ဘာပန်၊ ဂျောန် ၆
အပ္ဍဲဂိတုမေ တုဲကၠုၚ်တေံ ဗ္ဒိုပ်ဒပ်ကံၚ်ဇြဳပၞာန် ၅ မၞုံအပ္ဍဲပွိုၚ်ဍုၚ်(ဘူးသို) ခရိုၚ်ဘာပန် ဗော်သွးကောန်ဂကူကရေၚ် KNU ရုပ်သီလသာအာဂှ် ဂွံတီကေတ် အတိုၚ်တၚ်လလောၚ်ပရိုၚ် ဌာန်ဂအုပ်ဒပ်မဟာ ၅ KNU ရ။
ဗ္ဒိုပ်ဒပ်ကံၚ်ဇြဳပၞာန် အပ္ဍဲခရိုၚ်ဘာပန် သၟဝ်တဲခမရ ၄၁၃ ဗ္ဒိုပ်ကျံက်ညှက်−ဝါလူ၊ ဗ္ဒိုပ်တာဘူ၊ ဗ္ဒိုပ်ပါန်ဟိုက်−ကဟဳကျိုဝ်၊ ဗ္ဒိုပ်သၟဝ်တဲ ခလရ ၁၉ ဗ္ဒိုပ်လေဝ်တိုဝ် ကေုာံ ဗ္ဒိုပ်သၟဝ်တဲ ခမရ ၃၁၄ ဗ္ဒိုပ်နာတ်ဒံၚ်−မဝ်ဖိုဝ်ကျိုဝ်တံဂှ်ဝွံ ကလေၚ်ရုပ်သီဏာလဝ်ဖအိုတ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ဇြဟတ်ဒပ် နူဗ္ဒိုပ်ဒပ် ကလေၚ်ရုပ်သီဏာလဝ် ၅ ဂှ်ဝွံ အခိၚ်လၟုဟ် ကလေၚ်ဗပေၚ်ဒၟံၚ် ဇြဟတ်ပံၚ်ကောံ ပ္ဍဲဗ္ဒိုပ်(ခေါပုတ်) ဂှ်ရောၚ် သ္ဂးလဝ် ပ္ဍဲတၚ်လလောၚ်တြးဂှ်ရ။
ကောန်ဒပ်ကံၚ်ဇြဳပၞာန် ရုပ်သီဏာလဝ်တံဂှ်ဝွံ ကလေၚ်ကဵုပၞာန်အရီု ဘာပန်ပၠန်ဟာ ဟွံသေၚ်မ္ဂး ကလေၚ်ဒက်ပ္တန် ဒၞါဲပၞာန်ဒုၚ်တၟိမွဲ ပ္ဍဲ(ခေါပုတ်) ဂှ်ရဟာဟီုဂှ် ဟွံဂွံတီကေတ် ချိုတ်ပၠိုတ်ဏီကီုလေဝ် မၚ်ရံၚ်ဒၟံၚ် အကာဲအရာရောၚ် သ္ကိုပ်ဗိုလ်ဇၞော် သဝ်ကလာဒိုဝ် ညးမၞုံအခေါၚ်ဟီုဂး ဒပ်မဟာ ၅ KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ဒပ်ဖျေံသ္ဇိုၚ် သၟဝ်တဲကံၚ်ဇြဳပၞာန် အပ္ဍဲခရိုၚ်ဘာပန် KNU တံဂှ် ဒပ်ပံၚ်ကောံမဟာမိတ် သၟဝ်ပၠတရဴ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် အရိုဟ်ဒဒှ်တ္ၚဲ ကၟာတ်လဒဵုဗိုၚ်ဗ္တိုက်ဒၟံၚ်တုဲ ကောန်ဒပ်ကံၚ်ဇြဳပၞာန်တံဝွံ ဒုၚ်ဟွံမာန်ရတုဲ ဆုတ်ကလေၚ်ရုပ်သီအာ နူဗ္ဒိုပ်နာနာတံဂှ်ရ။
သ္အာၚ်နူဂှ်ပၠန် ဒပ်ပံၚ်ကောံမဟာမိတ် ဒပ်မဟာ ၅ KNLA တံ ဆက်ကၟာတ်လဒဵုဗ္တိုက်ဒၟံၚ် ကုန်ဗျူဟာ ကေုာံ ဌာန်ဂအုပ်တမ်ဒပ် သၟဝ်တဲကံၚ်ဇြဳပၞာန်တံဂှ်တုဲ ညံၚ်ဌာန်ဂအုပ်တမ်ဒပ်ဗျူဟာ နူဒပ်ကံၚ်ဇြဳပၞာန် ဟွံဂွံစှ်ေအာဂှ် ပတှ်ေအရီုဗၚ်ပၞာန်ကျာတုဲ တဝ်စၞေဟ်ဒၟံၚ် ဗွဲမသ္ကာတ်မြဟ်ရောၚ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
အခိၚ်လၟုဟ် ဒပ်ပံၚ်ကောံ ဒပ်မဟာ ၅ KNLA တံ ဆက်ကၟာတ်လဒဵု ဗိုၚ်ကြတ်ဗ္တိုက်ဒၟံၚ် ကုန်ဗျူဟာ ဖျေံသ္ဇိုၚ်ဘာပန် ကေုာံ ဌာန်ဂအုပ်တမ်ဒပ် ခမရ ၃၄၀ ခမရ ၃၄၁ သှ်ေဒၟံၚ်အပ္ဍဲခရိုၚ်ဘာပန် KNU တံဂှ်ရ။
ပ္ဍဲခရိုၚ်ဘာပန် KNU ဂှ် အပ္ဍဲဂိတုမေ တုဲကၠုၚ်ပွိုၚ်မွဲဂိတုတေံ ပေါဲဗ္တိုက်ၜါလ္ပာ် က္တဵုဒှ်လဝ် ၁၀၇ ဝါတုဲ လ္ပာ်ဒပ်ကံၚ်ဇြဳပၞာန် ၆၀ ပြၚ် ဇီုကပိုက်ချိုတ် ကလိဂွံလဝ်ဝပ်တုဲ ဟိုတ်နူဒပ်ကံၚ်ဇြဳပၞာန် ထောံမခတိုဟ်နကဵုက္ၜၚ်ကျာတုဲ ကောန်အရာပ် ၈ တၠ ဇီုကပိုက်ကလိဂွံလဝ်ဝပ်ရောၚ် ဌာန်ဂအုပ် ဒပ်မဟာ ၅ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−KNU