ဗြဝတဳ၊ မေ ၃၁
ဒပ်ပံၚ်ကောံ KNLA KNDO PDF ဆက်ထ္ပက်လဝ်ပၞာန် ကုဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲဒေသဝဝ်လေ ခရိုၚ်ဗြဝတဳ တွဵုရးကရေၚ်ဂှ်တုဲ အပ္ဍဲပွိုၚ်ၜါတ္ၚဲဂှ် ဒပ်ပံၚ်ကောံ သီဂွံလဝ် ဗ္ဒိုပ်ဒပ်ကံၚ်ဇြဳပၞာန်ပိရောၚ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်(ဘုရင့်နောင်) ဗ္ဒိုပ်ဒပ်ကံၚ်ဇြဳပၞာန် မၞုံပ္ဍဲဒေသဝဝ်လေ ဗ္ဒါဲပယျဵုသေံဂှ် ပ္ဍဲဂိတုမေ ၃၀ အခိၚ်နူဂယး ၜိုတ် ၄ နာဍဳဂှ် ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်မဟာ ၆ ဒပ်ပၞာန်ဗၠးၜးကောန်ဂကူကရေၚ် KNLA တအ် သီဂွံလဝ်ရောၚ် တမ်ရိုဟ်ပရိုၚ်ပယျဵုဂမၠိုၚ် သ္ဂးရ။
အပ္ဍဲပေါဲဗ္တိုက်ဗ္ဒိုပ်(ဘုရင့်နောင်) ဂှ် ကောန်ဒပ်ကံၚ်ဇြဳပၞာန်ဂမၠိုၚ် ဂြိပ်တိတ်အာလဝ်တုဲ ဟိုတ်နူပေါဲဗ္တိုက်ဂှ်တုဲ ညးဍုၚ်ကွာန်ဒေသ ၅၀၀ ပြၚ် ဂြိပ်စိုပ်ကၠုၚ်ပ္ဍဲဍုၚ်သေံတုဲ ညးတာလျိုၚ်ဒပ်ပၞာန်သေံတအ် ဖျေံလဝ်ကဵုဒၞါဲတုဲ ကဵုလဝ်အရီုဗၚ်ပရေၚ်ဗ္စာရဏာမၞိဟ်ရောၚ် တမ်ရိုဟ်ပရိုၚ်ဏံ သ္ဂးရ။
ပ္ဍဲဂိတုမေ ၃၀ အခိၚ်နူဂယး ၜိုတ် ၁၀ နာဍဳဂှ်လေဝ် ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်မဟာ ၆ KNLA သီဂွံလဝ် ဗ္ဒိုပ်မဝ်ခဳ ဒပ်ကံၚ်ဇြဳပၞာန် နွံဗ္ဒါဲပယျဵုသေံ ဒေသဝဝ်လေဂှ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ဂြိပ်တိတ်အာလဝ်ရ။
သ္အာၚ်နူဂှ်ပၠန် ပ္ဍဲဂိတုမေ ၂၉ ဂှ် ဒပ်ပံၚ်ကောံပၠန်ဂတး သၟဝ်သ္ကိုပ်သ္က ဒပ်မဟာ ၆ KNLA သီဂွံလဝ် ဗ္ဒိုပ်ယှိုဲအေမျာၚ် နွံဗ္ဒါဲဗ္ဒိုပ်( ဥကရစ်ထ) ဒပ်ကံၚ်ဇြဳပၞာန် လ္တူဂၠံၚ်ကွဳစက် ဝဝ်လေ−ဗြဝတဳဂှ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ဂြိပ်တိတ်အာလဝ်ရ။
ဗ္ဒိုပ်ကၚ်စဵုဒၞါယှိုဲအေမျာၚ် နူဒပ်ပံၚ်ကောံပၠန်ဂတး ဒပ်မဟာ ၆ KNLA တအ် မသီဂွံလဝ်ဂှ်ဝွံ နွံဒၟံၚ် ပ္ဍဲကွာန်(ဆုံဆည်းမြိုၚ်) ဌာန်ဂအုပ်ပၞာန်ဗဟဵု DKBA ကဵု ကွာန်( ဥကရစ်ထ) တုဲ သီုဒှ်ဗ္ဒိုပ်ကၚ်စဵုဒၞါ ဗ္ဒိုပ်ဇၞော် (ဥကရစ်ထ) ရ။
ဒပ်ပံၚ်ကောံပၠန်ဂတး ဒပ်မဟာ ၆ KNLA ဝွံ သီဂွံလဝ် ဗ္ဒိုပ်(ဘလယ်ဒို) ကဵု ဗ္ဒိုပ် (ကနဲလေး) တုဲ ဗ္ဒိုပ်မသှ်ေသၟေဟ်ဒၟံၚ်ဂမၠိုၚ် ပါလုပ်သီုကဵုဗ္ဒိုပ်(သေဘောဘိုး)၊ ဗ္ဒိုပ်( ဥကရစ်ထ၊ ထီးကပလယ်၊ ဝေါ်လေဗျူဟာ) တံဂှ် ဗိုၚ်ကၟာတ်လဒဵုဗ္တိုက်ဒၟံၚ်ရောၚ် ဂွံတီကေတ်ရ။
အပ္ဍဲပေါဲဗ္တိုက်ဒှ်လဝ် ပ္ဍဲဒေသဝဝ်လေဂှ် ဒးဆောံလေၚ်လဝ်ဗ္ဒိုပ်တုဲ ဒပ်ကံၚ်ဇြဳပၞာန် မဒးဂိလဝ်ဂှ်ဝွံ ထောံမံၚ်မခတိုဟ် နကဵုက္ၜၚ်ကျာ အပ္ဍဲကွာန်တုဲ ညးဍုၚ်ကွာန်လ္ၚဵု ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်−KNU