နေဗျဳဒဝ်၊ မေ ၂၅
အပ္ဍဲပၞာန်သီအဝဵုဏံ ဟိုတ်နူပၞာန်ထ္ပက်အလုံဍုၚ်မွဲတုဲ ဒးဗလလဝ်တဲ တိဍာ်အုပ်ဓလီု တၟာဂလိုၚ်ကီုလေဝ် ဂါံကၠုၚ်ဒၟံၚ်လဂါံဇိုၚ် လ္ပာ်လၟေၚ်ကမၠောန်ပေါဲရုဲမာဲ မဒှ်တၚ်ရန်တၟံကံၚ်ဇြဳပၞာန်သၠုၚ်အိုတ် မလေပ်ဟီုဂးတြးဝါဒဂှ် သိုက်က်ရ။
ပ္ဍဲကောံဓရီုပ္ညဳပ္ညပ်ကမၠောန် စပ်ကဵုစရၚ်လၟိဟ်မၞိဟ် ကေုာံ လၟေၚ်ကမၠောန်ပေါဲရုဲမာဲ မကၠောန်ဗဒှ်လဝ် ပ္ဍဲဂိတုမေ ၂၃ ဂှ် ဥက္ကဌကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက် ဥူကိုဝ်ဝ်ဂှ် နကဵုကမ္မယှေန် ညံၚ်စရၚ်မာဲဂွံဍာံပြ ရေၚ်တၠုၚ်ဒၟံၚ်အဆံၚ်ၚ်ရောၚ် ဟီုဏာလဝ်ရ။
လစှ်ေဂကောံကမ္မယှေန် ကဆံၚ်ပွိုၚ်ဍုၚ်၊ ကဆံၚ်ခရိုၚ်၊ ကဆံၚ်ရးဒေသ ကေုာံ တွဵုရးတံဂှ် ပံက်တန်ဗ္တောန်သၞောတ်ကောပ်ကာဲစရၚ်တၠဆန္ဒမာဲ ကုညးဒုၚ်ကာတံတုဲ မဒှ်တုဲ အတိုၚ်ဗီုပြၚ် ကၠောန်ဗဒှ်အာပေါဲရုဲမာဲဂှ် စမ်ၜတ်ရေၚ်တၠုၚ်လဝ် ပန်ဝါတုဲယျဂှ် သ္ဂးရ။
အတိုၚ်စၟတ်သမ္တီ ဂကောံလ္ၚတ်ပဋိပက္ခ ကေုာံ ကေၚ်ကာဗၟာ BACS ဂှ်မ္ဂး ကံၚ်ဇြဳပၞာန်ဝွံ အပ္ဍဲဂိတုဨပရဴတုဲကၠုၚ်တေံ ပရေၚ်ချဳဒရာၚ်စပ်ကဵုပေါဲရုဲမာဲ (၇၁) ဝါ နွံလဝ်တုဲ ပ္ဍဲကဵုဏံ ပရေၚ်ချဳဒရာၚ်ကိုန်စဳမာန်ကၠအ်ပ္ကဴ စှ်ေကၠောန်ကဵု တၞးကာဒ်ကောန်ဍုၚ်တံဂှ် ကၠောန်လဝ် စဵုကဵု ၃၂ ဝါ ဂၠိုၚ်အိုတ်ရ။
သ္အာၚ်နူဂှ်ပၠန် ပွမစမ်ၜတ်ကဵုမာဲ နကဵုစက်အဳလက်ထရဝ်နေတ်တံဂှ် ၁၃ ဝါ၊ ပွမကံက်စရၚ်စပ်ကဵုဇဳဝတံဂှ် ၁၂ ဝါ၊ ပရေၚ်ရေၚ်တၠုၚ်စပ်ကဵုစရၚ်သ္ဂါဗ္တံတံဂှ် ၁၃ ဝါ နွံလဝ်တုဲ ပွမကော်တိန်ဒါ စပ်ကဵုစရၚ်မာဲဂှ်ကဵု ပွမကော်ညးယိုက်ဝန်တၟိတၟိတံလေဝ် နွံလဝ်ရ။
ပရေၚ်ချဳဒရာၚ်စပ်ကဵုပေါဲရုဲမာဲဂှ် ပ္ဍဲကချေၚ်၊ ကရေၚ် ကေုာံ ကရေၚ်ဍာဲတံဂှ် ဒၞါဲလ္တူဍုၚ် တိဍာ်အုပ်ဓလီုကံၚ်ဇြဳပၞာန်တံဂှ်ရ မွဲဒၞါဲမွဲဝါ ဂွံကၠောန်လဝ်တုဲ ပ္ဍဲရးတၞၚ်သဳကဵု ရးသက်ကိုၚ်တံဂှ် မွဲရး ၃ ဝါ၊ ပ္ဍဲရးဨရာဝတဳဂှ် ကၠောန်လဝ် ၂၀ ဝါ ဂၠိုၚ်အိုတ်ရောၚ် ဂွံဆဵုကေတ် ပ္ဍဲစၟတ်သမ္တီ BACS ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာ ဒံက်တာလှကျဝ်ဇြဝ်ဂှ် နကဵုကံၚ်ဇြဳပၞာန် ကၠောန်ပေါဲရုဲမာဲမာန်ဟွံသေၚ်တုဲ ဒဒှ်ရကမၠောန်အလဵုအသဳ ဂေတ်ဂြိပ်ဒၟံၚ်လၟေၚ်ၚ်ဟီုဂှ် သွက်ဂွံထ္ၜးစတုဲ ကၠောန်ၜိုတ်ဒၟံၚ် လၟေၚ်ကမၠောန်ပေါဲရုဲမာဲတံရောၚ် သ္ၚဳဂၠိပ်လဝ်ရ။
“လညာတ်အဲဂှ်တှ်ေ ညးကၠောန်ပေါဲရုဲမာဲမာန်ဏောၚ်ဂှ် ဟွံထေၚ်ပုဟ်။ ဒဒှ်ရဍေံတံကၠောန်ဒၟံၚ်ကလောန် နဒဒှ်အလဵုအသဳမွဲဟီုဂှ် သွက်ဂွံထ္ၜးစ တြးဝါဒဂှ် ကၠောန်ဒၟံၚ်အရာတံဏံထေၚ်ကေတ်ရ။ ပေါဲရုဲမာဲဒှ်ကၠုၚ်ဏောၚ်ဂှ် ဟွံထေၚ်ပုဟ်။ ဒပ်ပၞာန်ဂှ် အခိၚ်လဵုကေၚ်သ္ပစၟတ်သမ္တီ ကုပေါဲရုဲမာဲဂှ်ရော။ ပေါဲရုဲမာဲ အလဵုဍေံတံကၠောန်ကဵုလဝ်ဂှ်လေဝ် ၜိုန်ဂွံသွဟ်အတိုၚ်ဍေံတံမၞုံပၟိက်ဂှ်ကီုလေဝ် လက္ချန်ပလီုအာသွဟ်ဂှ် အခိၚ်ဟွံရုဲ နွံဒၟံၚ်ဏောၚ်။ ဍေံတံ ကၠောန်ကဵုဏောၚ်ဂှ် အဲဟွံထေၚ်ပုဟ်” သာ်ဝွံ သ္ဂးရ။
ဒဵုကဵုအခိၚ်လၟုဟ် ပ္ဍဲကဵုဍုၚ်တိဍာ်အုပ်ဓလီု ကံၚ်ဇြဳပၞာန် ဒးဗလးလဝ်တဲ ၅၅ ဍုၚ်ဂှ် ပ္ဍဲကချေၚ်၊ ချေၚ်၊ ကရေၚ်ဍာဲ၊ ရခေၚ် ကေုာံ ရးသေံသၟဝ်ကျာတံ ဂၠိုၚ်အိုတ်တုဲ ဂကောံရပ်လွဟ်ကောန်ဍုၚ်အရၚ်တံကဵု ဂကောံပံၚ်ကောံပၠန်ဂတးတံ သီထိၚ်ဂွံလဝ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ် စရၚ်မာဲဍိုက်ပေၚ်တုဲ ဍုၚ်ကွာန်ညိၚ်ဝတ်ဗက် ပေါဲရုဲမာဲဂှ် မွဲအခိၚ်ဓဝ်ဟွံသေၚ်ကီုလေဝ် ညံၚ်ဂွံရေၚ်တၠုၚ်အာ သ္ကုတ်ဍေံကဵုဍေံမာန်ဂှ် အပ္ဍဲဂိတုမာတ် သၞာံဏံ ဟီုပ္တိတ်လဝ်ရ။
တုဲကၠုၚ်ဂိတုဨပရဴ ၂၆ တေံဂှ်လေဝ် ဥက္ကဌ ကမ္မယှေန်ပေါဲရုဲမာဲကဵု အမာတ်ကလုတ်ဍုၚ်ကြုက် စပ်ကဵုဍုၚ်ဗၟာတံ ဆဵုဂဗလဝ်တုဲ ပ္ဍဲကမၠောန်စပ်ကဵုပေါဲရုဲမာဲတံဂှ် အကာအရာၜါဍုၚ်ပံၚ်တောဲရေၚ်တၠုၚ်မာန်တံဂှ် သဳကၠဳလဝ်ရောၚ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ရ။
မွဲလ္ပာ်ဂှ်ပၠန် အခေါၚ်ပ္တိုန်စရၚ်ဗော်ပရေၚ်ဍုၚ်ကွာန်တံဂှ် ကမ္မယှေန်ပေါဲရုဲမာဲကံၚ်ဇြဳပၞာန် ကဵုလဝ်အခေါၚ် စဵုကဵု ၄၉ ဗော်ကီုလေဝ် ဗော်ပရေၚ်ဍုၚ်ကွာန်ကောန်ဍုၚ်အရၚ် ဂွံယၟုလ္ၚဵုတံဂှ်တှ်ေ ဒဵုကဵုအခိၚ်လၟုဟ် ဟွံဂွံကဵုလဝ်အခေါၚ်ပ္တိုန်စရၚ်ဏီရ။
ပ္ဍဲဗော်ပရေၚ်ဍုၚ်ကွာန်ကောန်ဍုၚ်အရၚ် အာတ်ပ္တိုန်လဝ် သွက်အခေါၚ်ပ္တိုန်စရၚ်ဗော် ပ္ဍဲကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက် ပွိုၚ်မွဲသၞာံဂှ် ဗော်ကောန်ဂကူရခေၚ်၊ ဗော်ညဳသၟဟ်မန်၊ ဗော်ဇာဇၞိက်ကောန်ဂကူကချေၚ်၊ ဗော်ဂအုပ်ဂကောံ ဒဳမဝ်ကရေဇြဳ ဇိုဝ်မဳတံ ပါလုပ်ရ။
နာဲတာန်ယှိုဲ ညးမၞုံအခေါၚ်ဟီုဂး ဗော်ညဳသၟဟ်မန်ဂှ် မူဟိုတ်ဟွံဖျေံကဵုအခေါၚ်ပ္တိုန်စရၚ် ဗော်ညးတံဟီုဂှ် လ္ပာ်ကမ္မယှေန်ပေါဲရုဲမာဲ ကဵုကၠုၚ်ပရိုၚ်ဟွံမွဲဂှ်ရ မုမှတီကေတ်ဟွံမာန်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္တိုန် (အခေါၚ်ပ္တိုန်စရၚ်ဗော်) ဂှ် လ္ပာ်ပိုယ်ရဏောၚ်၊ ဟွံဖျေံကဵုဂှ်တှ်ေ လ္ပာ်ဍေံတံ (UEC) ရ။ မူဟိုတ် ဟွံဖျေံကဵုရောဟီုဂှ် ပိုယ်တံ မုမှတီကေတ်ဟွံမာန်ပုဟ်။ ဍေံတံလေဝ် မူဟိုတ်ဟွံဖျေံကဵုရောဟီုဂှ် ဟွံကလေၚ်ပရိုၚ်ပုဟ်။ မုလေဝ် ဟွံဟီုဏီပုဟ်။ စိုပ်အခိၚ်တှ်ေ ဍေံတံ မိက်ဂွံဖျေံလေဝ် ဖျေံဏောၚ်၊ ဟွံဖျေံကဵုတှ်ေလေဝ် ဍေံတံကဵုပရိုၚ်ဏောၚ်။ ပလီုကၠေံမ္ဂး ဒဒှ်ရပလီုဂှ် ကဵုပရိုၚ်ဏောၚ်။ ညအ်ဂှ် ပိုယ်တံ မုဟွံတီဏီပုဟ်” သာ်ဝွံ သ္ဂးရ။
အခိၚ်လၟုဟ် ကမ္မယှေန်ပေါဲရုဲမာဲဝွံ စရၚ်လၟိဟ်မၞိဟ်ပေၚ်အာယုက် ၁၈ တုဲ မပလံၚ်ဗစိုပ်နၚ် နူကဵုစရၚ်ဗလးတိတံဂှ် ရပ်စပ်သၞောတ်ကောပ်ကာဲစရၚ်တၠဆန္ဒမာဲ ကဆံၚ်ပွိုၚ်ဍုၚ်ကဵု ကဆံၚ်ဗဟဵုတုဲ ပွိုၚ်ဍုၚ်ညးကဵုညး စုတ်စရၚ်ကီု၊ ပါ်ရုၚ်မာဲကီု ကမၠောန်တံဏံဂှ် ရေၚ်တၠုၚ်ဒၟံၚ်ရ။
ဆ္ဂး စနူအခိၚ်သီအဝဵုတုဲ ဒဵုကဵုအခိၚ်လၟုဟ် ဂလာန်ကံၚ်ဇြဳပၞာန် ဟီုကြီုဒၟံၚ်တွဵု ကၠောန်ပေါဲရုဲမာဲဏောၚ်ဟီုဂှ်ဝွံ လဟီုသၟးရနွံတုဲ အခိၚ်အခါဂှ်တှ်ေ ကဵုကတိဟွံမာန်ဏီရ။
ညးခါတ်အကာဲပရေၚ်ဍုၚ်ကွာန်တံဂှ် ပ္ဍဲအကာဲအရာဗွိုၚ်ပၞာန် သၠဲလးကၠုၚ်ဂှ် ဂွံကၠောန်ဗဒှ်ပေါဲရုဲမာဲမာန် သ္ၚောဲဒၟံၚ်ဏီဏောၚ်တုဲ ဗော်ပရေၚ်ဍုၚ်ကွာန်တံဂှ်လေဝ် ဂွံဆက်ဒတူလိုၚ် သၟဝ်ကံၚ်ဇြဳပၞာန် ထိၚ်ဒဝ်သၞောတ်ဗ္ၜတ်လဝ်ဂှ်ရဂှ် သ္ဘဴဒးဂ္စါန်ပ္တိတ်အာဇြဟတ်နွံဏောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI