မတ်မလီု၊ မေ ၃၁
ကြဴနူတိချဳတုဲဂှ် ကံၚ်ဇြဳပၞာန် မသၠုၚ်ပ္တိုန်အသိၚ် ဗ္တိုက်ကၠုၚ်ဒၟံၚ်ကောန်အရာပ် ကဵု စမြိုၚ်ဆေၚ်စပ်ကဵုညးဍုၚ်ကွာန်ဂမၠိုၚ် နူကဵုပၞာန်ကျာဂှ် ဟီုကၠုၚ် ဂကောံရပ်လွဟ်ကောန်ဍုၚ်အရၚ်ဂမၠိုၚ် သွက်ဂွံရှ်ေသှ်ေ လ္တူပရေၚ်ဒေါအ်ပန်ပှော်ရ။
ရန်ကဵုသ္ဂောံထံက်ပၚ်ရီုဗၚ် ကုညးဒးဘဲတိချဳ ကေုာံ သွက်ဂွံရေၚ်တၠုၚ်ကမၠောန်ကလေၚ်ဖျေံဒၞါဲဝါဲတုဲ ပ္ဍဲကဵုသ္ဘၚ်ပအပ်ကဵုမဒါန် တၠဒါန်နူအပ္ဍဲဍုၚ်မ္ၚးဍုၚ် အလန်ဒုတိယ မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမေ ၂၉ ဂှ် ဟီုဏာလဝ်ရ။
အခိၚ်လၟုဟ် ရေၚ်တၠုၚ်ဒၟံၚ် ကမၠောန်ကလေၚ်ဖျေံဒၞါဲဝါဲ ကေုာံ ပရေၚ်ၚးတး အရာမလီုလာ်ဇီုကပိုက်ဒးလဝ် ဟိုတ်နူဘဲတိချဳဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုရ။
ဟိုတ်ဂှ်ရ ဒၟါနူဒှ်အခိၚ်ကာလရေၚ်တၠုၚ်ဒၟံၚ် ကမၠောန်ကလေၚ်ဖျေံဒၞါဲဝါဲ နကဵုအသိၚ်အလိုန်ဂှ်တုဲ နွံပၟိက်ကဵုပရေၚ်ညိၚ်ဝတ်ၜိုဟ်သြိုဟ်ဂှ်ရ နကဵုဒပ်ပၞာန် စနူဂိတုဨပရဴ ၂ တုဲ စဵုကဵုဂိတုမေအိုတ်ဂှ် ဒေါအ်လဝ်ပန်ပှော်ယာယဳရောၚ် သ္ဂးရ။
ဟိုတ်ဂှ်ရ ရန်တၟံကဵုဒတုဲဖဵုညးဍုၚ်ကွာန် ကေုာံ ကၟိန်ဍုၚ်တုဲ နကဵုညးမဆေၚ်စပ်ဂမၠိုၚ် ကေုာံ ဂကောံရပ်လွဟ်ကောန်ဍုၚ်အရၚ်ရပ်လွဟ်ဂမၠိုၚ် စပ်ကဵုဒေါအ်လဝ်ပန်ပှော် ဗွဲယာယဳဂှ်တုဲ ချပ်ဂၞန်ဇြိုဟ်ဟ်နက်က်တုဲ သွက်ဂွံဒ္ဂေတ်ဗက်ကဵုအိုတ်ဂှ် က္ဍိုပ်သ္ကိုပ်ပၞာန် ဖ္တိုက်ဖ္အောဝ်လဝ်ရ။
စပ်ကဵုပရေၚ်ဏံတုဲ နူကဵုသြၚ်လောန်တိုၚ်(မ်) ကေတ်လဝ်အဆက် ကုဗော်သွးကောန်ဂကူကရေၚ် KNU ၊ ဒပ်ပၞာန်ဗၠးၜးကချေၚ် KIA ၊ ဒပ်ပၞာန်ရခေၚ် AA ကဵု ဒပ်တအာၚ် TNLA မဒှ်ဂကောံ ဒှ်ဒၟံၚ်ပေါဲဗ္တိုက် ကုကံၚ်ဇြဳပၞာန်တံဂှ်ကီုလေဝ် ဟွံကလေၚ်လဝ်ပရိုၚ်ရ။
နာဲအဲမန် ပရိုဝ်ဂရာမ်ဒါရိုက်တာ ဌာန်သ္ဇိုၚ်အခေါၚ်အရာမၞိဟ်ဍုၚ်မန် ဂှ် ပရေၚ်ဒေါအ်ပန်ပှော်ဝွံ ၜိုန်ဒ္ဂေတ်ပဋိပတ် မ္ဒးဒဂေတ်ဗက်ဂမၠိုၚ် ပၟိက်ဇၞော်ကီုလေဝ် ဒပ်ပၞာန်ဂှ်တှ်ေ ကလိလောန်ဒၟံၚ် အမှုရာဇဝတ်ပၞာန် လ္တူဂကူမၞိဟ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပရေၚ်ဒေါအ်ပန်ပှော် ပိုယ်တံတီလဝ်ဂှ်တှ်ေ နွံပၟိက်ကဵုဒ္ဂေတ်၊ စေဝ်ပၞောန်၊ တၚ်တုပ်စိုတ်၊ မူတံဏောၚ်။ ဇကုဖျေံလဝ်အရာတံဏံတုဲ လလောၚ်တြးလဝ်တုဲယျမ္ဂး ဂွံဒ္ဂေတ်ဗက်ဒ္ဂေတ်ပဋိပတ် ဂွံတုပ်စိုတ် ကု framework တံဏံဂှ် ဗွဲတၟေၚ် အတိုၚ်ကဵုလဝ်ကတိ သွက်ဂွံဒ္ဂေတ်ဗက်ရေၚ်တၠုၚ်ဟီုဂှ် ပၟိက်ဇၞော်ကွေံကွေံဏောၚ်။ ဂကောံပၞာန်ဂှ်တှ်ေ ဟွံကၠောန်လဝ် အရာတံဏံသၟးဟွံက အရိုဟ်တ္ၚဲ ကလိလောန်ဒၟံၚ် War Crime, Criminal Humanity ဂှ် ပြာကတ်ဒၟံၚ်ရ” သာ်ဝွံ သ္ဂးရ။
ပ္ဍဲဂိတုမာတ် ၂၈ တေံ ကြဴနူတိချဳအာလဝ် ဇၞော်ကဵုဇြဟတ် ပ္ဍဲဍုၚ်ဗၟာသ္ကုတ်လဒေါဝ်တုဲဂှ် နူဂိတုဨပရဴ ၂ စဵုကဵုဂိတုမေ ၃၁ ဂှ် လလောၚ်တြးလဝ် ပရေၚ်ဒေါအ်ပန်ပှော်ဗွဲယာယဳ ပိဝါရ။
ဆ္ဂး ကြဴနူတိချဳတုဲ အလုံဍုၚ်မွဲဂှ် ပရေၚ်ဗ္တိုက်ကဵုပၞာန်ကျာ နွံလဝ် ဟွံအောန်နူ ၇၄၁ ဝါတုဲ ၜိုတ် ၉၀ တၟံကၠံဂှ်ဝွံ ကြဴနူဒေါအ်ပန်ပှော် ပ္ဍဲဂိတုဨပရဴ ၂ တုဲဂှ် ဗ္တိုက်လဝ်ရောၚ် ISP-Myanmar သ္ဂးရ။
ပရေၚ်ဗ္တိုက်ကဵုပၞာန်ကျာဝွံ ရပ်စပ်စကာဒရုၚ် ကေုာံ က္ဍိုၚ်ကျာစုတ်လဝ်စက်တံ ပါလုပ်သီုကဵု က္ၜၚ်ကျာဗ္တိုက်ဂမၠိုၚ်တုဲ ပ္ဍဲဒၞါဲပရေၚ်ပၞာန်သ္ကာတ်မြဟ်ဒၟံၚ်ဂှ်ကီု သီုကဵုပ္ဍဲဍုၚ်ပ္ဍဲကွာန် ပဋိပက္ခဟွံမွဲတံဂှ် ထောံဂြာတ်မံၚ်မခတိုဟ် နူကဵုပၞာန်ကျာရ။
ပ္ဍဲအရာကၠောန်သာ်ဏံဂှ် မ္ၚးနူပွန်ပရေၚ်ပၞာန်ဂှ် အပ္ဍဲဒေသ ဒၞါဲကံၚ်ဇြဳပၞာန် ထိၚ်ဒက်ဟွံမာန်ဂှ် ဘာဗ္တောန်လိက် ကေုာံ စမြိုၚ်သာသနာ၊ ရုၚ်ဂဥုဲ၊ ကွာန်၊ အရာပ်မၞိဟ်ဒၟံၚ်တံဂှ်လေဝ် ပါလုပ်ရောၚ် တၚ်နၚ် ISP-Myanmar ထ္မံက်ထ္ၜးလဝ်ရ။
ညးလ္ၚတ်ဂမၠိုၚ်ဂှ်တှ်ေ ပရေၚ်ပန်ပှော်ကံၚ်ဇြဳပၞာန်ဝွံ ပပၞကၠောန်ထ္ၜးဒၟံၚ် ညံၚ်ဂွံဂွံမုက် ပ္ဍဲအာဇြဳယာန် နကဵုမူကမၠောန် မဆေၚ်စပ်ကဵုတၚ်သ္ဂုတ်သွာတ်မူဝါဒတၠဒါန်ဂမၠိုၚ် သွက်ဂွံဂွံအရီုဗၚ်ပရေၚ်ဗ္စာရဏာမၞိဟ်ဍုၚ်သ္အာၚ်တံဏောၚ်ဂှ် ပါ်ပါဲလဝ်ရ။
နာဲအဲမန်ဂှ်တှ်ေ လလောၚ်တြးဒေါအ်ပန်ပှော်တုဲဗက် အကြာအကာဲအရာဒှ်ဒၟံၚ်ပရေံအိုတ်ဂှ် ကံၚ်ဇြဳပၞာန် ဇၟာပ်ဂွံအခေါၚ် ကလေၚ်ပလန်ဒၟံၚ်တဲ ကုညးဍုၚ်ကွာန်တံဏောၚ်ဂှ် ညးဟီုလဝ် လညာတ်ညးရ။
“လလောၚ်တြးပရေၚ်ဒေါအ်ပန်ပှော်တုဲဗက် လ္ပာ်ညးတအ် ဝးပ္ကဝ်ကၠုၚ်ဒၟံၚ် ဂၠိုၚ်ၚ်ကဵုဝါဂှ် ဂွံဆဵုကေတ်ရ။ အကြာအကာဲအရာ ညးဍုၚ်ကွာန်ဂမၠိုၚ် ဒးဆေၚ်ဒၟံၚ်မုက်ပရေံအိုတ်ဂှ်ကဵု ဘဲတိချဳဂှ် ဇၟာပ်ဂွံအခေါၚ်အရာ ကလေၚ်ပလန်ကၠုၚ်ဒၟံၚ်တဲ ကုညးဍုၚ်ကွာန် မပူဗိုၚ်ဒၟံၚ်ပၠန်ဂတးကညၚ်တံဂှ်ဏောၚ်ဂှ် အဲညာတ်ကေတ်ရ” သာ်ဝွံ သ္ဂးရ။
အတိုၚ်စရၚ် ဌာနဝန်ဇၞော်အခေါၚ်အရာမၞိဟ် အလဵုအသဳညဳသၟဟ်ဂကူ NUG ဂှ်မ္ဂး အပ္ဍဲကဵုတၚ်လလောၚ်တြးဒေါအ်ပန်ပှော် ကံၚ်ဇြဳပၞာန်ၜါအလန်ဂှ် ဟိုတ်နူပရေၚ်ဗ္တိုက်ကဵုပၞာန်ကျာ အလုံဍုၚ်မွဲတုဲ ကောန်အရာပ် ၃၀၀ ချိုတ်အာလဝ်တုဲ ၄၅၆ တၠ ဇီုကပိုက်ကလိဂွံလဝ်ဝပ်ရ။
ယဝ်စက်ယန်မၚ်ရံၚ်ထိၚ်ဒဝ် ပရေၚ်ဗ္တိုက်ပန်ပှော် မစှ်ေကဵုသၞောတ် အာဇြဳယာန်အာက္ဍိုပ်တုဲ ဍုၚ်သ္အာၚ်ဂမၠိုၚ် ပါလုပ်ဂှ် ဟွံမွဲမ္ဂး စဵုဒၞါအာ ညးဍုၚ်ကွာန်ကောန်အရာပ်ဂမၠိုၚ် ဗွဲမစိုပ်တရဴ ဟွံမာန်ပုဟ်ဂှ် NUG ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−The Nation