သာ်ဏံကီုရ၊ ပ္ဍဲကဵုကိစ္စ စပ်ကဵုပရေၚ်ပိုန်ဒြပ်တံဂှ် ပရူပရာပၟိက်ဇၞော် ကဵုကေတ်သြန်တံ ဗီုလဵုကၠောန်အာရော သာ်ဏံတံရ၊ ဟွံဒုၚ်ဒဝ်ဠာအကြာတုဲ ပရေၚ်သွံရာန် အပြံၚ်အလှာဲသြန်လှုဲတိုက်ရိုက်တံ ကၠောန်မာန်ဟာဟီုဂှ် ပါလုပ် ပ္ဍဲကဵုမသဳကၠဳဂှ်မာန်ရောၚ်” သာ်ဝွံ ညးသ္ၚဳဂၠိပ်လဝ်ရ။
သ္အာၚ်နူဂှ်ပၠန် ပ္ဍဲလၟေၚ်တရဴဏံဂှ် က္ဍိုပ်သ္ကိုပ်ပၞာန်ဝွံ ကၠေၚ်စက်တံဂှ် ဒးရာန်ကေတ်ဒၟံၚ် နူဍုၚ်ရုယှာတုဲ သွက်ဂွံပၠောပ်နၚ် နူဍုၚ်အိန္ဒိယ မွဲကဆံၚ်ဂှ်လေဝ် ကၠောန်ၜိုတ်ကၠုၚ်မာန်ရောၚ် ဥူယျေဝ်ထောန် (သီပေါ) ဂှ် သ္ဂးရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဥူတာန်သဵုနာၚ်ဂှ် ကၠုၚ်စိုပ် ပ္ဍဲလၟေၚ်တရဴဍုၚ်ရုယှာဏံ နကဵုကံၚ်ဇြဳပၞာန် ပရေၚ်ကၠေၚ်စက် ကဵု ဒဝ်ဠာတံဂှ် သဳကၠဳပ္တိုန်ထ္ၜးမာန်ကီုလေဝ် ပရေၚ်ဝဳဝတ် ကံၚ်ဇြဳပၞာန် လ္တူအကြေပ်ဂြတ်ပရေၚ်ပိုန်ဒြပ်လၟုဟ်ဂှ် စိုပ်တရဴဟွံမာန်ပုဟ်ဂှ် သ္ပလဝ်တၚ်စၟတ်ရ။
“လၟုဟ်ဂှ် ဗက်ပသောၚ်ဒၟံၚ် ပြသၞာပၟိက်ဇၞော် မမံက်တိတ်ကၠုၚ်တံ မွဲတုဲမွဲရ၊ နဒဒှ်အလုံမွဲဗွဝ်ဖျာ အပ္ဍဲပွိုၚ်တြဴဂိတုဏံ ညံၚ်ပရေၚ်ပိုန်ဒြပ် ဂွံယာက္ဍိုပ်မာန် ကၠောန်ဏောၚ်ဂှ်ဝွံ ကျာဖအိုတ်ရ၊ နတဲဍာံဍာံဏံဂှ် အခိၚ်ညး (က္ဍိုပ်သ္ကိုပ်ပၞာန်) မကၠောန်ဒၟံၚ် ညံၚ်ဂွံယာက္ဍိုပ်မာန်ဂှ် ကသုဂှ် ဗၠိုက်ဒၟံၚ်ယျ၊ အေဂှ်တှ်ေ ပ္ဍဲကံၚ်ဇြဳပၞာန်ဂှ် ညံၚ်ဂွံဂ္စါန်တိတ် နူအကာဲအရာဏံမာန် တၚ်နၚ်ဟွံမွဲပုဟ်၊ အစောံစရာဲ ဟွံမွဲပုဟ်၊ ဒှ်ဟွံမာန်ပုဟ်ဂှ် အဲမိက်ဂွံသ္ၚဳဂၠိပ်ရ၊ လအ်ကၠုၚ် ပရေံကၠုၚ် ဍာ်ဏံရဒှ်” သာ်ဝွံ ညးထံက်ထ္ၜးပါ်ပါဲလဝ်ရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မပါလုပ် သီုသၞာဲဒဴပၞာန် ကဆံၚ်လ္တူတံဂှ် စနူအခိၚ်သီအဝဵုတုဲ ဟိုတ်နူဝးပ္ကဝ်ဒၟံၚ် အခေါၚ်အရာမၞိဟ်တံဂှ်ရ အမေရိကာန် မပါလုပ် သီုကၟိန်ဍုၚ် သမဂ္ဂဥရဝ်ပတံဂှ် မ္ၚးနူကၟာတ်ဆိုအ်လဝ် ပရေၚ်ပိုန်ဒြပ်တုဲ အခေါၚ်တတ်ကၠောံ ကေုာံ အခေါၚ်လုပ်ဍုၚ်တံဂှ်လေဝ် ကၟာတ်လဝ်ရောၚ်။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်ဝွံ ဗွဲကြဴသီအဝဵုတုဲ ပ္ဍဲဂိတုဂျောန် (၂၁) သၞာံ ၂၀၂၁ ဂှ် အာစိုပ်လဝ် ကၟိန်ဍုၚ်ရုယှာ အလန်ပထမ နကဵုတၚ်ထ္ၜးဟိုတ် သ္ဂောံတိုန်စိုပ် ကောံဓရီုစပ်ကဵုပရေၚ်ဂီုကၠီု ဂၠးကဝ်ဝွံရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် (၁၀) သၞာံဏံဂှ်လေဝ် ထပ်အာစိုပ်လဝ် ဍုၚ်ရုယှာ အလန်ဒုတိယ နကဵုတၚ်ထ္ၜးဟိုတ် ပ္တိုန်က္ဍိုၚ်ကျာ် ပ္ဍဲဍုၚ်ဇၞော်ယေန်သၞာၚ်ဂၠးတိ၊ ဍုၚ်မဝ်သကိုဝ် မွဲကရောံကဵု ခမဳ(သီတဂူ)တံရ၊ ဆ္ဂး လၟေၚ်တရဴက္ဍိုပ်သ္ကိုပ်ပၞာန်ဂှ် သမ္မတရုယှာ ပူတေန် ဒုၚ်တဲဆဵုဂဗလဝ် ဟွံမွဲရ။
မွဲလ္ပာ်ပၠန်ဂှ် လၟေၚ်တရဴရုယှာ က္ဍိုပ်သ္ကိုပ်ပၞာန်ဝွံ သွက်ဂွံရာန် လွဟ်လက်နက်ပၞာန် ကေုာံ က္ၜၚ်ကျာပၞာန်တံ မပါလုပ် သီုကဵု နဲကွတ်ပညာ သ္ဂောံလၞိန်ဗပိန် ဂကောံဒပ်စဵုဒၞါညးဍုၚ်ကွာန် မရပ်လွဟ်ပၠန်ဂတးဒၟံၚ် ကုကံၚ်ဇြဳပၞာန်လေဝ် ပါလုပ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ ပါ်ပါဲလဝ်ရ။
ပရိုၚ်−သြၚ်လောန်တိုၚ်(မ်)