မတ်မလီု၊ ဨပရဴ ၉
ဟိုတ်နူတိချဳအာလဝ် ဇၞော်ကဵုဇြဟတ် နကဵုအသိၚ် ၇ ဒဿမ ၇ ဂှ်တုဲ အလုံဍုၚ်မွဲ သ္ၚိဌာန်ညးဍုၚ်ကွာန်ကောန်အရာပ် ၃၂၃၆၈ မ လီုလာ်ဆောံလေၚ်အာလဝ်ရောၚ် ဌာနဝန်ဇၞော်ကောပ်ကာဲဘဲအန္တရာယ် ကေုာံ ပရေၚ်ဗ္စာရဏာမၞိဟ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ် ပ္ဍဲဂိတုဨပရဴ ၆ တေံရ။
ဟိုတ်နူဘဲတိချဳ တုဲကၠုၚ် ပ္ဍဲဂိတုမာတ် ၂၈ အခိၚ်လဒေါဝ်တ္ၚဲတေံဂှ်တုဲ ပ္ဍဲကဵုရးသက်ကိုၚ်၊ ရးမာန္တလေဝ်၊ နေဗျဳဒဝ်ကံၚ်ဇြဳ၊ ဗဂေါ ကေုာံ ရးသေံသၠုၚ်ကျာတံဂှ် ပရေၚ်ဇီုကပိုက်ချိုတ်တံ ဂၠိုၚ်လဝ်ရ။
အတိုၚ်တၚ်နၚ် NUG ဂှ်မ္ဂး ဟိုတ်နူဘဲဒဏ်တိချဳတုဲ ညးမဒးချိုတ်အာ နွံ ၃၅၅၀ တၠ၊ ညးဇီုကပိုက်ကလိဂွံဝပ် ၄၆၈၉ တၠ၊ ညးမကၠေံအာ ၂၂၀ တၠ ကေုာံ စမြိုၚ်သ္ဇိုၚ် ၄၆၀၃ မ၊ စမြိုၚ်ပရေၚ်ဘာသာ ၅၃၂၄ မ၊ သ္ၚိညးဍုၚ်ကွာန် ၃၂၃၆၈ မ၊ ဘာဗ္တောန်လိက် ၅၅၄ တၠ ဘာ ကေုာံ လၟိဟ်မၞိဟ်ဒးဘဲတိချဳ ပိပြကောဋိကိုဋ်ပြၚ် နွံလဝ်ရ။
ပ္ဍဲဍုၚ်ဗၟာဏံ ဟိုတ်နူဘဲဒဏ်တိချဳ ဇၞော်ကုဇြဟတ်တုဲ မၞိဟ်ချိုတ်ကီု စမြိုၚ်သ္ဇိုၚ်လီုလာ်ကီု က္တဵုဒှ်လဝ်တုဲ နူဍုၚ်ကနေတာ ထံက်ပၚ်ကဵုလဝ်အရီုဗၚ်ပရေၚ်ဗ္စာရဏာမၞိဟ် ၂ ပြကောဋိကိုဋ်ဒဝ်ဠာအမေရိကာန်ရ။
သမဂ္ဂယူရောပ် EU ဂှ်လေဝ် သွက်အရီုဗၚ်ပရေၚ်ဗ္စာရဏာမၞိဟ်ဂှ် ထပ်ထံက်ပၚ်ကဵုလဝ် ယူရိုဝ် ၁၀ ပြကောဋိကိုဋ်တုဲ သြန်ဗွဝ်ဏံဝွံ ထံက်ပၚ်ကဵုလဝ် သွက်ဒၞါဲမံၚ်ကာမံက်တိုန်၊ သွက်ဂွံလွဳလွတ်ယဲ၊ သွက်ဍာ်သ္အးဇ္ၚး ကေုာံ သွက်ပရေၚ်ထတ်ယုက်သ္ဂောံခိုဟ်တံဏောၚ် သ္ဂးရ။
ကုလသမဂ္ဂဂှ်လေဝ် သွက်ဂကောံစပ်ကဵုပရေၚ်ဗ္စာရဏာမၞိဟ်ဂမၠိုၚ် ဗၠးဘဲတုဲ ဂွံလုပ်စိုပ် ညံၚ်ဟွံမွဲကဵုပွစဵုဒၞါတံဂှ် အာတ်မိက်လဝ် သွက်ဂွံရေၚ်တၠုၚ်ကဵု အိုဿီုကဵုအစဳဇန် မနွံပၟိက်ဂမၠိုၚ်ရ။
မွဲလ္ပာ်ဂှ်ပၠန်လေဝ် ဝန်ဇၞော်ကၟိန်ဍုၚ် ဥူတာန်ဇြိုဲ နူကဵုဌာနဝန်ဇၞော်ကာဍုၚ်သ္အာၚ်ကံၚ်ဇြဳပၞာန်ဂှ်ကဵု ဂကောံညးစၞး သၟဝ်သ္ကိုပ်သ္က ဇၞော်သ္ကိုပ်ရုၚ်ပ္ညဳပ္ညပ် စပ်ကဵုပရေၚ်ဗ္စာရဏာမၞိဟ် ကုလသမဂ္ဂတံ ဒုၚ်တဲဆဵုဂဗလဝ် ပ္ဍဲဂိတုဨပရဴ ၆ ပ္ဍဲနေဗျဳဒဝ်ရောၚ် နူကဵုထဳဗဳကၟိန်ဍုၚ်ပိုၚ် လလောၚ်တြးလဝ်ရ။
ပ္ဍဲကဵုကောံဓရီုဂှ် ဇၞော်သ္ကိုပ် UNOCHA ဂှ်တှ်ေ သွက်ဂွံရီုဗၚ် ညးဍုၚ်ကွာန်ဒးဘဲတိချဳတံဂှ် ကလိဂွံလဝ် မဒါန်သြန် နူကဵုဍုၚ်သ္အာၚ် ၉၃ ပြကောဋိကိုဋ် ဒဝ်ဠာအမေရိကာန်တုဲ နူကဵုသြန်ထံက်ပၚ်ကုလသမဂ္ဂဂှ် သုၚ်စောဲအာ ၅ ပြကောဋိကိုဋ် ဒဝ်ဠာအမေရိကာန်ဏောၚ်တုဲ သွက်ဂွံထ္မံက်ရုပ်ရဴ ကမၠောန်ကဵုအရီုဗၚ်ဂမၠိုၚ် နကဵုသြန်ဏံဂှ် ဗလးအာ သၞာဲဒဴကုလသမဂ္ဂတံရောၚ် သ္ဂးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−NUG