မတ်မလီု၊ သေပ်တေမ်ဗာ (၈)
ၜိုန်ရၚုဟ်ကၠေၚ်တိဒမျိုၚ် ၚုဟ်စှ်ေဒၟံၚ် အဆက်က်ကီုလေဝ် ကံၚ်ဇြဳပၞာန်သီအဝဵု ဒၟါနူထံက်ပၚ်ကဵုလဝ် သြန်ဒဝ်ဠာ (၂၀၀) ပြကောဋိကိုဋ်ဍာံဍာံ ဟွံမွဲဂှ်ရ ၚုဟ်ကၠေၚ်စက် ဟွံစှ်ေရဂှ် ညးပၠောပ်သွံကၠေၚ်စက်တံ ကေုာံ တၠကမၠောန်တံ သ္ၚဳဂၠိပ်လဝ်ရ။
တိုက်သြန်ဗဟဵုကံၚ်ဇြဳပၞာန်ဂှ် သွက်ဂွံသောၚ်ကလး ၚုဟ်ကၠေၚ်စက် မက္ဍၚ်တံဂှ်တုဲ နူကဵုဗွဝ်ဖျာသြန်ဍုၚ်သ္အာၚ်ဂှ်မွဲကဆံၚ် ထံက်ပၚ်ကဵုအာ အမေရိကာန်ဒဝ်ဠာ (၂၀၀) ပြကောဋိကိုဋ်ပြၚ်ရောၚ် တုဲကၠုၚ် ဂိတုအဝ်ဂါတ် (၃၁) တေံ လလောၚ်ပ္တိတ်လဝ်ရ။
ဆ္ဂး ယၚ်သြန်ဒဝ်ဠာ (၂၀၀) ပြကောဋိကိုဋ်ဂှ် နဗီုပြၚ်သာ်လဵု ထံက်ပၚ်ကဵုလဝ်ရောဟီုဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ် မွဲမွဲသာ် ဟွံမွဲဏီတုဲ ၚုဟ်ကၠေၚ်စက်လေဝ် ၜိုတ်ထေၚ်လဝ် ဟွံစှ်ေကၠုၚ်ဏီတုဲ ဆက်နွံဒၟံၚ် အတိုၚ်ၚုဟ်သၠုၚ်ၚ်ဂှ်ဖိုဟ်ရ။
ညးပၠောပ်သွံကၠေၚ်စက်မွဲတၠဂှ် ၚုဟ်ကၠေၚ်စက်ဝွံ လ္ပာ်ကံၚ်ဇြဳပၞာန် မ္ၚးနူဟွံထံက်ပၚ်ကဵု ဒဝ်ဠာ (၂၀၀) ပြကောဋိကိုဋ်ဂှ် နကဵုညးပၠောပ်ပ္တိုန်နၚ်တံ သီုကဵုဒးရာန်ဒၟံၚ်သြန်ဒဝ်ဠာတံ နဲဇကုကဵုဇကုတုဲ ၚုဟ်ဟွံစှ်ေရဂှ် သ္ၚဳဂၠိပ်လဝ်ရ။
“အေဇှ်ဂှ်တှ်ေ ဒှ်သ္ဇိုၚ်ဒၟံၚ် မၞိဟ်အပ္ဍဲဍေံတံရ ကၠတ်ကၠောန်ဒၟံၚ်ညးသ္ကအ်အိုတ်တုဲ ဒဵုကဵုအခိၚ်လၟုဟ် ကမ္ပဏဳလဵု၊ ကမ္ပဏဳပုဂ္ဂလိကလဵု၊ ဂွံအရၚ်မူစိတုဲ ရာန်အာဗီုလဵုဟီုဂှ် ဍေံတံ လလောၚ်လဝ်လေဝ် ဟွံမွဲပုဟ်၊ လးထ္ၜးကဵုဂှ်လေဝ် ဟွံမွဲ၊ ဆေၚ်စပ်ကဵု ဍေံတံဗီုလဵု လးထ္ၜးဏာရောဟီုဂှ်တှ်ေ ဣဏံဂှ် ညးလဵုမှ တီကေတ်ဟွံမာန်ပုဟ်လေဝ် ၊ လ္ၚဵုဟီုဂှ်တှ်ေ ဍေံတံရေၚ်သ္ကအ် ကဵုလဝ်တုဲဂှ်လေဝ် ဟီုဂးအိုတ်ရ၊ ဆ္ဂး ကဵုလဝ်တုဲရဂှ် အသိၚ်သြန်ဖောဝ်ဂှ် ခိုဟ်မှဟွံခိုဟ်ကၠုၚ်ပုဟ်လေဝ်၊ တိုန်မှဟွံတိုန်ကၠုၚ်ဂှ်တှ်ေ ၚုဟ်မးသြန်လေဝ် တိုန်ကၠုၚ်ဟွံမွဲတုဲ ဣဏံလေဝ် ဒှ်ဒၟံၚ်ညံၚ်ကဵုဟွံတၟေၚ်စအှ်ေရ၊ သွက်တၠကမၠောန်ကၠေၚ်စက် ပိုယ်တံကီု သွက်ၚုဟ်ကၠေၚ်စက်ဏံ ဂွံစှ်ေ ဒှ်အထံက်အပၚ်ကီုဟီုဂှ် ဟွံမွဲကၠုၚ်ရ၊ ဒဵုကဵုအခိၚ်လၟုဟ်ဂှ် ဟွံမွဲကၠုၚ်ဏီရ” သာ်ဝွံ သ္ဂးရ။
ၚုဟ်ကၠေၚ်စက်ဝွံ အခိၚ်လၟုဟ် ကၠေၚ်ဒဳဇြေဝ် မွဲလဳတာဂှ် ဆက်ဂွံဒၟံၚ်ၚုဟ် (၃၁၀၀) ပြၚ် နွံဒၟံၚ်တုဲ ကၠေၚ်ဓာတ် (၉၅) မွဲလဳတာဂှ်လေဝ် ဆက်နွံဒၟံၚ် ပ္ဍဲပွဳပွူ (၂၅၀၀) ဒ္ကေဝ်ရ၊ ဆ္ဂး ပ္ဍဲဗွဝ်ဖျာကၠေၚ်တိဒမျိုၚ်ဂၠးတိဂှ် မွဲစေဝ်ဂှ် နူဒဝ်ဠာ (၁၂၀) ၚုဟ်စှ်ေဒၟံၚ် စဵုကဵု (၈၀) အဆက်က်ရ။
တၠကမၠောန်ကၠေၚ်စက်မွဲတၠဂှ်လေဝ် ကံၚ်ဇြဳပၞာန်ဂှ် ထံက်ပၚ်ကဵု ဒဝ်ဠာ (၂၀၀) ပြကောဋိကိုဋ်ရောၚ် လလောၚ်ပ္တိတ်လဝ်ကီုလေဝ် ထံက်ပၚ်ကဵုလဝ် နဗီုပြၚ်လဵုဟီုဂှ် လးထ္ၜးကဵုလဝ် ဟွံမွဲတုဲ ယဝ်ရထံက်ပၚ်ကဵုလဝ်မၞိဟ် မစုက်လုက်ကဵု ဍေံတံရဟီုမ္ဂး သွက်ကၠေၚ်စက် ၚုဟ်ဂွံစှ်ေဂှ် ဟွံဒှ်အထံက်အပၚ်ပုဟ်ဂှ် ဟီုရ။
“ယဝ်ရဒှ်ထံက်ပၚ်လဝ် မၞိဟ်ပၠောပ်ပ္တိုန် အပ္ဍဲဗွဝ်ဖျာတံ ဗိုန်န်ဗတ်တ်ဟီုမ္ဂး ၚုဟ်ဂှ် ဒးစှ်ေအာဏောၚ်၊ ၚုဟ်ကၠေၚ်ဍေန်လၟုဟ် စှ်ေဒၟံၚ်ဂလိုၚ်ဏံဂှ်တှ်ေလေဝ်၊ ပ္ဍဲ (သီလဝါ) ဂှ် အကာဲအရာလၟုဟ်မ္ဂး ဒးအာဒၟံၚ်ကဵု သၞောတ်အလဵုအသဳ မထိၚ်ဒက်လဝ်ဂှ်ရ၊ ပိုယ်တံဂှ် ဒးဟီုသောၚ်ၚ်မ္ဂး ဒးပ္တိုန်သွက်အရေၚ်ဂွံဂွံတံရ၊ ပ္ဍဲမွဲသတ္တာဟ ဒးပ္တိုန် (၂) အလန်၊ လ္တူနူပမာဏ လဳတာပိုယ်တံ ပ္တိုန်လဝ်ဂှ် ဍေံဂှ် ဒးဟီုသောၚ်ၚ်မ္ဂး သွက်ဆေၚ်လဳတာပိုယ်တံရ နွံပၟိက်တုဲ ပရဳမဳယာ (၄၀၀၀၀) ၊ (၉၂) (၄၀၀၀၀) ၊ (၉၅) (၄၀၀၀၀) ပိုယ်တံ ပ္တိုန်ဗီုဏံရ၊ အခါရ ဍေံကလေၚ်ဖျေံကဵုဂှ် သွက်အရၚ်ပိုယ်တံဂှ် (၉၂) ဟီုမ္ဂး ၜိုတ် (၁၁၀၀၀) ရဖျေံကဵု၊ (၉၅) မ္ဂး ဖျေံကဵုၜိုတ် (၄၀၀၀) လဳတာပြၚ်ရ၊ အကာဲအရာလၟုဟ်ဂှ် ၜတ်ကၞာတ်ရံၚ်ကဵု ၚုဟ်ဒဝ်ဠာမ္ၚးတေံတုဲ အဏံ (၂၁၀၀) ကဵု ဗွဝ်ဖျာမ္ၚး (၃၄၉၀) ဂှ် တၞဟ်ခြာဒၟံၚ် (၁၃၉၀) ဟီုတှ်ေ ရာန်နၚ် နကဵုၚုဟ်မ္ၚးတေံတုဲ ဒးပၠောပ်ဒၟံၚ်ကၠေၚ်ဂှ်တုဲ ၜိုတ်ထေၚ်ဂှ် ဟွံစှ်ေပုဟ်၊ သြန်ဂှ် ကြံၚ်မ္ၚိုဟ်( ခိုဟ်) ဒၟံၚ်ညိ” သာ်ဝွံ သ္ဂးရ။
ဟိုတ်ဂှ်ရ ကၠေၚ်စက်ဂွံစှ်ေဟီုမ္ဂး နကဵုကံၚ်ဇြဳပၞာန် ဒဝ်ဠာ (၂၀၀) ပြကောဋိကိုဋ်ပြၚ် မထံက်ပၚ်ကဵုဂှ် ဒးလးထ္ၜး ဗွဲမသောၚ်ကလးညာတ်ကေတ်မာန်ဂှ် နွံပၟိက်တုဲ သွက်ဂွံသွံကဵုဒဝ်ဠာ အတိုၚ်နှေန်မစၟတ်လဝ်ကဵုဂှ် နွံပၟိက်ရောၚ် ညးပၠောပ်ပ္တိုန်သွံတြးဒၟံၚ် ကၠေၚ်စက်တံ သ္ဂးအိုတ်ရ။
အခိၚ်လၟုဟ် တၠကမၠောန်ကၠေၚ်စက်တံဝွံ လ္ပာ်ကံၚ်ဇြဳပၞာန် ထိၚ်ဒက်လဝ် ဗွဝ်ဖျာကၠေၚ်စက်ဂှ်တုဲ ၜိုတ်နွံပၟိက် ဟွံသွံကဵုဂှ်ရ ဒးရာန်ဒၟံၚ် နကဵုသၞောတ်ပါ်ပရအ် အရၚ်တံရ။
ၚုဟ်ကၠေၚ်စက်ဝွံ ကၠာဒပ်ပၞာန်ဂွိုအ်သီအဝဵုဂှ် မွဲလဳတာ မၞုံကၠုၚ်လဝ် နူပွဳပွူ (၆၀၀) ဒ္ကေဝ်ဓဝ်ဂှ် ဗွဲကြဴဒပ်ပၞာန်သီအဝဵုတုဲဂှ် ၚုဟ်သၠုၚ်တိုန်ကၠုၚ် (၄) ဆပြၚ်တုဲ ခြာဟွံလအ်ဟီုဂွံ ဒးဂဗဒၟံၚ်ကဵု ကၠေၚ်စက်ပိုတ်အိုတ်တံရ။
ပရိုၚ်−သြၚ်လောန်တိုၚ်(မ်)