ဍာ်ဗု၊ ဂျောန် ၁
ပ္ဍဲရးတၞၚ်သဳ ပွိုၚ်ဍုၚ်ဍာ်ဗု ပွိုၚ်တိုက်(ကံပေါက်) ဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်မၞိဟ်ပန်တၠ ပါလုပ်သီုကဵု သ္ဇိုၚ်ဝန်ပရေၚ်ထတ်ယုက် Non CDM တအ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၃၀ အခိၚ်ဗ္တံ ၜိုတ် ၁၁ နာဍဳဂှ် ကောန်ဒပ်ကံၚ်ဇြဳပၞာန် နူကဵုဌာန်ဂအုပ်ဒပ်ဍာ်မောရဝတဳဂမၠိုၚ်ဝွံ ကြဴနူစိုပ်ကၠုၚ် ကဵုကွဳစက်တုဲဂှ် လုပ်စိုပ်ဍိုက်ဗ္တိုက်လဝ်အရာပ်လ္ၚဵု နူပွိုၚ်တိုက် (ကံပေါက်) ရ။
ကြဴနူဂှ်တုဲ လုပ်စိုပ်ရပ်ဒက်ဏာလဝ် ဒဝ်တာန်န်မဝ် မဒှ်သ္ဇိုၚ်ဝန်ပရေၚ်ထတ်ယုက် Non CDM တန်တဴဒၟံၚ်အရာပ်(လှည်းကုန်း) (၁) ၊ ညးမဒှ်ကောန်ဝုတ် သ္ဇိုၚ်ဝန်ပရေၚ်ထတ်ယုက် ဒဝ်ဇြေန်မဝ်နာၚ်၊ ညးမဒှ်ကောန်ဗၠာဲ ကိုဝ်ထက်က် ကဵု ဥူကျဝ်သဵုဝေန် မဒှ်သ္ဇိုၚ်ဝန်ပရေၚ်ထတ်ယုက် CDM တန်တဴဒၟံၚ်အရာပ်(လှည်းကုန်း) (၂) တံ ပ္ဍဲသ္ၚိရ။
ဒဝ်တာန်န်မဝ် ညးမဒှ်သ္ဇိုၚ်ဝန်ပရေၚ်ထတ်ယုက် မဒးဒုၚ်ရပ်လဝ်ဂှ်ကဵု ဒဝ်ဇြေန်မဝ်နာၚ် မဒှ်ကောန်ညးဂှ်ဝွံ ဒဵုကဵုအခိၚ်လၟုဟ် ယိုက်ဒၟံၚ်တာလျိုၚ် ပ္ဍဲရုၚ်ဂဥုဲပွိုၚ်တိုက်(ကံပေါက်) တုဲ ဥူကျဝ်သဵုဝေန်ဂှ်တှ်ေ ကြဴနူဒပ်ပၞာန်သီအဝဵုတုဲဂှ် သ္ပလဝ် CDM တုဲ ဒှ်ဒၟံၚ်မၞိဟ်ဒးလွဳဒၟံၚ်ယဲ ပ္ဍဲသ္ၚိရောၚ် ဂွံတီကေတ်ရ။
ကုညးမရပ်ဒက်ဏာလဝ်ဂှ်တှ်ေ လ္ပာ်ကံၚ်ဇြဳပၞာန် ရပ်ဒက်ဏာလဝ် နကဵုတၚ်စောဲစပ် ထံက်ပၚ်ဒၟံၚ်ဂကောံပၠန်ဂတးတံဏောၚ်ဂှ် ဂွံတီကေတ်တုဲ ရပ်ဒက်စၟဳတ်ဒၟံၚ် ပ္ဍဲဒၞါဲစၟဳတ် ဒပ်ဍာ်မောရဝတဳရ။
ပ္ဍဲဒေသ(ကံပေါက်) ဂှ် အပ္ဍဲသၞာံတုဲကၠုၚ်တေံလေဝ် အ္စာ၊ အ္စာၝောံ CDM တံမပါလုပ် တၠကမၠောန်ညးဒေသတအ်ဒှ်တမ် ဒးဒုၚ်ရပ်ဒက်လဝ် မွဲဏှမွဲဏှတုဲ ဗွဲမဂၠိုၚ်ဝွံ ဒးဒုၚ်ဖျေံစၟတ်လဝ် ဒုဟ်ဒဏ်ထံၚ်ရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE5 Tanintharyi ဂှ်မ္ဂး ပ္ဍဲရးတၞၚ်သဳဂှ် အပ္ဍဲပွိုၚ်မွဲဂိတု ဟိုတ်နူဒပ်ကံၚ်ဇြဳပၞာန် ထ္ၜးဟိုတ်နာနာသာ် ရပ်ဒက်ကၠုၚ်တုဲ မၞိဟ်ဟွံအောန်နူ ၂၅၀ တၠ ဒးဒုၚ်ရပ်ဒက်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်-CJ