မတ်မလီု၊ မေ ၃၁
ပ္ဍဲတွဵုရးဍုၚ်မန် လ္တူဍုၚ်မတ်မလီုဂှ် အပ္ဍဲဂိတုဏံ ဒၟါနူဟိုတ်နာနာသာ်တုဲ မၞိဟ်တြုံတြုံ၊ မၞိဟ်ဗြဴဗြဴသၟးဟွံက သီုကောန်ၚာ်သၟတ်တအ်လေဝ် ကၠေံဂၠိုၚ်ကၠုၚ်ဒၟံၚ်ဂှ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးမကၠေံအာဂမၠိုၚ်ဝွံ ကၠေံအာ နကဵုဗီုပြၚ် ဒးဒုၚ်တံၚ်ရပ်၊ ကၠေံအာအခိၚ်အာအကြာဂၠံၚ်၊ မၞိဟ်ပလုၚ်ကော်တုဲ ကၠေံအာ၊ ထေဲကဵုမိမညးဇၞော်ပ္ဍဲသ္ၚိတုဲ ကၠေံအာတံလေဝ် နွံကၠုၚ်လဝ်ရ။
မၞိဟ်မကၠေံခၞၚ်ဒၟံၚ် ပ္ဍဲဒေသလ္ၚဵုတံဂှ်တှ်ေ နဗီုပြၚ်ညးတံညးတံဂှ် ကလေၚ်ဆဵုဒၟံၚ်နွံတုဲ ပ္ဍဲလၟေၚ်ဒဒှ်လ္ၚဵုတံဂှ်တှ်ေ ပရိုၚ်ကၠေံအာတုဲ ဂွံကလေၚ်ဆဵုကေတ် သီုဟၟဲကဵုလမျီုဂှ်လေဝ် နွံဒၟံၚ်ရ။
ညးဒေသလ္တူဍုၚ်မတ်မလီုမွဲတၠဂှ်တှ်ေ ဗွဲကြဴဏံ မၞိဟ်ကၠေံဒၟံၚ် အဆက်က်တုဲ ကၠေံခၞၚ်ဒၟံၚ် နကဵုအကာဲအရာ မဆေၚ်စပ်ကဵုဂဗုတ်တအ်လေဝ် နွံကၠုၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂဗုတ်မၞိဟ်ကၠေံတံဂှ်တှ်ေ မွဲဟူဏံ ဒှ်ဒၟံၚ်အဆက်က်။ လ္ၚဵုဂှ်ပၠန်လေဝ် သဂံၚ်လဝ်စိုတ်တုဲ တိတ်ကၠောန်ကလောန်ဏောၚ် မုဏောၚ် နကဵုတၚ်ရန်တၟံဏံ တိတ်ကၠုၚ်တုဲ ကၠေံအာအကြာဂၠံၚ်သာ်ဏံ၊ ညးဒဳတက္ကသဳမွဲတၠမ္ဂး သီုမၞိဟ် သီုကွဳစက်ဂှ် ဒဵုကဵုအခိၚ်လၟုဟ် အဆက်လေဝ်ဟွံဂွံ ဆဵုလေဝ်ဟွံကလေၚ်ဆဵုရ” သာ်ဝွံ သ္ဂးရ။
မၞိဟ်ကၠေံအာဗွဲမဂၠိုၚ်ဝွံ ဒှ်ဒၟံၚ်အဝဲဝုတ်ပၠိုၚ်ၚ် ဂၠိုၚ်အိုတ်ဂှ် ဂွံဆဵုကေတ်တုဲ လ္ၚဵုဂှ် ကၠေံဒၟံၚ်မွဲမွဲတၠ နွံဒၟံၚ်တုဲ လ္ၚဵုဂှ်ပၠန် ကၠေံဒၟံၚ်ကဵုဂကောံ နွံကၠုၚ်ဂှ် ဂွံဆဵုကေတ်ရောၚ် ညးဆက်ဟီုရ။
ညးတၠခန္ဓ ကောန်သ္ၚိကၟိန်ညးမွဲတၠ မကၠေံအာဂှ်တှ်ေ စပ်ကဵုမၞိဟ်ကၠေံဂှ်တုဲ ၜိုန်အာတေၚ်လဝ် ပ္ဍဲဗ္ဒိုပ်ဗၠာဲသၟိၚ်ကဵု ရုၚ်သ္ကိုပ်အုပ်ဓုပ်အရာပ်တံကီုလေဝ် ဂၠိုက်ဂၠါဲကဵုလဝ်ဟွံမွဲတုဲ ဟိုတ်နူဟွံဂွံအဆက်ဂှ်ရ ဒှ်ဒၟံၚ်ဓဝိၚ်နွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ မၞိဟ်ကၠေံတုဲ အာကဵုလဝ်ပရိုၚ် ပ္ဍဲဗ္ဒိုပ်တအ် ပ္ဍဲရုၚ်တအ် နွံရ။ ဘိုၚ်ဂၠါဲကဵုဂှ် ဟွံမွဲဏီပုဟ်။ အဆက်ဂှ် ဟွံဂွံဏီ။ ဟွံဂွံအဆက်တုဲ ဂွိၚ်ဒၟံၚ်ရ။ ဗီုလဵုဂွံကၠောန် ဂွံပဂှ်လေဝ် ဟွံတီပုဟ်” သာ်ဝွံ သ္ဂးရ။
ပ္ဍဲဒေသဂှ် မၞိဟ်ကၠေံဒၟံၚ်တုဲ ယဝ်အာတေၚ် ဇရေၚ်ကောန်ဂကောံဒပ်ဗၠာဲသၟိၚ် သၟဝ်တဲကံၚ်ဇြဳပၞာန်မ္ဂး ကေတ်လဝ်စၟတ်သမ္တီမၞိဟ်ကၠေံသၟးရတုဲ ထ္ၜးဟိုတ်ကဵုပရေၚ်ဂီုကၠီုတုဲ ရီုဗၚ်ဂၠိုက်ဂၠါဲကဵု နတဲဏံဟွံမွဲပုဟ်ဂှ် ဂွံတီကေတ်ရ။
အပ္ဍဲဍုၚ်ဂှ် ကံၚ်ဇြဳပၞာန် စုတ်လဝ် CCTV စၟအ်ဒၞါဲကီုလေဝ် ယဝ်မၞိဟ်ကၠေံမ္ဂး ညးဍုၚ်ကွာန်အပ္ဍဲဒေသဂမၠိုၚ်ဝွံ ဗီုဇကုကဵုဇကုရ ဒးဂၠါဲဒၟံၚ်တုဲ ဒှ်ဒၟံၚ်ဒဒိုက်ရောၚ် ညးဒေသဂမၠိုၚ် သ္ဂးအိုတ်ရ။
ပ္ဍဲဍုၚ်မတ်မလီုဂှ် အပ္ဍဲဂိတုဏံ မၞိဟ်ကၠေံအာ ဟွံအောန်နူမသုန်တၠ နွံဒၟံၚ်တုဲ ပၞောဝ်ကဵုဏံ အကြာတံဏံဂှ် သၟတ်ဗြဴအာယုက် ၁၃ သၞာံမွဲတၠ ကၠေံအာတုဲ ဂွံကလေၚ်ဆဵုကေတ် နဗီုပြၚ်ဟၟဲကဵုလမျီုဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Screen Grab