မတ်မလီု၊ ဂျောန် ၁
တၚ်ရန်တၟံညးဍုၚ်ကွာန် လ္တူပၠန်ဂတးရပ်လွဟ်သၞောတ်တၠအဝဵုပၞာန်ဂှ် သွက်ဂွံၚးတးထပိုတ်ရိုဟ်ကၞက်ဒပ်ပၞာန် မွဲတၠဟွံကဵုသှ်ေ ဟွံသေၚ်ပုဟ်ဂးတုဲ ဝန်ဇၞော်ကာဍုၚ်သ္အာၚ် အလဵုအသဳညဳသၟဟ်ဂကူ NUG ဒဝ်ဇြေန်မာအံၚ် ဟီုရ။
နဒဒှ်အေန်သတဳကျုတ်ယှေန် မဒှ် Professional မၞုံကဵုတၚ်ဒုၚ်လျိုၚ်မွဲ ညံၚ်ဒပ်ပၞာန် ဂွံလုပ်ပြံၚ်လွေဟ် ဇရေၚ်အလဵုအသဳကောန်အရာပ်ဂွံဒုၚ်ရုဲစှ်လဝ်ဂှ်ဏောၚ် ညးချူလဝ်လိက်ပရေၚ် ပ္ဍဲ Bangkok Post နကဵုယၟု Support the People Revolution ရ။
Radio NUG ကလေၚ်ထ္မံက်ထ္ၜးလဝ် လိက်ပရေၚ်ဒဝ်ဇြေန်မာအံၚ် နကဵုဘာသာဗၟာတုဲ အကြာညးဍုၚ်ကွာန် ဂကောံဇြဟတ် မဒစဵုဒစးပၠန်ဂတးဒၟံၚ် သၞောတ်တၠအဝဵုပၞာန် နကဵုနဲကဲနာနာတံဂှ် ဒှ်ဒၟံၚ်သ္ဇက်မဒးကူချပ်ရ။
ဒံက်တာသဳရိမန်ဆာန် ညးမၞုံအခေါၚ်ဟီုဂး ဒပ်စဵုဒၞါဍုၚ်မန် MSDF ဂှ် သွက်ဂွံကလေၚ်ဓရိုဟ်ပၠောပ် ဒပ်ပၞာန် သၟဝ်အလဵုအသဳကောန်အရာပ်မာန် နကဵုဂကောံပၠန်ဂတးဂမၠိုၚ် ဂွံဇၞးကေတ်လ္ပာ်ပရေၚ်ပၞာန်တုဲမှဟေၚ် ကၠောန်အပြံၚ်အလှာဲ ကဏ္ဍပရေၚ်ဂီုကၠီုဂွံဏောၚ်ဂှ် ဟီုရ။
“ ညံၚ်ဒပ်ပၞာန် ဂွံစိုပ်သၟဝ်အလဵုအသဳကောန်အရာပ်ဂှ် စဵုကဵုဂွံကၠောန် SSR Security Sector Reform ဗွဲမအံၚ်ဇၞးမာန် နကဵုဂကောံပၠန်ဂတးဇကုတအ် ကေတ်ဇၞးလ္ပာ်ပရေၚ်ပၞာန်တုဲ ဒပ်ပၞာန်ဂှ် ဟွံပါလုပ် ပ္ဍဲကိစ္စပရေၚ်ဍုၚ်ကွာန်ဗီုကၠာတေံရတုဲ ဒုၚ်သစ္စာ သၟဝ်အလဵုအသဳကောန်အရာပ်တုဲ ယဝ်ပြုပြေၚ်ပြံၚ်လှာဲကၠုၚ် ကဏ္ဍပရေၚ်ဂီုကၠီု SSR မကေတ်တာလျိုၚ်ကာစဵုဒၞါဂီုကၠီုသၟး ဗွဲမအံၚ်ဇၞးမာန်မ္ဂး ထပိုတ်ကၠေံရိုဟ်ကၞက် သၞောတ်တၠအဝဵုပၞာန်မာန်ယျဂှ် ကံက်အဓိပ္ပာယ်ဂွံရ” သာ်ဝွံ သ္ဂးရ။
စနူအခိၚ်ဒပ်ပၞာန်ကလေၚ်သီအဝဵုမွဲဝါပၠန်ဂှ်တုဲ ဒဵုကဵုအခိၚ်လၟုဟ် ညးဍုၚ်ကွာန်ဂမၠိုၚ်ဝွံ နူကဵုထ္ၜးကၠုၚ်ဆန္ဒ ဟၟဲပၟိက်ကဵုသၞောတ်တၠအဝဵုပၞာန်ဂှ် စိုပ်ကၠုၚ်ဒဵုကဵုပေါဲဗ္တိုက်ရပ်လွဟ် ထပိုတ်ရိုဟ်ကၞက်ဒပ်ပၞာန်ဝှေတ်သေတ်ရ။
အခိၚ်သီအဝဵုပန်သၞာံပြၚ်ကၠုၚ်ဂှ် ပေါဲဗ္တိုက် သရိုဟ်ဖျေံသၞောတ်တၠအဝဵုပၞာန်ဂမၠိုၚ်လေဝ် ဇြဟတ်ခိုဟ်ကၠုၚ်ဒၟံၚ်တုဲ အခိၚ်ကံၚ်ဇြဳပၞာန် ဒးဆောံလေၚ်လဝ် တိဍာ်ဗွဲမဂၠိုၚ်ဂှ် အလဵုအသဳကြုက် ဒဒှ်မလုပ်စိုပ်ပလာပ်ပထုဲအကြာဂှ်လေဝ် ပြာကတ်ကၠုၚ်ဒၟံၚ်ရ။
ပ္ဍဲအကာဲအရာဒှ်မံၚ်သာ်ဏံဂှ် ဂွံထပိုတ်ရိုဟ်ကၞက် ဒပ်ပၞာန်ဟွံသေၚ်မွဲသာ် တၚ်ရန်တၟံ ဂွံပြံၚ်လှာဲလွေဟ် နဒဒှ်ဂကောံပရဝ်ဖက်ယှေန်နေဝ်ဂှ်ဝွံ ပွမစိုပ်တၞုၚ်တၞး သ္ကာတ်မြဟ်မွဲဟွံသေၚ်ပုဟ်ဂှ် ကဵုလဝ်သမ္တီ နူကဵုလိက်ပရေၚ်ဂှ်မွဲကဆံၚ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ဂွံပြံၚ်လှာဲ နဒဒှ်ဒပ်ပၞာန် ဗီုပြၚ်ဖေဝ်ဒရာ ကောန်ဍုၚ်အရၚ်သီုဖအိုတ်ဒုၚ်တဲမာန်ဂှ် ဒးဗ္တိုက်ပ္တိတ် အလုံသၞောတ်ဒပ်ပၞာန်ဝှေတ်သေတ်ဏံမွဲဏောၚ်ဂှ် ဟီုရ။
“ပြံၚ်လှာဲကၠေံ ဒပ်ပၞာန်လၟုဟ် နဒဒှ်ဒပ်ပၞာန်ဗီုပြၚ်ဖေဝ်ဒရာတုဲမှဟေၚ် ကောဒေံကောန်ဍုၚ်အရၚ် EAO သီုဖအိုတ် ဒုၚ်တဲမာန်ဏောၚ်ဂှ်ရ ဆအယာံမာတ်စွံကၠေံ ဗီုပြၚ်ဒပ်ပၞာန်လၟုဟ် ကေုာံ သၞောတ်လၟုဟ် သၟဝ်အလဵုအသဳဒဳမဝ်ကရေဇြဳဂှ် ပြဒ္ဒညာဏံ တုဲဒှ်အာဟွံသေၚ်ပုဟ်။ မဗဳဇဝှေတ်သေတ် မဗဳဇပကီုပရာပ် တၠအဝဵုဂှ်တှ်ေ ဆက်သှ်ေၜက်ဒၟံၚ်ဏီဏောၚ်။ ဟိုတ်ဂှ်ရ ဂကောံပၠန်ဂတးပိုယ်တံသီုဖအိုတ် ဒးဗ္တိုက်ပ္တိတ် အလုံသၞောတ်ဏံမွဲ ညဳညဳသာသာဏောၚ်ဂှ် ညာတ်ကေတ်ရ” သာ်ဝွံ သ္ဂးရ။
သွက်ဂွံစွံ သၟဝ်ပရေၚ်ကောပ်ကာဲအုပ်ဓုပ် အလဵုအသဳကောန်အရာပ် နူကဵုဂကောံဒပ်ရပ်လွဟ်သီုဖအိုတ် မရုဲစှ်လဝ် နကဵုနဲဒဳမဝ်ကရေဇြဳဂှ် NUG ကေုာံ K2C တအ် ပံၚ်တောဲလလောၚ်တြးလဝ် ပ္ဍဲသၞာံ ၂၀၂၄ ဂိတုဂျာန္နဝါရဳ ၃၁ တေံရ။
ပရေၚ်ဒပ်ပၞာန် မပါလုပ်ဒၟံၚ်ပ္ဍဲပရေၚ်ဍုၚ်ကွာန်ဂှ် သွက်ဂွံဖအိုတ်ကၠေံဂှ်ကီု၊ သွက်ဂွံပလီုကၠေံ သၞောတ်သ္ဇိုၚ်ဒက်ပ္တန် ၂၀၀၈ ဂှ်ကီု ကေုာံ ပွမပ္တိတ်ဇြဟတ် ဂွံပၠောပ်လမျီု သၞောဝ်ဏံ အရာအိုဿီုဂှ် ဗ္တိုက်သရိုဟ်တုဲ သွက်ဂွံချူခၞံ သၞောဝ်သ္ဇိုၚ်ဒက်ပ္တန် မဒုၚ်သ္ဇိုၚ်ကဵုသၞောတ်ဖေဝ်ဒရာ ကေုာံ ဒဳမဝ်ကရေဇြဳရ။
ပ္ဍဲကဵု K2C ဂှ် ဂကောံရပ်လွဟ်ကောန်ဍုၚ်အရၚ်ဂမၠိုၚ် မပ္တံကဵုဗော်သွးကောန်ဂကူကရေၚ် KNU ၊ ဗော်တောတက်ကရေၚ်ဍာဲ KNPP ကဵု ဒပ်ပၠတရဴကောန်ဂကူချေၚ် CNF တအ် ပါလုပ်တုဲ ဒှ်မဟာမိတ်ပရေၚ်ဍုၚ်ကွာန်ပရေၚ်ပၞာန် NUG ရ။
ပ္ဍဲပၠန်ဂတးသၞောတ်တၠအဝဵုပၞာန်ဏံဂှ် NUG ကေုာံ PDF တအ် ပါလုပ်ဒၟံၚ် နူကဵုအခန်ကဏ္ဍဗဟဵုတုဲ ဆန္ဒဂကောံဇြဟတ်ဍုၚ်သ္အာၚ်တအ်ဟွံသေၚ်မွဲသာ် ဒုၚ်သ္ဇိုၚ်ကဵုလ္တူဆန္ဒ ညးဍုၚ်ကွာန်ဍုၚ်ဗၟာတုဲ တောတက်ကၠုၚ် ဒဵုကဵုရပ်လွဟ်ထ္ပက်ပၞာန်ရောၚ် ထ္မံက်ထ္ၜးလဝ် ပ္ဍဲလိက်ပရေၚ်ဝွံရ။
ကိုဝ်မေန်တိုဲတေတ် မဒှ်က္ဍိုပ်သ္ကိုပ်ကွးဘာဗကသတြေံ ဂှ် ဂၠံၚ်တရဴပၠန်ဂတးက္ညၚ်ဝွံ ဗ္တိုက်ထပိုတ်သၞောတ်ဏောၚ်တုဲ ကုညးမကလိလောန်ဒုဟ်ဒဏ် လ္တူညးဍုၚ်ကွာန်တံဂှ် ကေတ်အာဒုဟ် အတိုၚ်သၞောဝ် မွဲဟွံကဵုသှ်ေဏောၚ်ဂှ် ဟီုရ။
“ ဗီုပြၚ်ပိုယ်တံနွံပၟိက်ဂှ် ဗ္တိုက်ဖအိုတ်ကၠေံ သၞောတ်ဏံဏောၚ်။ တုဲတှ်ေ ဂွံစုတ်စၞး ဒၞါဲဒပ်ပၞာန် ကံၚ်ဇြဳပၞာန် မဒှ်ဒၟံၚ်လေံထံက် ကုသၞောတ်တၠအဝဵုပၞာန်ဏံဂှ် ပ္ဍဲပိုယ်တအ် ဒပ် PDF နွံဏောၚ်။ အေ ဂှ်တှ်ေ ပိုယ်တံဂှ် ဗ္တိုက်မၞိဟ်ဟွံသေၚ်ပုဟ်၊ ဗ္တိုက်ဖအိုတ် မူဏောၚ်။ မၞိဟ်ဂှ်တှ်ေ သၠးအာအခေါၚ်ဟွံသေၚ်ပုဟ်၊ ဝိုတ်အာလေဝ် ဟွံသေၚ်ပုဟ်။ အပ္ဍဲကာလပၠန်ဂတးဏံ တုဲတှ်ေ အပ္ဍဲကာလဍေံတံအုပ်ဓုပ်ဒၟံၚ်ဏံ ကံၚ်ဇြဳပၞာန် ကေုာံ ကောန်ရဲတဝ်ခွါတၠအဝဵုပၞာန်ဂမၠိုၚ် စပ်ကဵုမကလိလောန်လဝ် အခေါၚ်အရာမၞိဟ် လ္တူညးဍုၚ်ကွာန်တံကဵု ဒုဟ်ဒဏ်ဂမၠိုၚ်ဂှ်တှ်ေ ပိုယ်တံ ဒးကေတ်အရေဝ်ကဵုဒုဟ်ဒဏ် အတိုၚ်သၞောဝ်ဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ကၞောတ်သၞာံဏံမ္ဂး သွက်ဂွံကၠောန်ဗဒှ်ပေါဲရုဲမာဲ နဒဒှ်ပၞော်တိတ်ပရေၚ်ဍုၚ်ကွာန်ဂှ် ပလေဝ်ပလေတ်ဒၟံၚ်တုဲ စပ်ကဵုပရေၚ်ဏံတုဲ သမ္မတကြုက် ယှဳကျေန်ဖျေန် ကဵုဇြဟတ်ထံက်ဂလာန်ဂှ် ဟီုလဝ်ကဵု က္ဍိုပ်သ္ကိုပ်ပၞာန်ရ။
ပရေၚ်က္ဍိုပ်သ္ကိုပ်ပၞာန် မေန်အံၚ်လှာၚ်ကဵု သမ္မတကြုက် ယှဳကျေန်ဖျေန်တအ် ဆဵုဂဗဆက်ဆောံညးသ္ကအ် ဂတမတ်ညးဂမၠိုၚ်ဂှ်ဝွံ ဇီုကပိုက်ကဵု ဒတုဲဖဵုကြုက် ဍာ်ဇမၠိၚ် ကေုာံ ပရေၚ်ညိၚ်ဝတ်ဍုၚ်ဗမာဏောၚ်ဂှ် ထ္မံက်ထ္ၜးလဝ် ပ္ဍဲလိက်ပရေၚ်ဂှ်ရ။
နကဵုဍုၚ်ကြုက် စၞးဒးထံက်ဂလာန် ကုမဟာဗျူဟာဂကောံပၞာန် “ပါ်ထ္ကးဆီ−ကေတ်မာန်” ဂှ် သွက်ဂွံဆက်ဆောံကဵု ဂကောံဇြဟတ်ပရေၚ်ဍုၚ်ကွာန် ပ္ဍဲဍုၚ်ဗၟာသီုဖအိုတ် ပါလုပ်သီုကဵု NUG, PDF တအ်ဂှ် ဒဝ်ဇြေန်မာအံၚ် ကဵုလဝ်ကသပ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−Social Media