သေတ်ဒိုဲ၊ သေပ်တေမ်ဗာ (၅)
ကောန်ဒပ်ကံၚ်ဇြဳပၞာန် သီအဝဵုတံဝွံ ကုကောန်အရာပ်ညးဍုၚ်ကွာန် ဟွံမွဲကဵုလွဟ်လက်နက်တံဟေၚ် ဂံၚ်ဗ္တိုက်ဂှ်ရ ဒှ်ညးသတ္တိဟၟဲတံရဂှ် သ္ကိုပ်က္ဍိုက်ပ်ပၞာန် ဒပ်ပၞာန်ရခေၚ် AA ဟီုဂးလဝ်ရ။
တ္ၚဲဏံ ပ္ဍဲဂိတုသေပ်တေမ်ဗာ (၄) ဂှ် နူကဵုမုက်လိက်ဇာဇၞိက်ပရေၚ်မၞိဟ်ညး မွဲကဆံၚ် ချူပ္တိုန်လဝ်ရ၊ “ကုကောန်အရာပ် ဟွံမွဲကဵုလွဟ်လက်နက် နူကဵုမျံက်ဥူတံသၟး ညးသတ္တိဟၟဲတံ ဂံၚ်ဗ္တိုက်တုဲ ကုပရေၚ်ပြုပြေၚ်ပၞာန် မျံက်ဥူဂှ် ရေၚ်တၠုၚ်လဝ် နကဵုအမိၚ်သ္ကိုပ်ဒပ် ၝောံဒပ် (၅၅) တိုက်ရိုက်ရောၚ်” သာ်ဝွံ သ္ကိုပ်က္ဍိုက်ပ်ပၞာန် သ္ကိုပ်ဗိုလ် ထောန်မျေတ်နာၚ် ချူပ္တိုန်လဝ်ရ။
ပ္ဍဲဂိတုမေ စၟတ်တ္ၚဲ (၅) တုဲကၠုၚ်တေံလေဝ် သ္ကိုပ်က္ဍိုက်ပ်ပၞာန် AA ဂှ် နူကဵုဇာဇၞိက်ပရေၚ်မၞိဟ်ညး မွဲကဆံၚ် ကဵုလဝ်သတိ ကုသ္ကိုပ်ရးဂအုပ်ဌာန်ပၞာန် သ္ကုတ်ပလိုတ် သၟဝ်ကံၚ်ဇြဳပၞာန် သ္ကိုပ်ဗိုလ်ထေန်လာတ်ဥူဂှ် ဒဒှ်ရ ဟွံသ္ပဂရုကဵု ပရေၚ်ၜိုဟ်လလမ်မွဲသာ် ဒဵုဒၞါဲသ္ကိုပ်ရးနွံ ဗ္တိုက်အာရောၚ်ဂှ် ကေၚ်ဂးလဝ်ရ။
ကြဴနူကဵုသတိသာ်ဏံတုဲဒှ်ဂှ် ပ္ဍဲတွဵုရးရခေၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပၞာန်ရခေၚ်တံ ပွမပန်ပှော်တံ နွံကၠုၚ်တုဲ လ္ပာ်ဒပ်ကံၚ်ဇြဳပၞာန် ဇီုကပိုက်ပြဟ်လလုဲဂၠိုၚ်ဒၟံၚ်ရ။
ဒပ်ကံၚ်ဇြဳပၞာန်တံဂှ် ပွမပန်ပှော်ဗ္တိုက် နကဵုလွဟ်လက်နက်ဇၞော် အပ္ဍဲတွဵုရးရခေၚ်တံဂှ် ကၠောန်ၜိုတ်ဒၟံၚ်တုဲ ဟိုတ်နူကၠောန်သ္ပဒၟံၚ် ပွဗ္တိုက်ဂၠံၚ်တရဴကျာတံဂှ်ရ ညးဍုၚ်ကွာန်တံ ထောံလသာသ္ၚိဌာန်တုဲ ဒးဂြိပ်ဒဴဒၟံၚ်အိုတ်ရ။
စပ်ကဵုအကာဲအရာပရေၚ်ပၞာန် တွဵုရးရခေၚ်ပြဟ်ဟ်ဏံတုဲ နူကဵုသြန်လောန်တိုၚ်(မ်) ၜိုန်ရဆက်စၠောံလဝ်ကဵု ညးမၞုံအခေါၚ်ဟီုဂး AA ခါၚ်သုခကီုလေဝ် ကလေၚ်သှ်ကဵုလဝ်ဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)