မတ်မလီု၊ သေပ်တေမ်ဗာ (၁၅)
စပ်ကဵုပရေၚ်ပၞာန်တုဲ နကဵုကောန်သ္ဂံၚ် ဒပ်စဵုဒၞါညးဍုၚ်ကွာန် PDF တံ ညံၚ်ဂွိုအ်စကာ သဵုယှေဝ်မဳဒဳယျာဂှ် ဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဥူယဳမန် ဟီုဂးကဵုလဝ်သတိရ။
ဇၟာပ်တ္ၚဲဗုဒ္ဓဝါ လၟေၚ်သတ္တာဟ ပ္ဍဲကဵုဂလာန်ဝန်ဇၞော်ကာစဵုဒၞါ NUG ဥူယဳမန် မဟီုဂးကဵုဒၟံၚ် ကုကောန်သ္ဂံၚ် PDF တံ ပ္ဍဲတ္ၚဲဏံ ဂိတုသေပ်တေမ်ဗာ (၁၄) ဂှ် ဟီုဂးဏာလဝ် သာ်ဏံရ။
ဥူယဳမန်ဂှ် မလေပ်ကလၚ်အမိၚ်အဆံၚ်ၚ် သွက်ကောန်ပၞာန်မွဲဂှ်ဝွံ ဒဒှ်ရပၟိက်ဇၞော် ဗွဲမသၟဟ်ကဵု လမျီုဂှ်ကီု၊ အရာမဒးဂပ်ဝ်ပၞုက်ဓလုက် ပ္ဍဲပရေၚ်ပၞာန်တံဂှ် ဒဒှ်မရပ်စပ်စကာဒၟံၚ် သဵုယှေဝ်မဳယှာ ဗၠးဗၠးၜးၜးတံဂှ် ဟွံဂပ်ဝ်ရောၚ် ကဵုလဝ်သတိ ဟီုဂးလဝ်ရ။
ဟိုတ်ဒၟါနူ ပၞာန်ဒမၠုက်ညးဍုၚ်ကွာန်တံတုဲ ဇြဟတ်ဒပ်ကံၚ်ဇြဳပၞာန်တံဝွံ မွဲတ္ၚဲတုဲမွဲတ္ၚဲ ဆောံလေၚ်ဒၟံၚ်တုဲ အခိၚ်ဟွံရုဲ သရိုဟ်ထ္ကးအာဏောၚ်ဂှ်ရ အခိၚ်ဒပ်ကံၚ်ဇြဳပၞာန် သရိုဟ်ထ္ကးဂှ် ညံၚ်ကၟိန်ဍုၚ်ဗၟာ ဂွိုအ်ဒှ်အာရုသံၚ် ကလိုက်ကၟဵုတံဂှ်ကဵု တာလျိုၚ်သ္ဂောံမၚ်မွဲစဵုဒၞါ သ္ၚိဌာန်ကၠအ်သွဝ် လမျီုညးဍုၚ်ကွာန်တံဂှ်ဝွံ ဒှ်ကၠုၚ်တာလျိုၚ် NUG ကဵု ဂကောံဒပ်စဵုဒၞါညးဍုၚ်ကွာန်တံရောၚ်ဂှ် သ္ဂးရ။
သ္အာၚ်နူဂှ်ပၠန် ညးသ္ဂုတ်သွာတ်ဗ္စာရဏာမာန် နအလဵုသမ္တီညာဏ်ဇကု ဗၠးဗၠးၜးၜး နူကဵုဒပ်ကံၚ်ဇြဳပၞာန်တံဂှ် လုပ်စ္ၜုဲစ္ၜော်ဒၟံၚ် ဂၠံသြိုဟ်ညးဍုၚ်ကွာန်တံအိုတ်တုဲ နကဵုဗီုပြၚ်နာနာသာ် မသာဲစ္ဍးဒၟံၚ် ကံၚ်ဇြဳပၞာန်တံဂှ်လေဝ် အရိုဟ်ဒဒှ်တ္ၚဲ နွံကၠုၚ်ယျဂှ် ဝန်ဇၞော်ကာစဵုဒၞါ NUG ဟီုဂးလဝ်ရ။
အလဵုအသဳညဳသၟဟ်ဂကူ NUG ဝွံ အခိၚ်လၟုဟ် ဒက်ပ္တန်ဂွံလဝ် တမ်ဒပ် PDF အပံၚ် (၃၀၀) ပြၚ် မာန်လဝ်တုဲ အလုံမွဲကၟိန်ဍုၚ် ပ္ဍဲကဵုပွိုၚ်ဍုၚ် အပံၚ် (၃၃၀) မၞုံဂှ် ပွိုၚ်ဍုၚ် (၂၅၀) ပြၚ်ဂှ်လေဝ် ဒက်ပ္တန်လဝ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ် (ပကဖ) တံတုဲ ဗ္တိုက်ပ္တိတ်ပၠန်ဂတးဒၟံၚ် ကုဒပ်ပၞာန်ဗၟာတံရ။
ပရိုၚ်−သြၚ်လောန်တိုၚ်(မ်)