တၞၚ်သဳ၊ သေပ်တေမ်ဗာ (၉)
အပ္ဍဲပေါဲဗ္တိုက်ၜါလ္ပာ် မက္တဵုဒှ်ဒၟံၚ် ပ္ဍဲသ္ကုတ်ဂၠံၚ်ထဝါဲ−ထဳခဳ၊ ပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳဂှ် ဒပ်ကံၚ်ဇြဳပၞာန် ရပ်ဒက်လဝ် ညးဒေသ (၁၀၀) ပြၚ် နဒဒှ်ဇွောံစဵုဒၞါပၞာန်ရောၚ်ဂှ် ညးမၞုံတာလျိုၚ် ဂကောံဒပ်စဵုဒၞါညးဍုၚ်ကွာန် (အရှေ့တော) ထဝါဲတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုသေပ်တေမ်ဗာ (၆) တေံ ပ္ဍဲဗ္ဒါဲကွာန်ဘဝပေန် မၞုံသ္ကုတ်ဂၠံၚ်ထဝါဲ−ထဳခဳဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံ စဵုဒၞါညးဒေသတံ က္တဵုဒှ်လဝ် ပေါဲဗ္တိုက်ရေၚ်သ္ကအ်ရ။
အပ္ဍဲပေါဲဗ္တိုက်ဂှ် ဒပ်ကံၚ်ဇြဳပၞာန်ဝွံ နဒဒှ်ဇွောံစဵုဒၞါပၞာန်ဂှ် ရပ်ဒက်လဝ် သီုကဵုကောန်ၚာ်၊ မၞိဟ်ဇၞော်ဇၞော်တံ မပါလုပ် ညးဒေသ (၁၀၀) ပြၚ် ပ္ဍဲဘာလကျာ် ဘဝပေန်ဂှ်ရ။
ညးဒေသ ဒပ်ကံၚ်ဇြဳပၞာန်တံ မရပ်ဒက်လဝ် (၁၀၀) ပြၚ်ဂှ်ဝွံ ဒဵုကဵု အခိၚ်လၟုဟ် ဟွံကလေၚ်ဗလးကဵုမွဲသာ် ဆက်ရပ်ဒက်လဝ် နဒဒှ်ဇွောံစဵုဒၞါပၞာန်ရောၚ်ဂှ် ညးမၞုံတာလျိုၚ် ဂကောံဒပ်စဵုဒၞါညးဍုၚ်ကွာန် (အရှေ့တော) ထဝါဲ မွဲတၠ ဟီုရ။
ပ္ဍဲပေါဲဗ္တိုက်ဘဝပေန်ဂှ် ကြဴနူကောန်ဂကောံဒပ်ကံၚ်ဇြဳပၞာန် (၇) တၠ ချိုတ်တုဲဂှ် ဒပ်ကံၚ်ဇြဳပၞာန် ရပ်ဒက်ကၠုၚ်လဝ် ညးဒေသတံ နဒဒှ်ဇွောံစဵုဒၞါပၞာန်ရ။
ဟိုတ်နူပေါဲဗ္တိုက်ကွာန် ဘဝပေန်တုဲ ညးဒေသ (၁၂၀၀) ပြၚ် နူကဵုကွာန်ဗဒါဲဗဒါဲ (၅) ကွာန်ဂှ်ဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲဒဵုဂြိုပ် မဗၠးဘဲတံကဵု ပ္ဍဲကွာန် မသကလောကောဒေံ မကြပ်တံဂှ်တုဲ နွံပၟိက်ဒၟံၚ်ကဵု အရီုဗၚ်ဇွောံမစၞစသ္ဇိုၚ်တံ မပါလုပ် ဂဥုဲဇဗ ကေုာံ ဖ္ဍာန်ဒၞါဲမံၚ်တံ ကာမံက်တိုန်ရ။
ပရိုၚ်−သြၚ်လောန်တိုၚ်(မ်)