ထဝါဲ၊ ဂျောန် ၅
ကံၚ်ဇြဳပၞာန် ဖျေံလဝ်ဒပ်မံၚ်လဝ် ပ္ဍဲကွာန် (မောင်မယ်ရှောင်) ဂၠံၚ်လုပ်ဍုၚ်ထဝါဲ ရးတၞၚ်သဳဂှ် ပွိုၚ်ၜါတ္ၚဲဂှ်ဝွံ သ္ၚိဒၟံၚ်အပ္ဍဲကွာန် ၁၀၀ ပြၚ်ဂှ် ဖံက်ကၠတ်လဝ်တုဲ ကောန်အရာပ် ၁ တၠလေဝ် ရပ်ဒက်ဏာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ်ဂိတုဂျောန် ၁ တေံ ဗ္ဒါဲကွာန်(မောင်မယ်ရှောင်) ဗိုလ်ဇၞော်လ္ပာ်ကံၚ်ဇြဳပၞာန် ဗိုလ်ဇၞော်ဇြေန်ဝေတ်အံၚ် ဒဳကၠုၚ်ကွဳစက်သ္ၚိဂှ် ဒးဒုၚ်ပန်ဂစိုတ်လဝ်တုဲ ကောန်ဒပ်ကံၚ်ဇြဳပၞာန် နူဒပ်အမၠံက်ဇဟာကဵု လ္ပာ်ဍာ်ဗု ဇြဟတ်ဗ္ဒါဲ ၁၀၀ ဂှ်ဝွံ ဖျေံလဝ်ဒပ် ပ္ဍဲကွာန်(မောင်မယ်ရှောင်) ရ။
ကြဴနူဂှ်တုဲ ကောန်ဒပ်ကံၚ်ဇြဳပၞာန်တံဝွံ မ္ၚးနူကဵုကပေါတ်ၚုဟ်မးမၞုံ နူသ္ၚိအပ္ဍဲကွာန် ၁၀၀ မပြၚ် မပ္တံကဵုထဝ်၊ သြန်၊ ဖုၚ် ကေုာံ ကပေါတ်အရပ်စပ်သ္ၚိတံသၟးဟွံက ကပေါတ်နူကဵုဆေၚ်သွံဗၞိက်နာနာတံဂှ်လေဝ် လုပ်စိုပ်ကေတ်ဏာလဝ်ရောၚ် ညးဒေသကွာန်(မောင်မယ်ရှောင်) မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သ္အာၚ်နူဂှ်ပၠန် အပ္ဍဲပွိုၚ်ၜါတ္ၚဲ ဖျေံဒပ်မံၚ်ဒၟံၚ် အပ္ဍဲကွာန်ဂှ် ရပ်ဒက်လဝ် မၞိဟ်တြုံဒေသ ၁၀ တၠတုဲ ပ္ဍဲဂိတုဂျောန် ၃ အခိၚ်နူဂယးပြဟ်ဂှ်လေဝ် ကောန်ဒပ်ကံၚ်ဇြဳပၞာန်တံဝွံ ကလေၚ်တိတ်အာနူကဵုကွာန်တုဲ မၞိဟ်တြုံဒေသ ရပ်ဒက်လဝ်တံဂှ် ကလေၚ်ဗလးကဵုလဝ် ၉ တၠရတုဲ သှ်ေမွဲတၠဂှ် စောဲစပ် PDF ဂးတုဲ ရပ်ဒက်ဏာလဝ်ရောၚ် သ္ဂးရ။
ပ္ဍဲကွာန်(မောင်မယ်ရှောင်) ဂှ် နူဂိတုဂျောန် ၁ တေံ ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော်၊ လွဟ်ဍောတ် ကြာန်န်ဂှ်တုဲ ညးဍုၚ်ကွာန်ဒေသ ကြပ်အလုံကွာန်မွဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ကွာန် (မောၚ်မယ်ရှောၚ်) ခြာနူကဵုဍုၚ်ထဝါဲ ဗၞတ် ၇ မိုၚ်ဂှ် ဗ္ဒါဲကွာန်ဂှ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ မွဲဏှမွဲဏှဟီုဂွံ လေပ်က္တဵုဒှ်ပေါဲဗ္တိုက်တုဲ ဒပ်ကံၚ်ဇြဳပၞာန် ပန်ပှော်လွဟ်ဇၞော်ကြာန်န်တံဂှ် ကၠောန်သ္ပဒၟံၚ် အရိုဟ်ဒဒှ်တ္ၚဲရ။
တုဲကၠုၚ်ဂိတုမေ ၁၃ တေံဂှ်လေဝ် သၞေဟ်ကၚ်စၟဳတ်လုပ်ဍုၚ် ကံၚ်ဇြဳပၞာန် ပ္ဍဲကဵုအရာပ် (အိမ်ရှေ့ပြင်) ပွိုၚ်ဍုၚ်ထဝါဲ ဒးဒုၚ်လုပ်စိုပ်ဗ္တိုက်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ