မတ်မလီု၊ ဂျောန် ၁
ပ္ဍဲတွဵုရးမန် ကံၚ်ဇြဳပၞာန် ရပ်ဒၟံၚ် ကွဳစက်၊ ကွဳလိုန်ဓာတ် လာၚ်ဇြေန်ဟွံမွဲဂမၠိုၚ် နကဵုအစဳဇန် ဇၞော်ကဵုဇြဟတ်တုဲ ယဝ်ဒှ်ကွဳဟွံမွဲကဵုလာၚ်ဇြေန်မ္ဂး ဒးဒုၚ်ရပ်သီုကွဳသီုမၞိဟ်ဒဳရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ရပ်မံၚ်ကွဳလာၚ်ဇြေန်ဟွံမွဲ သီုတ္ၚဲသီုဗ္တံတုဲ မၚ်ရပ်မံၚ် ဒၞာဲပါၚ်လုပ်တိတ်ဍုၚ်၊ တုဲပၠန် ဒၞါဲကွဳစက်အာကၠုၚ်ဂၠိုၚ်သၟးဟွံက ဗက်ရပ်ကၠုၚ်မံၚ်စဵုစိုပ်သ္ၚိလေဝ် နွံကၠုၚ်ရ။
ဟိုတ်ဂွံရပ်ကွဳလာၚ်ဇြေန်ဟွံမွဲဂှ် ပ္ဍဲဂိတုမေ စၟတ်တ္ၚဲ 20 တုဲကၠုၚ်တေံ နူကဵုဂကောံကံၚ်ကောံဇြဳပၞာန်တအ် ကောံဓရီုပညဳပညပ်ကမၠောန် ပ္ဍဲနေဗျဳဒဝ်တုဲ ဒှ်အမိၚ်နူသ္ကိုပ်ပၞာန်ဇၞော် မေန်အံၚ်လှိုၚ်ရောၚ် ဂွံတီကေတ်ရ။
ညးဒေသမတ်မလီုမွဲတၠဂှ်တှ်ေ ရပ်ဒၟံၚ်ယာန်ဟွံမွဲကဵုလာၚ်ဇြေန် ကြပ်အလုံမွဲဍုၚ် ပပ္တံနူကဵုဒၞါဲဟွံကေၚ်ရပ်မွဲလှ်ေတအ်ဂှ်လေဝ် စၟဳစၟတ်ကၠုၚ်အဆက်က်တုဲ ယဝ်ဒှ်ယာန်လာၚ်ဇြေန်ဟွံမွဲမ္ဂး ရပ်ဏာသီုယာန်သီုမၞိဟ်ဏောၚ်ဂှ် သ္ဂးလဝ်ရ။
“ရပ်ဒၟံၚ် ကြပ်အလုံဍုၚ်မွဲရ။ ဒၞါဲဟွံကေၚ်ရပ်ဂှ်ကီု လၟုဟ်ဂှ် ဗီုလဵုပရောဟီုတှ်ေ ဇၟာပ်ယာန်ကၠုၚ်ဂှ် ဒးဒေါံကဵုဍေံဖအိုတ်ရ။ စၟဳတ်ဒၟံၚ် မွဲမဟွံကဵုသှ်ေ သီုယာန်လာၚ်ဇြေန်နွံ သီုယာန်လာၚ်ဇြေန်ဟွံမွဲ သီုဖအိုတ် ဒးဒေါအ်တုဲ ဍေံအာတ်တၞးလိက်။ တုဲတှ်ေ အာတ်ဒၟံၚ်သီုလိက်။ ယဝ်လာၚ်ဇြေန်ဟၟဲတှ်ေ ကော်လဝ်သီုကွဳလိုန်ဓာတ် သီုမၞိဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ဒၞါဲရပ်ယာန်ဟၟဲကဵုလာၚ်ဇြေန်တံဂှ် စကာဇြဟတ် ဗွဲမဂၠိုၚ်ဂၠေၚ်တုဲ ရပ်ဒၟံၚ်နကဵုဂကောံစုၚ်တုဲ အခိၚ်ဍေံတံစၟဳတ်ဂှ် အသိၚ်ၜက်တုဲ ဟွံဒေါအ်ကဵုမ္ဂး သီုကဵုလက်ဒေါန်ၜုၚ်တက်ဒၟံၚ်ရ။
နူညးဒေသမုဟ်ဍုၚ်မွဲတၠဂှ်လေဝ် အလဵုဒပ်ကံၚ်ဇြဳပၞာန်၊ ဗၠာဲသၟိၚ် ကေုာံ ဌာနမဆေၚ်စပ်ဂမၠိုၚ် မဗက်ရပ်မံၚ်ယာန်လာၚ်ဇြေန်ဟွံမွဲတအ်ဂှ် ဍိုက်ကွဳလာၚ်ဇြေန်ဟၟဲတံဂှ်တုဲ ဗက်ရပ်ဒၟံၚ်တုဲ ဟိုတ်နူရပ်ဒက်ဒၟံၚ်သာ်ဏံဂှ်တုဲ ညးဍုၚ်ကွာန်တအ် အာကၠုၚ်ဒှ်ဒၟံၚ်အခက်အခုဲအိုတ်ရောၚ် ဟီုရ။
“အဏံဂှ် ရပ်မံၚ်ဖအိုတ်ရ။ ဍေံတံ ကဵုပ္တိုန်သွံလဝ် ပ္ဍဲဆေၚ်မလုပ်သၞောဝ်တံဂှ်။ လၟုဟ်ရပ်ဏောၚ်ဟီုတှ်ေ ဍေံတံ ကဵုဏာပရိုၚ် ကဵုဆေၚ်တံဏံ။ ပ္ဍဲဆေၚ်တံဏံဂှ် စနူကဵုလာၚ်ဇြေန်ယာယဳ ကွဳလိုန်ဓာတ်လာၚ်ဇြေန်ဟွံမွဲတံဂှ် ဟွံမွဲရပုဟ်။ အလဵုဍေံတံဂှ် ဍိုက်မံၚ်ကွဳလာၚ်ဇြေန်ဟွံမွဲဂှ်။ ဍေံတံလေဝ် ရပ်၊ ဍေံတံလေဝ် သွံဟီုတှ်ေ အဓိကဂှ် ရပ်ဒၟံၚ်တုဲ ညးဍုၚ်ကွာန်ဂမၠိုၚ် ဒှ်ဒဒိုက်ရ” သာ်ဝွံ သ္ဂးရ။
ပ္ဍဲဒၞါဲရပ်ဒက် ယာန်လာၚ်ဇြေန်ဟွံမွဲတံဂှ် မၞိဟ်နူကဵုဗွိုၚ်ကံၚ်ဇြဳပၞာန်၊ မၞိဟ်မဆက်စပ်ကဵုကံၚ်ဇြဳပၞာန်တအ် ကဵုၚုဟ်တုဲ မဍိုက်ဒၟံၚ်တံဂှ်တှ်ေ စၟဳတ်တုဲ ကလေၚ်ဗလးကဵုနွံတုဲ ညးဒေသတံဂှ်တှ်ေ ရပ်ဒက်လဝ်နွံရောၚ် ညးဆက်ဟီုရ။
က္ဍိုပ်သ္ကိုပ်ပၞာန်ဂှ်တှ်ေ ဒးထ္မံက်ပ္တိတ် ပရေၚ်မဍိုက်မံၚ်ကွဳစက်၊ ကွဳလိုန်ဓာတ် ဟၟဲကဵုလာၚ်ဇြေန်တံဂှ်ဏောၚ်တုဲ ဂွံဆဵုကေတ်ဒၟံၚ် ဒဒှ်ရကၠောန်ဒၟံၚ်လာၚ်ဇြေန်ပတောံဂှ်ရ နကဵုညးတာလျိုၚ်ဂမၠိုၚ် သွက်ဂွံစၟဳတ်ထ္မံက်ပ္တိတ် ကုညးမဆက်စပ်ပါလုပ်သီုဖအိုတ်ဂှ် ဟီုလဝ်ရ။
ဟိုတ်နူဍိုက်ဒၟံၚ်ယာန်လာၚ်ဇြေန်ဟွံမွဲတံဂှ်တုဲ နကဵုကၟိန်ဍုၚ် ဒးဆောံလေၚ်ဒၟံၚ် အခေါန်ဖလှာ ဗွဲမဂၠိုၚ်တုဲ ပ္ဍဲကဵုကိစ္စမဆေၚ်စပ်ကဵုပရေၚ်ဂီုကၠီုတံဂှ်လေဝ် ဒှ်တိုန်အခက်အခုဲမာန်ဂှ်ရ ရးဒေသ၊ တွဵုရး ညးကဵုညး သွက်ဂွံကောပ်ကာဲစၟဳတ် ညံၚ်ပရေၚ်မဍိုက်ဒၟံၚ်ယာန်ဟၟဲကဵုလာၚ်ဇြေန် ဟွံဂွံမွဲဂှ် စၞောန်ကၠုၚ်တုဲ စရပ်ဒက်ကၠုၚ် သာ်ဏံရ။
ဂကောံသၟဝ်တဲကံၚ်ဇြဳပၞာန်ဂမၠိုၚ် စရပ်ဒက်ဒၟံၚ် ယာန်လာၚ်ဇြေန်ဟွံမွဲ ဇၟာပ်ဒၞါဲ နကဵုကိုန်စဳမာန်ကီုလေဝ် အလဵုညးတအ် ဟိုတ်နူဍိုက်ဒၟံၚ်ယာန်လာၚ်ဇြေန်ဟွံမွဲတံဂှ်တုဲ စပ်ကဵုပရေၚ်မရပ်ဒက်ဒၟံၚ် ယာန်လာၚ်ဇြေန်ဟွံမွဲတံဂှ်တုဲ အကြာညးဒေသတံဂှ် ပရေၚ်ပါ်ပါဲဂမၠိုၚ် သၠုၚ်တိုန်ဒၟံၚ်ရ။
ပ္ဍဲတွဵုရးဍုၚ်မန်ဂှ် ယဝ်ကံၚ်ဇြဳပၞာန် ရပ်ဂွံယာန်လာၚ်ဇြေန်ဟွံမွဲတံဂှ်မ္ဂး မ္ၚးနူကဵုသီကေတ်ယာန်ဂှ် သီုကဵုကေတ်ဒၟံၚ်ဒုဟ် ကုညးဍုၚ်ကွာန်ဒေသဂမၠိုၚ် နကဵုသၞောဝ်ဗၞိက်ပၠောပ်ပ္တိတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ