ၜဳကလေၚ်၊ ဂျောန် ၁
ပ္ဍဲတွဵုရးဍုၚ်မန် ပွိုၚ်ဍုၚ်ၜဳကလေၚ် ဗ္ဒါဲကွာန်တပျေနဳဂှ် ဒပ်ကံၚ်ဇြဳပၞာန် မဂေတ်ဒၟံၚ်ကၚ်ဂီုကၠီုရေၚ်သ္ကအ် ဒှ်ပန်ပှော်တုဲ ကောန်ဒပ်ကံၚ်ဇြဳပၞာန်ပန်တၠ ဇီုကပိုက်ချိုတ်မာန်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမေ ၃၀ အခိၚ်နူဂယး ၜိုတ် ၉ နာဍဳဂှ် ဒပ်ကံၚ်ဇြဳပၞာန် မၚ်တောပ်ဗ္တိုက်ဒၟံၚ် သကဲဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်တပျေနဳကဵု ဒပ်ကံၚ်ဇြဳပၞာန် မဂေတ်ကၠုၚ်ကၚ် လ္ပာ်တပျေနဳဂှ် ဗၠေတ်မှာတုဲ ဒှ်ပန်ပှော်လဝ်ညးသ္ကအ်ရ။
အပ္ဍဲပရေၚ်ပန်ပှော်ဏံဂှ် သီုၜါလ္ပာ် ဇီုကပိုက်ကလိဂွံဝပ် နွံလဝ်တုဲ ကောန်ဒပ်ကံၚ်ဇြဳပၞာန် ဂွံလဝ်ဝပ်ဒးဂွိၚ်ကဵုဘဲလမျီုတံလေဝ် ပါလုပ်ဒၟံၚ်ရောၚ် ညးဒေသဂွံတီကေတ်လၟေၚ်ဒဒှ်ဂှ်ဂမၠိုၚ် သ္ဂးရ။
ကောန်ဒပ်ကံၚ်ဇြဳပၞာန် မကလိဂွံဝပ်ဇီုကပိုက်ဒးဂှ် ကလေၚ်ယိုက်ဖျဴဏာ လ္ပာ်ကျာ်ထဝ် နကဵုယာန်ဖ္ဍိုက်မၞိဟ်ယဲတုဲ ဗ္ဒါဲဒၞါဲဒှ်ပန်ပှော်ဂှ်လေဝ် ဟွံကဵုအခေါၚ်ညးဒေသဂမၠိုၚ် အာကၠုၚ်မွဲသာ် ကေတ်ဖျဴဏာညးကလိဂွံဝပ်တံတုဲမှ ကဵုလဝ်အခေါၚ်အာကၠုၚ်ရောၚ် သ္ဂးရ။
စနူဂိတုဨပရဴတုဲကၠုၚ်တေံတုဲ ဗ္ဒါဲကွာန်တပျေနဳဂှ် ကံၚ်ဇြဳပၞာန်ကေုာံပျူသဝ်ထဳ ဇြဟတ်ဗ္ဒါဲ ၄၀ ဂေတ်ဒၟံၚ်ကၚ်၊ မၚ်တောပ်ဗ္တိုက်ဒၟံၚ် အရိုဟ်တ္ၚဲတုဲ လဆောဝ်လဆောဝ် ဒှ်နကဵုကယျိုၚ်အရာပ်မွဲသ္ကုတ်၊ ကယျိုၚ်ပၞာန်မွဲသ္ကုတ်တုဲ လဆောဝ်လဆောဝ် နကဵုကယျိုၚ်အရာပ်တံဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ