လံၚ်လုၚ်၊ မေ ၃၁
ပ္ဍဲရးတၞၚ်သဳ လ္တူဍုၚ်လံၚ်လုၚ်ကဵု ဗ္ဒါဲဇိုၚ်ဒဵုလက်ခတ်ဂှ် ပေါဲဗ္တိုက်ၜါလ္ပာ် ဒှ်ဒၟံၚ်တုဲ ညးဒေသဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသလ္တူဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူဂိတုမေ ၃၀ အခိၚ်နူဂယး ၇ နာဍဳဂှ်တုဲ ဗ္ဒိုပ်ဗၠာဲသၟိၚ်၊ ရုၚ်သ္ကိုပ်အုပ်ဓုပ်ကာနာနာ၊ မွဲဒမြိပ်ဘာတန်သၠုၚ် စၟတ်(၁) လ္တူဍုၚ်လံၚ်လုၚ်ဂှ်ကဵု ဗ္ဒါဲဇိုၚ်ဒဵုလက်ခတ်ဂှ် ပေါဲဗ္တိုက်ၜါလ္ပာ် ဒှ်ဒၟံၚ်ရ။
ဟိုတ်နူပေါဲဗ္တိုက်ဂှ်တုဲ ညးဒေသ နူအရာပ်လ္တူဍုၚ်လံၚ်လုၚ်ကီု သီုကဵုညးဒေသ နူမသုန်ကွာန် ပါလုပ်သီုကဵုကွာန်ဗ္ဒါဲဍုၚ် မပ္တံကဵုကွာန် (စပ်ပြဲ၊ သဗျာ၊ ညှၚ်းမော်) တအ် လၟိဟ် ၂၀၀၀ ပြၚ် ဒးပါဲမံၚ်ဘဲပၞာန်ရ။
အပ္ဍဲပေါဲဗ္တိုက်ၜါလ္ပာ်ဂှ် လွဟ်ဇၞော်ဒတုံဗ္တိုဟ်ထ္ကးဒၟံၚ် အပ္ဍဲအရာပ်မၞိဟ်ဒၟံၚ်နွံတုဲ အကာဲအရာညးဒေသတအ်ကဵု ပရေၚ်ဇီုကပိုက်ဒးၜါလ္ပာ် သောဲသောဲဗြောဲဗြောဲဂှ် ဟွံဂွံတီကေတ်ဏီရ။
စပ်ကဵုအကာဲအရာပေါဲဗ္တိုက်တုဲ နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ဇရေၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ကီုလေဝ် လလောၚ်ပ္တိတ်ကဵု အကာဲအရာဗွဲလစှ်ေဏောၚ်ဂှ် သ္ဂးရ။
ပ္ဍဲဂိတုမေ ၂၁ တုဲကၠုၚ်တေံဂှ်လေဝ် ဒပ်ပၠန်ဂတးဂမၠိုၚ် လုပ်စိုပ်ဗ္တိုက်လဝ် ရုၚ်(စရဖ) လ္တူဍုၚ်လံၚ်လုၚ်တုဲ ကောန်ဒပ်ကံၚ်ဇြဳပၞာန် ၜါတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ