လ္ဂုၚ်၊ ဂျောန် ၆
ကြဴနူၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်တုဲ ၚုဟ်ဂွံကလေၚ်စှ်ေ အတိုၚ်ၚုဟ်စၞောန်လဝ်ဂှ် ဟွံသွံမ္ဂး ကေတ်အာအရေဝ် ကွေံကွေံကြာန်န်ဏောၚ် ဂကောံတၠကမၠောန်ထဝ် ရးဒေသဇၞော်လ္ဂုၚ် လလောၚ်ပ္တိတ်လဝ် နကဵုစၟတ်တ္ၚဲ ဂိတုဂျောန် ၅ တေံရ။
အတိုၚ်တၚ်လလောၚ်တြးဂှ်မ္ဂး နကဵုဂကောံတၠကမၠောန်ထဝ်ရးဒေသဇၞော်လ္ဂုၚ် ၚုဟ်ထဝ်မ္ဒးသွံတြး လၟေၚ်တ္ၚဲတံဂှ် မွဲတ္ၚဲ ၃ ဝါ လလောၚ်ပ္တိတ်ကဵုလဝ်တုဲ နကဵုဆေၚ်ထဝ်ဂမၠိုၚ် အတိုၚ်ၚုဟ်ခုတ်လဝ်ဂှ် သွက်ဂွံကၠောန်သ္ပသွံရာန်အိုတ်ဂှ် ကဵုလဝ်သတိရ။
သ္အာၚ်နူဂှ်ပၠန် ဗွဝ်ဖျာထဝ်ကဵု လှုဲတံဂှ် ကမ္မတဳကမၠောန်ကောပ်ကာဲထိၚ်ဒဝ်မၚ်ရံၚ် သၟဝ်တဲကံၚ်ဇြဳပၞာန်ကဵု ဌာနမဆေၚ်စပ်ဂမၠိုၚ် မံၚ်ရံၚ်ဒၟံၚ်တုဲ အခိၚ်ကၠုၚ်စိုပ်စၟဳတ် ယဝ်ရဒ္ဂေတ်ဗက်အတိုၚ်တၚ်စၞောန်တံ ဟွံမွဲမ္ဂး ကေတ်အာရေဝ် ဗွဲမစိုပ်တရဴဏောၚ်ဂှ် ပါလုပ်ပ္ဍဲတၚ်လလောၚ်တြးဂှ်ရ။
အတိုၚ်ၚုဟ်ခုတ်လဝ် မဟွံသွံတံဂှ် ကေတ်အာရေဝ် ဗွဲမစိုပ်တရဴဏောၚ် ဂကောံတၠကမၠောန်ထဝ် ရးဒေသလ္ဂုၚ် လလောၚ်ပ္တိတ်လဝ်ကီုလေဝ် ကေတ်အာရေဝ် ရေၚ်တၠုၚ်အာ နကဵုဗီုပြၚ်သာ်လဵုရောဟီုဂှ် လလောၚ်ပ္တိတ်လဝ် ချိုတ်တ်ပၠိုတ်တ်ဂှ် ဟွံမွဲရ။
တၠကမၠောန်ထဝ်မွဲတၠဂှ် ခုတ်ပ္တုန်ၚုဟ်သာ်ဏံတုဲ ကဵုသွံဂှ်ရ ဟွံကိတ်ညဳကဵု ၚုဟ်မ္ၚးဏံတုဲ ဒှ်ဒၟံၚ်ဗီုဒးစိုတ်သွံ ဗီုဒးစိုတ်ရာန်တုဲ ပ္ဍဲတ္ၚဲအကြာတံဏံ ၚုဟ်ဒဝ်ဠာကဵု ၚုဟ်ထဝ်လေဝ် ချိုတ်တ်ပၠိုတ်တ် ဟွံဒှ်ဂှ်ရ ပတ်ၚုဟ်တုဲ ရာန်ကၠုၚ်တံ နွံကၠုၚ်မာန်ရောၚ် ဟီုရ။
“မွဲဟူဏံ ၚုဟ်လ္တူလာၚ်တံဂှ် ဗၞတ်ၜိုတ်လဵုဒးတုဲ ၜိုတ်လဵုကၠောန်သ္ပသွံရာန်ဒၟံၚ်ရောဟီုဂှ် ဟွံတီကေတ်ပုဟ်။ ၜိုတ်တီဂှ်တှ်ေ ဥပမာ ကလေၚ်ရာန်မ္ဂး ပတ်ၚုဟ်ကွေံကွေံဏောၚ်။ အခိၚ်ကာလဏံ ဥပမာ နူကဵု YGEA ပ္တိတ်လဝ် နကဵု ၄၈ ကိုဋ်မ္ဂး ၜိုတ် ၄၃ ကိုဋ်၊ ၄၄ ကိုဋ်ရ ကဵုတှ်ေကဵုဏောၚ်။ မူဟိုတ်ရောတှ်ေ ဒှ်ကာလတိုန်စှ်ေဂၠိုၚ်တုဲ ဆေၚ်ဂမၠိုၚ် ဟွံဒေါအ်ဟွံဂွံ ဒးရာန်တွဵုမ္ဂး ပတ်ၚုဟ်တုဲမှ ကလေၚ်ရာန်အိုတ်ရ။ ကေၚ်ကၠောန်ဒၟံၚ်ဗီုဏံတုဲ ကၠောန်ကၠုၚ်သာ်ဏံရဏောၚ်ဂှ် ထေၚ်ကေတ်ရ။ အဓိကဂှ်တှ်ေ အခိၚ်ကာလလၟုဟ် ၚုဟ်ဍာံဍာံဂှ် ဣလဵုရော ဂွံဟီုဂှ် ဝါတ်ဒၟံၚ်” သာ်ဝွံ သ္ဂးရ။
ဂကောံတၠကမၠောန်ထဝ် ရးဒေသဇၞော်လ္ဂုၚ်ဂှ် ထဝ်ဒကောၚ်(မဳဠေန်) မွဲဒ္ကေဝ်ဂှ် သွက်ဂွံသွံတြး ၄၈ ကိုဋ်ပြၚ် ခုတ်ပ္တန်လဝ်ကီုလေဝ် ဒၟါနူပရေၚ်ရပ်ဒက်တံ နွံဒၟံၚ်တုဲ မ္ၚးနူကဵုဗွဝ်ဖျာထဝ်ဂှ် ၚုဟ်ဗွဝ်ဖျာမ္ၚး ဟွံဂံၚ်ပံက်အိုတ်ရပုဟ်ဂှ် ညးဆက်ဟီုရ။
ၚုဟ်ထဝ်အပ္ဍဲဍုၚ်ဝွံ အပ္ဍဲကာလသီအဝဵု ပွိုၚ်ပိသၞာံပြၚ်ဏံ ပ္ဍဲဂိတုမေ သတ္တာဟလက္ကရဴအိုတ်တေံ ထဝ်ဒကောၚ်မဳဠေန်မွဲဒ္ကေဝ်ဂှ် ၚုဟ်သၠုၚ်တိုန်ကၠုၚ်လဝ် စဵုကဵု ၆၀ ကိုဋ်ဒ္ကေဝ်ပြၚ်ရ။
ကြဴနူဂှ်တုဲ ကံၚ်ဇြဳပၞာန်ဝွံ နကဵုတၚ်စောဲစပ် ကၠောန်သ္ပဒၟံၚ် ညံၚ်ၚုဟ်ထဝ် ဟွံဂွံညိၚ်ဂးတုဲ ပ္တိတ်လဝ်လိက်ဝါရာန် ကုတၠဆေၚ်ထဝ်ယၟုဒယှ် (အောင်သမာဓိ၊ ဇွဲထက်၊ ဝိန့်စိန်) တံ မပါလုပ် တၠကမၠောန်ထဝ် ၁၀ တၠတုဲ ၂၁ တၠဂှ် ရပ်ဒက်ကေတ်လဝ်အရေဝ်ရ။
တၠပညာပရေၚ်ပိုန်ဒြပ်တံဂှ် ၚုဟ်ထဝ်ဂွံသၠုၚ်တိုန်ဂှ်ဝွံ ဒၟါနူၚုဟ်ဒဝ်ဠာ သၠုၚ်တိုန်ကၠုၚ်ဏောၚ်တုဲ တၠကမၠောန်ထဝ်တံဂှ် ဆၜိုတ်ရပ်ဒက်၊ ဆၜိုတ်ခုတ်ပ္တန်ထောံ ၚုဟ်စၞောန်တံဗက်ဂှ် ၚုဟ်ထဝ် ဂွံစှ်ေကၠုၚ်တီတီ ဒှ်ဟွံမာန်ပုဟ်ဂှ် ပါ်ပါဲဟီုဂးဒၟံၚ်တံ နွံဒၟံၚ်ရ။
ပ္ဍဲဍုၚ်ဗၟာဂှ် ၚုဟ်ထဝ်အပ္ဍဲဍုၚ်ဝွံ ပ္ဍဲလက်ထက်အလဵုအသဳတုဲကၠုၚ်တေံ ၚုဟ်ထဝ်ဒကောၚ်မဳဠေန် မွဲဒ္ကေဝ်ဂှ် ၁၃ ကိုဋ်ဒ္ကေဝ် နွံလဝ်တုဲ ပ္ဍဲလက်ထက်ကံၚ်ဇြဳပၞာန်ဏံ သီုၚုဟ်သၠုၚ်တိုန်ကၠုၚ်ဂှ် ၚုဟ်ဟွံညိၚ်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−YEAS