သဵု(လ်) ၊ ဨပရဴ ၉
စပ်ကဵုသမ္မတတြေံ ယောန်သက်ယော မလလောၚ်တြးကၠုၚ်သၞောဝ်အုပ်ဓုပ်ပၞာန်ဂှ်တုဲ ပ္ဍဲသတ္တာဟတုဲကၠုၚ်တေံ ပ္တိတ်ကၠေံညး နူကဆံၚ်ဌာနန္တရညးတုဲဂှ် အလဵုအသဳကိုဝ်ရဳယျာသၠုၚ်ကျာ တုပ်လဝ်စိုတ် တ္ၚဲဂိတုဂျောန် ၃ ဏံ နဒဒှ်တ္ၚဲကၠောန်ဗဒှ်ပေါဲရုဲမာဲသမ္မတ အခိၚ်အကြာရ။
သွက်ပေါဲရုဲမာဲဂှ် နွံပၟိက်ဒးတုပ်စိုတ်ကဵုအခေါၚ် တ္ၚဲညးဂမၠိုၚ်သၠးမွဲတ္ၚဲဂှ်ရ ကြဴနူသဳကၠဳ ကုကမ္မယှေန်ပေါဲရုဲမာဲကောန်ဂကူတုဲဂှ် ဂကောံအလဵုအသဳ သ္ပဒတန်ကဵုလဝ် ပ္ဍဲဂိတုဨပရဴ ၈ ရ။
ပ္ဍဲဂိတုဒဳဇြေမ်ဗာ ၃ တေံ သမ္မတတြေံ ယောန် မလလောၚ်တြးကၠုၚ် သၞောဝ်အုပ်ဓုပ်ပၞာန်တုဲ ညံၚ်ကၠောန်ဗဒှ်ကောံဓရီုကၠတ်ထဝ်ဟွံဂွံ မဗလးဏာလဝ်ကောန်ပၞာန်ဂှ် နူကဵုရုၚ်သၞောဝ်ဓဝ်သၞောဝ်သ္ဇိုၚ်ဒက်ပ္တန် ပ္တိတ်ကၠေံညး နူကဆံၚ်ဌာနန္တရ နကဵုဂဗုတ်ဝးပ္ကဝ်တာလျိုၚ်သမ္မတရ။
ယဝ်ဒၞါဲသမ္မတ သၠးအာမ္ဂး အပ္ဍဲပွိုၚ် ၆၀ တ္ၚဲဂှ် ဒးကၠောန်ဗဒှ်ကဵု ပေါဲရုဲမာဲသမ္မတတၟိဏောၚ် ပ္ဍဲသၞောဝ် ဖျေံစၟတ်လဝ်ရ။
ကြဴနူသမ္မတတြေံ ယောန် လလောၚ်တြး သၞောဝ်အုပ်ဓုပ်ပၞာန်တုဲဂှ် ကၠတ်ထဝ် စောဲစပ်ပ္တိုန်လဝ်ဒုဟ် ကုညးတုဲ ကုသ္ကိုပ်ဝန်ဇၞော် ဟာန်ယက်သူ မဒှ်က္ဍိုပ်သ္ကိုပ်ယာယဳ ကေတ်လဝ်လျိုၚ်စၞး ဒၞါဲညးဂှ်လေဝ် စောဲစပ်ပ္တိုန်လဝ်ဒုဟ်တုဲ ပ္ဍဲကိုဝ်ရဳယျာသၠုၚ်ကျာ ပရေၚ်ဍုၚ်ကွာန်ဟွံညိၚ်ဝတ် က္တဵုဒှ်အာလဝ် ကဵုဂိတုရ။
ဗွဲကြဴဏံ ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန် ကလေၚ်ရုပ်သီကဵုလဝ် ပရေၚ်စောဲစပ် မပ္တိုန်လဝ်ဒုဟ် လ္တူသ္ကိုပ်ဝန်ဇၞော် ဟာန်ဂှ်တုဲ ညးဝွံ ဒဵုကဵုအခိၚ်ကၠောန်ဗဒှ်ပေါဲရုဲမာဲဂှ် ဆက်ကေတ်အာတာလျိုၚ် နဒဒှ်က္ဍိုပ်သ္ကိုပ်ယာယဳဏောၚ် မဒှ်ရ။
ကဆံၚ်ဒၞါဲဂကောံအလဵုအသဳကိုဝ်ရဳယျာသၠုၚ်ကျာ သၠုၚ်အိုတ်ဏံ သၠးဒၟံၚ်ဂှ်ဝွံ ဒှ်ဒၟံၚ်အခိၚ် သမ္မတအမေရိကာန် ဒဝ်နေဝ်ထြာမ် ကံက်ဂလိုၚ်ပ္တိုန်လဝ်အခေါန်ဖလှာရ။
လဳဂျေမျံၚ် မၞိဟ်ဒးစိုတ်ဂၠိုၚ် မဒှ်က္ဍိုပ်သ္ကိုပ်ဗော်လေတ်ဗရဴ ဒဳမဝ်ကရေတ်တေတ်ဂှ် သၞာံ ၂၀၂၂ တေံ ဒးကျအာလဝ် သမ္မတတြေံ ယောန် နကဵုမမာဲညိညတုဲ ညးဝွံ ပ္ဍဲပေါဲရုဲမာဲဏံ ဂြိပ်ဒၟံၚ်ဂတကီုလေဝ် ဒးဆေၚ်ဒၟံၚ်မုက်ကဵု ဂဗုတ်မစောဲလဝ်လ္တူညး မပ္တံကဵုပရေၚ်ဖံက်ပ္ကဝ်သၞောဝ်ပေါဲရုဲမာဲ ကေုာံ ကဵုကေတ်လာပ်ဗဇဴတံ တၟာဂလိုၚ်ရ။
Ref: Reuters