မတ်မလီု၊ ဨပရဴ ၉
ရန်ကဵု သ္ဂောံကၠောန်ကမၠောန်ရီုဗၚ်ဟံၚ်ပြာ် ကေုာံ ကမၠောန်ကလေၚ်ဖျေံဒၞါဲဝါဲတံဂှ်တုဲ ကံၚ်ဇြဳပၞာန် လလောၚ်တြးလဝ် ကာလဒေါအ်ပန်ပှော်ယာယဳကီုလေဝ် ပ္ဍဲကဵုရးဒေသ ကေုာံ တွဵုရးဂမၠိုၚ်ဂှ် ပန်ပှော်ဗ္တိုက်ဒၟံၚ်ကဵုလွဟ်ဇၞော် သီုပၞာန်ကျာ အရိုဟ်တ္ၚဲရောၚ် ပ္ဍဲဂိတုဨပရဴ ၆ တေံ ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။
နူဂိတုဨပရဴ ၂ စဵုကဵုဂိတုဨပရဴ ၂၂ ပွိုၚ်ၜါစှော်တ္ၚဲဂှ် ကံၚ်ဇြဳပၞာန် ၜိုန်လလောၚ်ပ္တိတ်လဝ် နဒဒှ်ကာလပန်ပှော်ဗွဲယာယဳကီုလေဝ် ပ္ဍဲကဵုရးဒေသ ကေုာံ တွဵုရး အလုံဍုၚ်မွဲဂှ် ကၠောန်သ္ပဒၟံၚ် ပရေၚ်ဗ္တိုက်ပၞာန်ကျာ ကေုာံ ဗ္တိုက်ကဵုလွဟ်ဇၞော် လၟေၚ်ဒဒှ်တ္ၚဲရ။
ပ္ဍဲဂိတုဨပရဴ ၄ ဂှ် ကံၚ်ဇြဳပၞာန် ပန်ပှော်ဗ္တိုက်လဝ်ကဵုပၞာန်ကျာ သီုကဵုလွဟ်ဇၞော် ပ္ဍဲကဵုကွာန်(ကင်းကောခူ) ပွိုၚ်ဍုၚ်လွိုၚ်ကဝ် တွဵုရးကရေၚ်ဍာဲဂှ်တုဲ ကောန်အရာပ် ၅ တၠ ချိုတ်အာလဝ်ရောၚ် သ္ဂးရ။
သ္အာၚ်နူဂှ်ပၠန် ပ္ဍဲကဵုတ္ၚဲဂှ်ရ ပ္ဍဲတွဵုရးရခေၚ် ပွိုၚ်ဍုၚ်ဒံၚ်ကုတ်ဂှ် ကံၚ်ဇြဳပၞာန် ဗ္တိုက်ထောံလဝ်မခတိုဟ် နကဵုက္ၜၚ်ကျာဗ္တိုက်တုဲ ဘာကျာ်ခရေတ်ယာန်ကီု သ္ၚိမၞိဟ်ဒၟံၚ်ကီု ဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ်လ္ၚဵုတံလေဝ် ဇီုကပိုက်ကလိဂွံလဝ်ဝပ်ရ။
တုဲကၠုၚ် ပ္ဍဲဂိတုဨပရဴ ၅ တေံဂှ်လေဝ် ကံၚ်ဇြဳပၞာန် ဟိုတ်နူဗ္တိုက်ကၠုၚ်ကဵုလွဟ်ဇၞော် သီုပန်ကၠုၚ်ကဵုပၞာန်ကျာ ပ္ဍဲတွဵုရးသေံ ပွိုၚ်ဍုၚ်နံၚ်ချဵုကဵု ပွိုၚ်ဍုၚ်ညံၚ်ယှိုဲ၊ ပ္ဍဲရးမဂွဵု ပွိုၚ်ဍုၚ်ပခုက္ကူ၊ ပ္ဍဲရးမာန္တလေဝ် ပွိုၚ်ဍုၚ်မာတ္တရာတံဂှ်တုဲ သ္ၚိ ၂၀ မပြၚ် ဇီုကပိုက်လီုလာ်အာလဝ်တုဲ ညးဍုၚ်ကွာန်လ္ၚဵု ကလိဂွံလဝ်ဝပ် နွံရောၚ် ထ္မံက်ထ္ၜးလဝ်ရ။
လအာတုပ်သာ်ဂှ်ကီု ပ္ဍဲဂိတုဨပရဴ ၆ တေံဂှ်လေဝ် ကံၚ်ဇြဳပၞာန် ထောံမခတိုဟ်ဗ္တိုက်ကၠုၚ်လဝ် ပ္ဍဲပွိုၚ်ဍုၚ်ချံၚ်ဥူ ကေုာံ ပွိုၚ်ဍုၚ်ဘုတလေန် ရးသက်ကိုၚ် နကဵုက္ဍိုၚ်ကျာဒပ်ပၞာန်တုဲ ညးဍုၚ်ကွာန်ပန်တၠ ချိုတ်အာလဝ်တုဲ ဇီုကပိုက်ကလိဂွံဝပ်လေဝ် နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး AAPP ရ။
ပရိုၚ်−သြၚ်လောန်တိုၚ်(မ်)
ဗီု−KNU