လ္ဂုၚ်၊ သေပ်တေမ်ဗာ (၇)
ဂကောံဇြဟတ်ပၠန်ဂတး မကၠောန်ဒၟံၚ် ပရေၚ်ပြုပြေၚ်ပၞာန်လ္တူဍုၚ်လ္ဂုၚ်တံဂှ် ဒပ်ကံၚ်ဇြဳပၞာန်တံ သာရပ်ဒက်စၟဳစၟတ်ကၠုၚ် ဗွဲမတေၚ်ဂြတ်ဂှ်ရ သွက်ဂွံပါဲဒလေတ် ဗွဲမဂတာပ်အခိၚ်မာန် ညးဍုၚ်ကွာန်တံ ညံၚ်ဂွံရီုဗၚ်ကဵုဂၠိုၚ်ၚ်ဂှ် ဂကောံဇြဟတ်ပၠန်ဂတးလ္တူဍုၚ်လ္ဂုၚ်တံ အာတ်မိက်လဝ်ရ။
စနူဂိတုအဝ်ဂါတ် သတ္တာဟဒုတိယတုဲကၠုၚ်တေံတုဲ ပ္ဍဲပွိုၚ်ဍုၚ်ဗွဲမဂၠိုၚ် နူဍုၚ်လ္ဂုၚ်တံဂှ် ဒပ်ကံၚ်ဇြဳပၞာန်တံ ထ္ၜးဟိုတ်ကဵု စရၚ်ကၟုဲတံတုဲ နကဵုဇြဟတ်လၟိဟ်ဗွဲမဂၠိုၚ် လုပ်စိုပ်ရပ်ဒက်တံ ကၠောန်ၜိုတ်ဒၟံၚ်တုဲ ပ္ဍဲလဒေါဝ်တ္ၚဲဂှ်လေဝ် ပွမဂၠိုက်ဂၠါဲကၟာတ်ဆိုအ်ဗတံ ဆက်ကၠောန်ဒၟံၚ်ဂှ်ရ ညးဒးဒုၚ်ရပ်ဒက် မၞုံဒၟံၚ် စဵုကဵု ဗဒါဲ (၂၀) တၠရ။
“ဂကောံဇြဟတ်ပၠန်ဂတးတံ ဒးဒုၚ်ရပ်ဂၠိုၚ်ကၠုၚ်၊ ကံၚ်ဇြဳပၞာန် ဂေတ်ဓရတ်ကၠုၚ် မွဲကဝူတုဲမွဲကဝူရ၊ နကဵု UG တံ ဂွံကၠောန်ကမၠောန်ဂှ် ခက်ကၠုၚ်ကွေံကွေံရ၊ ကံၚ်ဇြဳပၞာန်တံဂှ် လက္ကရဴဏံ နကဵုကယျိုၚ်အရာပ်တံဂှ် သ္ပလွေဟ်ညးဍုၚ်ကွာန်တံတုဲ မၚ်ကျောဝ်ကၠုၚ် ညးသၟတ်တံရ၊ ရဲကဵုပရိုၚ် ချိုတ်တ်ပၠိုတ်တ်တံ နွံဒၟံၚ်ဏီ၊ ညးဍုၚ်ကွာန်တံလေဝ် ဖေက်ကၠုၚ်တုဲ မံၚ်ကၠုၚ် ညံၚ်ကဵုဟွံဆေၚ်ဇကုတံ နွံကၠုၚ်ဣရ၊ ညးဍုၚ်ကွာန်တံ သွက်ဂွံရီုဗၚ်ကဵုဂှ် မိက်ဂွံဒုၚ်ဂုဏ် နကဵုမေတ္တာရ” သာ်ဝွံ က္ဍိုပ်သ္ကိုပ်နူဂကောံဇြဟတ်ပၠန်ဂတး မချဳဒရာၚ်ဒၟံၚ် လ္တူဍုၚ်လ္ဂုၚ်မွဲတၠ ဟီုရ။
သ္အာၚ်နူဂှ်ပၠန် သီဂိုၚ်ကေတ်လဝ် ဖုၚ်တဲညးဒးဒုၚ်ရပ်တံဂှ်တုဲ ဆက်သုၚ်စောဲဒၟံၚ်အကံက် ဇာဇၞိက်ပရေၚ်မၞိဟ်ညးတံ၊ ပးဒၞက်ကၠုၚ် ရဲပၠန်ဂတးတၞဟ်ဟ်တံတုဲ ကၠောန်ၜိုတ်ဒၟံၚ် ပွမရပ်ဒက်စၟဳစၟတ်တံရောၚ်ဂှ် ညးဟီုရ။
ကြဴနူ သၟတ်ထ္ၜးဆန္ဒလ္ၚဵုတံ ဒးဒုၚ်ရပ်ဒက်တုဲ ကောန်ဒပ်ကံၚ်ဇြဳပၞာန်တံဝွံ ပ္ဍဲကဵုဌာန်ဒၟံၚ် သၟတ်ထ္ၜးဆန္ဒတံ မဒစဵုဒစးဒၟံၚ် ကုဍေံတံဂှ် ရပ်ဒက်ကၟာတ်ဆိုအ်ဗတံ ကၠောန်ဒၟံၚ်တုဲ နူကဵုမုက်လိက်တြးဝါဒဍေံတံဂှ်လေဝ် ထ္မံက်ထ္ၜးလဝ် ဗီုရုပ်တံ မၞုံဒၟံၚ်ရ။
ဟိုတ်နူကၠောန်ဒၟံၚ်သာ်ဏံတံတုဲ ဂကောံဇြဟတ်ထ္ၜးဆန္ဒတံဝွံ ဒးဒတူလိုၚ်ဒၟံၚ် အကြာအခက်အခုဲတံတုဲ ဇၟာပ်ပ်ပွိုၚ်ဍုၚ်တံဂှ်လေဝ် ဟိုတ်နူစုတ်လဝ် CCTV တံဂှ်ရ ရမျာၚ်ဗကပ်ဗဗေၚ် ဒစဵုဒစးဒပ်ပၞာန် ပ္ဍဲလ္တူဍုၚ်လ္ဂုၚ်တံ ညိၚ်အာဂှ် ဂွိၚ်ဂွါဲဒၟံၚ်အိုတ်ရ။
လက္ကရဴဒပ်ပၞာန်သီအဝဵုကၟိန်ဍုၚ်ဗၟာတုဲဂှ် ဂကောံဇြဟတ်ထ္ၜးဆန္ဒတံ နကဵုက္ဍိုပ်လိက် ဟွံကဵုအခေါၚ်အုပ်ဓုပ်လးလးတံဂှ် တိတ်ထ္ၜးဒၟံၚ်ဆန္ဒ လၟေၚ်ၚ်တုဲ ပေါဲထ္ၜးဆန္ဒဏံဂှ် နူကဵုဒပ်ပၞာန်ဗၟာ တဇီုကဵုကွဳစက်၊ ပန်ပှော်ကဵုသေနာတ်တံတုဲ ရပ်ဒက်ကၠုၚ်တံ ဒှ်တမ် ကၠောန်သ္ပဒၟံၚ် ပွပကီုပရာပ်နာနာသာ်ရ။
“စၟဳစၟတ်စရၚ်ကၟုဲဂှ် ပ္ကိတ်ကၠုၚ်ကဵု မၞိဟ်တုဲ ကြေပ်ကၠုၚ်ကွေံကွေံရ၊ အဆက်ပိုတ်အာ မွဲတၠမ္ဂး ပါအာဟွံတီ သာ်ဏံ ဒးဂွိၚ်ဒၟံၚ်၊ တုဲတှ်ေ စဵုကဵုညးမဆက်စပ်တံ ဂွံပါအာကီုဂှ် သ္ပဒၟံၚ် ဗီုဏံရ၊ ဣဏံဂှ် နူစကၠာတေံကီုလေဝ် လၟုဟ်မ္ဂး ညံၚ်ဂွိုအ်တီ ဒဒှ်ရပါအာဂှ် စဵုကဵုကလေံကၠုၚ်ပရိုၚ်တံ နွံကၠုၚ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် ညံၚ်ညးဍုၚ်ကွာန်တံ ဓဝ်ဖေက်ဂွံလုပ် ကုကောန်ဒပ်စဵုဒၞါတံကဵု သၟတ်ထ္ၜးဆန္ဒ မရပ်ဂွံလဝ်တံဂှ် ပ္ဍဲဒၞါဲရပ်ဂွံလဝ်ဂှ်ဟေၚ် ဝးပ္ကဝ်အခေါၚ်အရာမၞိဟ်တံတုဲ ၜုၚ်တက်ပျဲပျာံပန်ဂစိုတ်ကဵု သေနာတ်တံ ကၠောန်ၜိုတ်ဒၟံၚ်ရ။
ညံၚ်ဂွိုအ်ကၠောန်သ္ပထံက်ပၚ်ကဵု ဂကောံဇြဟတ်ပၠန်ဂတး မဒတူလိုၚ်ဒၟံၚ် နကဵုအထံက်အပၚ် ညးဍုၚ်ကွာန်တံမာန်ဂှ် ညံၚ်ညးဍုၚ်ကွာန်တံ ဂွံကြေပ်ဂြတ် ကံၚ်ဇြဳပၞာန် ကၠောန်သ္ပဒၟံၚ်ဇဳဒရဳတုဲ အကံက်လှဲလှုဲ မဝ်ဗိုၚ်တံဂှ် နကဵုတၞးကာဒ်ကောန်ဍုၚ်မှ ကဵုအခေါၚ်လှဲလှုဲတံတုဲ အခိၚ်ပ္တိတ်လှုဲတံဂှ်လေဝ် နူကဵုကေန်မရာ CCTV မွဲကဆံၚ် သွက်ဂွံကေတ်လဝ် စၟတ်သမ္တီ စၞောန်ထ္ၜးကၠုၚ်ဂှ်ရ အကာဲအရာဂကောံဇြဟတ်ပၠန်ဂတးလ္တူဍုၚ်တံဝွံ သာတုဲ ခက်ခုဲကၠုၚ်ရ။
ညးသၟတ်ပၠန်ဂတးတံ ဒးဒုၚ်ရပ်ဒက်ဒၟံၚ် ဗီုလၟုဟ် အဆက်က်ကီုလေဝ် ပွမချဳဒရာၚ် ပ္ဍဲဗလးတိဏံ ဇြဟတ်ဍိုန်လျအာ ဟွံသေၚ်တုဲ ဆက်ကၠောန်သ္ပ ဒစဵုဒစးအာကံၚ်ဇြဳပၞာန်တံပၠန်ရောၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကၟိန်ဍုၚ်ဗၟာ ဗွဲကြဴဒပ်ပၞာန်သီအဝဵုတုဲ ညးဒးဒုၚ်ဂစိုတ်ပကီုပရာပ်တုဲ မ္ဒးပြဟ်လလုဲအာဂှ် မၞုံကၠုၚ်စဵုကဵု (၂၂၆၅) တၠတုဲ မၞိဟ်ဒးဒုၚ်ရပ်ဒက်တံဂှ် မၞုံဒၟံၚ် (၁၅၃၅၃) တၠရောၚ် ဂကောံရီုဗၚ်ကောန်ထံၚ်ပရေၚ်ဍုၚ်ကွာန်တံ ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)