ကအ်ဗိန်၊ ဂျောန် ၅
ဟိုတ်နူပေါဲဗ္တိုက်ၜါလ္ပာ်တုဲ ညးဍုၚ်ကွာန်ဒေသ နူဒေသၜဳဂြာၚ် ပယျဵုတွဵုရးကရေၚ်ကဵု တွဵုရးဍုၚ်မန် ဒးပါဲဒလေတ်လဝ် ဒၞါဲဗၠးဘဲတံဂှ် ပ္ဍဲရာသဳဘာပံက်ဏံ စဴကၠုၚ်ဌာန်ဒၟံၚ်တုဲ လုပ်စိုပ်မံၚ်စံၚ်ကၠုၚ်အိုတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကၞောတ်ဂိတုမာတ် တုဲကၠုၚ်တေံကဵု အပ္ဍဲဂိတုဨပရဴဂှ် သ္ပတမ်ကဵုပေါဲဗ္တိုက်သီဗ္ဒိုပ်ကအ်ဗိန်တုဲ အကြာဒပ်ကံၚ်ဇြဳပၞာန်ကဵု ဒပ်မဟာမိတ်ပၠန်ဂတးတံ ပေါဲဗ္တိုက်သ္ကာတ်မြဟ်လဝ် အပ္ဍဲဒေသၜဳဂြာၚ်တုဲ ညးဍုၚ်ကွာန်ဒေသ မွဲကိုဋ်ပြၚ် ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံရ။
ကြဴနူဂှ်တုဲ ဒပ်ကံၚ်ဇြဳပၞာန် ကလေၚ်ထိၚ်ဂွံလဝ် ကွာန်ဓမ္မသကဵု ကွာန်ကအ်ဗိန်တုဲ စနူကဵုဂိတုဨပရဴ သတ္တာဟလက္ကရဴအိုတ်ဂှ်တုဲ ဖ္တိုက်ဖ္အောဝ်လဝ် ညးဍုၚ်ကွာန်ပါဲဘဲပၞာန်တံ သွက်ဂွံစဴဌာန်ဒၟံၚ်အိုတ်ရ။
အခိၚ်လၟုဟ် နကဵုဗ္ၜတ်အလုံဍုၚ်မွဲ ပံက်ကၠုၚ် ဘာသ္ဇိုၚ်ပရေၚ်ပညာတံ ဘာပူဂဵု ဘာပရေၚ်ပညာခမဳသၚ်ဗ္တောန်တံဂှ်ယျတုဲ ညးဒေသ နူၜဳဂြာၚ်လ္ၚဵုတံဝွံ သွက်ပရေၚ်ပညာကောန်ဇာတ်ညးတံတုဲ စဴကၠုၚ်ဒၟံၚ်ဌာန်ဒၟံၚ်တံအိုတ်ရ။
ဆ္ဂး ကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ်ဂှ်ကဵု ကွာန်ဗ္ဒါဲဗ္ဒါဲတံဂှ် ပြဟ်ဟ်ဏံ ဘာသ္ဇိုၚ်ပရေၚ်ပညာတံ ပံက်ဟွံမာန်ဏီပုဟ်ဂှ် ကောန်ကွာန်မွဲတၠ ဟီုလဝ် သာ်ဏံရ။
“ကောန်ကွာန်ဂမၠိုၚ် စဴကၠုၚ် ၜိုတ် ၅၀ တၟံကၠံနွံယျ။ ဆ္ဂး အကာဲအရာဂွံပံက်ဘာဂှ် ဟွံမွဲဏီ။ ဘာဂှ်တှ်ေ ဒးရံၚ်အကာဲအရာဏောၚ်။ ကဵုအကာဲအရာလၟုဟ်ဏံတှ်ေ ဍေံတံ ဟွံဂံၚ်ပံက်ဏီပုဟ်။ တုဲပၠန် ဌာနသ္ကိုပ်ပရေၚ်ပညာဟီုဂှ် ကာလအကာဲအရာခိုဟ်တှ်ေ ကဵုပံက်ဏောၚ်။ ကဵုအကာဲအရာလၟုဟ်ဏံတှ်ေ လ္ပာ်ကအ်ဗိန်ဏံဂှ် ဍေံတံ ဟွံကဵုပံက်ဏီပုဟ်” သာ်ဝွံ ညးသ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဂှ် ဆက်ကေတ်လဝ်ဒၞါဲ ဖျေံလဝ်ဒပ် အပ္ဍဲကွာန်ကအ်ဗိန် အရာပ် ၉၊ ၁၀၊ ၁၁ တံ နကဵုက္ဍိုပ်လိက်ၚးတးတိဍာ်ဂှ်တုဲ ညးဍုၚ်ကွာန်ပါဲဒဴဘဲပၞာန် နူအရာပ်တံဏံ ဟွံဂံၚ်စဴကၠုၚ်ဌာန်ဒၟံၚ်အိုတ်ဏီရ။
ပ္ဍဲကွာန်ကြေဝ်ဏာဂှ် ညးဍုၚ်ကွာန်ဒေသ ပိဂအုံ မွဲဂအုံရဟေၚ် စဴကၠုၚ်ဌာန်ဒၟံၚ်အိုတ်တုဲ ပ္ဍဲဘာသ္ဇိုၚ်ပရေၚ်ပညာ ကံၚ်ဇြဳပၞာန် ထိၚ်လဝ်တံဂှ် ပအပ်ဘာတုဲ ရဲတိုန်စိုပ်ဒၟံၚ်တံလေဝ် နွံဒၟံၚ်ရောၚ် ကောန်ကွာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန် ဟိုတ်နူပရေၚ်ဗ္တိုက်ပၞာန်တိုက်၊ ပၞာန်ဍာ်၊ ပၞာန်ကျာ ကံၚ်ဇြဳပၞာန်တုဲ ပ္ဍဲကွာန်ဓမ္မသ သ္ၚိဒၟံၚ်ကောန်အရာပ် ၃၀၀ မပြၚ် ပၟတ်တူဒးဆောံလေၚ်အာဂှ် ညးဒေသသ္ၚိသှ်ေဒၟံၚ်အတိုၚ်ပကတိတြေံတံဂှ်တှ်ေ စဴကၠုၚ်ဒၟံၚ်ကွာန်အိုတ်ယျဂှ် ညးဒေသမွဲတၠ ဟီုရ။
“လၟုဟ်ဂှ် မၞိဟ်သ္ၚိနွံတံဂှ် စဴဂှ်စဴမံၚ်ယျ။ သွက်ကောန်ညးတံ ဂွံမံၚ်ဘာ သွက်ဂွံရံၚ်စံၚ် သ္ၚိညးတံတုဲ စဴဒၟံၚ်အိုတ်ယျ။ သ္ၚိသှ်ေ ဂှ်တှ်ေ ၜိုတ် ၅၀၀ ၊ ၇၀၀ ပြၚ် နွံဏောၚ်ထေၚ်ကေတ်ရ။ ရဲသ္ၚိလီုအာတံကဵု သ္ၚိပၟတ်တူအာတံဂှ် ပအပ်ဘာကောန်ညးတံ လ္တူဍုၚ်မတ်မလီုတုဲ မံၚ်ဒၟံၚ်အိုတ်ရ” သာ်ဝွံ သ္ဂးရ။
ဆ္ဂး ပ္ဍဲကွာန်ဓမ္မသ ညးဍုၚ်ကွာန်ဒေသလ္ၚဵု ကလေၚ်စဴမံၚ်ဒၟံၚ်အိုတ်ကီုလေဝ် ဟွံကလေၚ်ဒှ် အတိုၚ်အကာဲအရာပကတိဏီဂှ်ရ ဂြောဝ်ဂတာလ္ၚဵုတံဝွံ ကောန်ၚာ်အယဲမံၚ်ဘာတံဂှ် ပအပ်ဘာ လ္တူဍုၚ်တုဲ ၜိုတ်မၞိဟ်ဇၞော်ဇၞော်တံသၟးရ စဴကၠုၚ်ဒၟံၚ်ဌာန်ဒၟံၚ်တံ နွံဒၟံၚ်ရ။
အပ္ဍဲကွာန် သွက်ဂွံဂွံပၟတ်၊ ဍာ် ကေုာံ စပ်ကဵုသ္ၚိဒၟံၚ်ဒးလီုလာ်ဆောံလေၚ်အာတံဂှ်တုဲ ကၠောန်အာပရေၚ်ကလေၚ်ပ္တန်ပ္တူတံဏောၚ် လ္ပာ်ကံၚ်ဇြဳပၞာန် ဟီုဂးဒၟံၚ်ကီုလေဝ် ပြဟ်ဟ်ဏံ မုမှဟွံဂွံကၠောန်ဏီပုဟ်ဂှ် ညးဒေသကွာန်ဓမ္မသတံ ဆက်ဟီုရ။
မွဲလ္ပာ်ဂှ်ပၠန် ကွာန်မၞုံမွဲဒမြိပ် ဂၠံၚ်ကွဳစက်ရမ္မာဝတဳ မပ္တံကဵုကွာန်ကအ်သိုခ်၊ ကွာန်ကအ်ဇြဲ၊ ကွာန်ကြေဝ်ဏာ၊ ကွာန်သၚ်ကၠံ၊ ကွာန်ဓမ္မသ၊ ကွာန်ကအ်ဗိန်တံဂှ် ကောန်ဒပ်ကံၚ်ဇြဳပၞာန်တံ မွဲဒၞါဲ ဟွံအောန်နူကဵု ၅ တၠ ကေတ်လဝ်ဂီုကၠီုတုဲ စၟဳတ်သၟာန်သၟုက်ဒၟံၚ် ညးစဴကၠုၚ်ဌာန်ဒၟံၚ်တံ နွံဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ