မတ်မလီု၊ ဨပရဴ ၉
ပ္ဍဲတွဵုရးဍုၚ်မန် ဂကောံပံၚ်ကောံ နူဌာနအလဵုအသဳမဆေၚ်စပ်ဂမၠိုၚ် ပါလုပ်သီုကဵု ဗၠာဲသၟိၚ်ထိၚ်ယာန်ကံၚ်ဇြဳပၞာန်တံဂှ် ရပ်ဒက်ကွဳလိုန်ဓာတ် စုတ်လဝ်လာၚ်ဇြေန်ယာယဳတံဂှ်တုဲ ဘပဠအာတ်မိက်ကၠုၚ်ဒၟံၚ်လှုဲ ဟွံပိုတ်သ္ကုတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဂကောံပံၚ်တောဲ သၟဝ်တဲကံၚ်ဇြဳပၞာန်တံဝွံ နကဵုက္ဍိုပ်လိက် ဗ္တိုက်သရိုဟ်ပရေၚ်သွံရာန်ဗၞိက် ဟွံလုပ်သၞောဝ်ဂှ် ပ္ဍဲဒၞါဲလုပ်တိတ်ဍုၚ် ဒၞါဲယာန်ကွဳစက်ကွာ်ဂၠိုၚ်တံဂှ် စၟဳတ်ကွဳလိုန်ဓာတ် စုတ်လဝ်လာၚ်ဇြေန်ယာယဳတံဂှ်တုဲ ရပ်ဒက်ဒၟံၚ်ရ။
တုဲကၠုၚ် ပ္ဍဲဂိတုဨပရဴ ၄ တေံဂှ်လေဝ် ပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ဇြပ်ဗုတံဂှ် ဂကောံဗ္တိုက်သရိုဟ် ပရေၚ်သွံရာန်ဗၞိက်ဟွံလုပ်သၞောဝ် တွဵုရးဍုၚ်မန် ကောပ်ကာဲတုဲ ရပ်ဒက်ကၠုၚ်ဒၟံၚ်တုဲ ကေတ်လဝ်အရေဝ် နကဵုသၞောဝ်ဥပဒေ ဗၞိက်ပၠောပ်ဗၞိက်ပ္တိတ်တံဂှ်ရောၚ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ရ။
ညးဒေသတွဵုရးဍုၚ်မန် ဟွံမိက်ထ္မံက်ယၟုမွဲတၠဂှ်တှ်ေ ကွဳလိုန်ဓာတ်လာၚ်ဇြေန်ယာယဳ ကံၚ်ဇြဳပၞာန် ရပ်လဝ်တံဂှ်ဝွံ နူကဵုဆေၚ်သွံကွဳလိုန်ဓာတ်ဂမၠိုၚ် ကၠောန်ကဵုလာၚ်ဇြေန်ဏောၚ်ဂးတုဲ ရာန်ကေတ်လဝ် နကဵုၚုဟ်သီုလာၚ်ဇြေန်တုဲ ဟိုတ်နူရပ်ဒက်ကၠုၚ်သာ်ဏံတုဲ ပရေၚ်ဒးဂိတံ နွံတၟာဂလိုၚ်ရောၚ် ဟီုရ။
“ကွဳလိုန်ဓာတ် ဒးဒုၚ်ရပ်ဒၟံၚ်လၟုဟ်တံဂှ် ကၠောန်ကဵုလာၚ်ဇြေန်ဏောၚ်ဂးတုဲ ရာန်လဝ်ၚုဟ်ပါသီုလာၚ်ဇြေန်။ ရာန်လဝ်နကဵုၚုဟ်လာၚ်ဇြေန်တုဲ ယဝ်ဒးဒုၚ်ရပ်မ္ဂး သွက်ညးတံ ဒးဂိတၟာဂလိုၚ်။ မ္ၚးဏံ ကွဳလိုန်ဓာတ် ကၠောံလဝ်သြၚ်ဓမ္မတာတံဂှ်တှ်ေ ၜိုတ် ၈၀/၉၀ ဒးဏောၚ်ဟီုမ္ဂး နကဵုလာၚ်ဇြေန်ယာယဳတံဂှ်တှ်ေ ပ္ဍဲကဵုဆေၚ်တံဂှ် ဒးဒၟံၚ် ၜိုတ် ၁၀၀ ပြၚ်။ အေ ဂှ်ရ ဒးဂိဒၟံၚ်တၟာဂလိုၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ကွဳလိုန်ဓာတ်ဟၟဲကဵုလာၚ်ဇြေန် နူကဵုကောန်ရဲသၟဝ်တဲကံၚ်ဇြဳပၞာန် မရပ်ဒက်ဒၟံၚ်လ္ၚဵုတံဂှ်ဝွံ ဟိုတ်နူဆေၚ်သွံကွဳလိုန်ဓာတ်ဂမၠိုၚ် ကၠောန်ကဵုလာၚ်ဇြေန်ဏောၚ်ဂးတုဲ ရာန်လဝ်ဂှ်ရ နကဵုဆေၚ်တံဏံ ဒးကေတ်လျိုၚ်ထေက်ဂှ် ညးဆက်ဟီုရ။
ကောန်ရဲသၟဝ်တဲကံၚ်ဇြဳပၞာန်လ္ၚဵုတံဂှ်တှ်ေ ရပ်ဒက်စၟဳတ်ကွဳလိုန်ဓာတ် လာၚ်ဇြေန်ဟွံမွဲတံဂှ်တုဲ လ္ၚဵုတံဂှ်တှ်ေ အာတ်မိက်သြန် ဂၠိုၚ်ကဵုဆတုဲ ကလေၚ်ဗလးကဵုလဝ် နွံတုဲ ညးကဵုလှုဲဟွံမာန်တံဂှ်တှ်ေ သီကေတ်ကွဳလိုန်ဓာတ်တံဂှ်တုဲ ကေတ်ဒၟံၚ်အရေဝ် သီုမၞိဟ်ဂှ်လေဝ် နွံဂှ် ညးဒေသတံ ဟီုရ။
ကွဳလိုန်ဓာတ် လာၚ်ဇြေန်ဟွံမွဲ ဗွဲမဂၠိုၚ်ဝွံ ထပက်လှုဲ ကုသၞေဟ်ကၚ်သၟဝ်တဲကံၚ်ဇြဳပၞာန်တံတုဲ လုပ်စိုပ်ကၠုၚ် နူပယျဵုမွဲကဆံၚ်တုဲ ဍိုက်ကၠုၚ်ဒၟံၚ်အပ္ဍဲဒေသသၟးဟွံက သွံစဒၟံၚ်သီုဒေသတၞဟ်ဟ်တံရ။
ပ္ဍဲတွဵုရးဍုၚ်မန်ဂှ်တှ်ေ ကွဳလိုန်ဓာတ် လာၚ်ဇြေန်ဟွံမွဲတံဂှ် လုပ်စိုပ်ကၠုၚ် နူဍုၚ်သေံ ဍုၚ်ဇိုၚ်ဝုတ်ဒိုဟ်တံဂှ်တုဲ အပ္ဍဲဒေသဂှ်တှ်ေ ညးမစုက်လုက်ကဵုကံၚ်ဇြဳပၞာန်တံ ဍိုက်ဒၟံၚ် နွံတုဲ လ္ၚဵုတံဂှ်တှ်ေ ထ္ပက်လှုဲ ကုကောန်ရဲသၟဝ်တဲကံၚ်ဇြဳပၞာန်တံတုဲ ဍိုက်ဒၟံၚ်တံလေဝ် နွံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ