လ္ဂုၚ်၊ သေပ်တေမ်ဗာ (၈)
အပ္ဍဲသၞာံကၠုၚ်စိုပ်ဏံ သွက်သွဟ် ပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ဍုၚ်သ္အာၚ် မသၠဲလးနူ လၟုဟ်ဏံ ဂွံမံက်တိတ်ဂှ် သၠုၚ်ပ္တိုန်အသိၚ် ပ္တိတ်ဇြဟတ်ဂ္စါန်အာတုဲ ပေါဲဗ္တိုက် မကဵုသ္ဂုတ်သွာတ် ၚးတးထပိုတ်အာရိုဟ်ကၞက် ဒပ်ပၞာန်ဗၟာ ဝှေတ်သေတ်တံဂှ် လဇုဲကဵုပြဟ် စိုပ်ကၠုၚ်ရောၚ် သမ္မတယာယဳ အလဵုအသဳညဳသၟဟ်ဂကူ NUG ဟီုဂးလဝ်ရ။
အလဵုအသဳညဳသၟဟ်ဂကူ NUG မလလောၚ်ပ္တိတ်လဝ် ပၞာန်တဝ်စၞေဟ် ပၠန်ဂတညးဍုၚ်ကွာန် ပ္ဍဲဂိတုသေပ်တေမ်ဗာ (၇) တ္ၚဲဏံ မပေၚ်အာမွဲသၞာံဂှ် သမ္မတယာယဳ ဒူဝါလယှဳလ ဟီုဂးလဝ် ပ္ဍဲဂလာန်ဒုၚ်သ္ဇိုၚ်ကၟိန်ဍုၚ်ရ။
သမ္မတယာယဳဂှ် အခိၚ်ပၞာန်တဝ်စၞေဟ် ပေၚ်အာမွဲသၞာံဂှ် နကဵုကံၚ်ဇြဳပၞာန် အုပ်ဓုပ်ဓလီုဂွံခိုဟ်ဟ်ဟီုဂှ် ဆၜိုတ်သမၠဲတိဍာ်ကၟိန်ဍုၚ် ကဝက်ဓဝ်လေဝ် ဟွံမွဲပုဟ်ဂှ် သ္ဂးလဝ်ရ။
ဟိုတ်ဂှ်ရ သၞာံကၠုၚ်စိုပ်ဏံ ဟိုတ်နူဒှ်သၞာံ မပြာကတ်တဴပ္ဍဲဝၚ်ဂှ်ရ ၜိုတ်သၟဟ်အစောံ သွက်ဂွံဂ္စါန် ပ္တိတ်ကဵုဇြဟတ်အိုတ်ဂှ်ကီု၊ အပ္ဍဲသၞာံဒုတိယ ပၞာန်တဝ်စၞေဟ်ပၠန်ဂတးဂှ် သၠုၚ်ပ္တိုန်အာအသိၚ် ပရေၚ်ပၠန်ဂတးညးဍုၚ်ကွာန် နကဵုဇြဟတ်ရောၚ် သမ္မတယာယဳ ဟီုဂးလဝ်ရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ကေုာံ ပရေၚ်ပၞာန် ဥူတာန်သဵုနာၚ်ဂှ် လ္ပာ်ကံၚ်ဇြဳပၞာန် စပ်ကဵုတိဍာ်လ္ပာ်ဍုၚ်ဇၞော်တံဂှ် ၜိုတ် (၁၃) တၟံကၠံ ထိၚ်လဝ်မာန်တုဲ အကာဲအရာလ္ပာ် NUG ထိၚ်မာန်လဝ် (၂၁) တၟံကၠံဂှ်ဝွံ လ္တာ်သၠဒကေဝ်ပရေၚ်ပၞာန်ဂှ် ဒှ်ဒၟံၚ်အကာဲအရာ လ္ပာ် NUG ဂွံဒၟံၚ်စေဝ်လ္တူရောင် သ္ၚဳဂၠိပ်လဝ်ရ။
“ အေဂှ်တှ်ေ လ္တာ်သၠဒကေဝ်ပရေၚ်ပၞာန်ဝွံ စိုပ်ဒၟံၚ်က္ဆံၚ် လ္ပာ် NUG ကြပ်ဂွံမံၚ် စေဝ်လ္တူတုဲ လ္ပာ်ကံၚ်ဇြဳပၞာန်ဂှ် စိုပ်ဒၟံၚ်ဍာ် သရိုဟ်စှ်ေလီုလာ်ဂှ်ရောၚ် နကဵုပိုယ်တံ စၟဳညာတ်ကေတ်ရ၊ ဟိုတ်ဂှ်ရ အကာဲအရာဏံဂှ် ယဝ်ရကၠောန်သ္ပ ပၞာန်ထ္ပက် မွဲလ္ပာ်ကုမွဲလ္ပာ် မွဲအလန်ပၠန်မ္ဂး တၚ်ပ္တဝ်က္ဍိုပ် ပၠန်ဂတးဥတုက္ညၚ် သ္ဂောံကမၠက်ထောံ သၞောတ်တၠအဝဵုပၞာန်ဂှ်ကီု၊ သွက်သ္ဂောံသီပလီု ကံၚ်ဇြဳပၞာန်၊ သွက်ဂွံပ္တန်ဗဒှ် သၞောတ်ဖေတ်ဒရေဝ်ဒဳမဝ်ကရေဇြဳတံဂှ် စိုပ်ကၠုၚ် အခိၚ်ကာလသၞာံ မကဵုသ္ဂုတ်သွာတ် သွက်ဂွံထ္မံက်ရုပ်ရဴယျ” ဂှ် ညးသ္ၚဳဂၠိပ်လဝ်ရ။
သမ္မတယာယဳ NUG ဂှ် ဒပ်ပၞာန်ဗၟာဝွံ သွက်ဂွံတာဒၞါ ဆန္ဒ ကေုာံ ဇြဟတ်ညးဍုၚ်ကွာန်တံမာန် ဇြဟတ်ရုပ်၊ ဇြဟတ်စိုတ် ရုမ်မ်ဂပ်ပ်ဟွံမွဲရတုဲ အကြေပ်ဂြတ် ပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ဍုၚ်သ္အာၚ် နာနာသာ် က္တဵုဒှ်ဒၟံင်တုဲ သာတုဲ ဓဇန်ကၠုၚ်ေရာင်ဂှ်လေဝ် သ္ဂးရ။
သ္အာၚ်နူဂှ်ပၠန် ပ္ဍဲကဵုပၞာန်တဝ်စၞေဟ်ပံၚ်ကောံ ဒပ်ပၞာန်စဵုဒၞါညးဍုၚ်ကွာန်ကဵု ဂကောံပၠန်ဂတးကောန်ဍုၚ်အရၚ်တံဂှ် အတိုၚ်ပရေၚ်ပၞာန်၊ ပရေၚ်အုပ်ဓုပ်မ္ဂး ဒေသအုပ်ဓလီုဂွံလဝ် ဍိုက်က်ပေၚ်ၚ် နွံကၠုၚ် တၟာဂလိုၚ်တုဲ ပွိုၚ်ဍုၚ် ဂကောံနာဲဗ္စာ နူပွိုင်ဍုင်အပံၚ် (၂၄) ပွိုၚ်ဍုၚ် တိဍာ်မအုပ်ဓုပ်ဂွံလဝ်တံဂှ် ပံၚ်ပကောံလဝ်တုဲ စထ္မံက်ဒၟံၚ်ရုပ်ရဴ ကမၠောန်စဳရေၚ်ဂဗုတ်တံယျဂှ်လေဝ် သမ္မတယာယဳ ဟီုဂးလဝ်ရ။
ဆ္ဂး ပၞာန်တဝ်စၞေဟ်ပၠန်ဂတး သ္ဂောံဂါံတိုန်အာ ကဆံၚ်ဂတဏံမာန် သြန်ဂအုံဘဏ္ဍာ မနွံပၟိက် ဇြဟတ်မဍိုန်လျအဓိကဂှ်လေဝ် ၜိုတ်သၟဟ်အစောန် သွက်ဂွံဆက်ထံက်ပၚ် ရီုဗၚ်ကဵုဂှ်လေဝ် ဒုၚ်လဝ်ဂုဏ် နလၟေၚ်မေတ္တာ ဇြိုဟ်ဟ်နက်က်ရ။
အလဵုအသဳညဳသၟဟ်ဂကူ NUG ဝွံ အခိၚ်လၟုဟ် တမ်ဒပ် PDF အပံၚ် (၃၀၀) ပြၚ် ဒက်ပ္တန်မာန်လဝ်တုဲ အလုံမွဲကၟိန်ဍုၚ် ပ္ဍဲကဵုပွိုၚ်ဍုၚ် (၃၃၀) မၞုံဂှ် အပံၚ်ပွိုၚ်ဍုၚ် (၂၅၀) ပြၚ်ဂှ်လေဝ် ဒက်ပ္တန်လဝ် ဂကောံဒပ်စဵုဒၞါညးဍုၚ်ကွာန်တံတုဲ ဗ္တိုက်ပၠန်ဂတးဒၟံၚ် ဒပ်ပၞာန်ဗၟာတံအိုတ်ရ။
ပရိုၚ်−သြၚ်လောန်တိုၚ်(မ်)