ၜဳကလေၚ်၊ ဂျောန် ၈
တွဵုရးဍုၚ်မန် ပွိုၚ်ဍုၚ်ၜဳကလေၚ် ဗ္ဒါဲကွာန်(တောင်စွန်း) ပ္ဍဲဂိတုဂျောန် ၆ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ် အကြာဒပ်ဗၠာဲသၟိၚ်မွဲတၠ ဒးဒုၚ်ပန်ဂစိုတ်ကဵုသေနာတ်တုဲ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံရ။
နူကွာန်(ယွန်းဒလင်းကုန်း) အကြာပ်ဒပ်ဗၠာဲသၟိၚ် တေန်လှ စဴကၠုၚ်ဇရေၚ်ဗ္ဒိုပ်ဗၠာဲသၟိၚ် (တောင်စွန်း) နကဵုကွဳလိုန်ဓာတ် မွဲတၠဓဝ်ဂှ် သၟာသေနာတ်ဟွံတီယၟုဂမၠိုၚ် ဗက်ကၠုၚ်ကဵုကွဳလိုန်ဓာတ်တုဲ ပန်ဂစိုတ်ဏာလဝ် စုက်က်ရ။
“ ညး(အကြာပ်ဒပ်ဗၠာဲသၟိၚ်) မကၠုၚ်ကဵုကွဳလိုန်ဓာတ်ဂှ် ဗက်ကၠုၚ်လက္ကရဴတုဲ ပန်ကဵုသေနာတ်။ ၜိုတ် ၆ တဲနွံဏောၚ်။ ချိုတ်အာလဝ်ဒၞါဲဂှ်ရ” သာ်ဝွံ ညးဒေသၜဳကလေၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒးဒုၚ်ပန်ဂစိုတ်ကဵုသေနာတ်တုဲ အကြာပ်ဒပ်ဗၠာဲသၟိၚ် တေန်လှဝွံ ပ္ဍဲကဵုသြိုဟ် ကေုာံ က္ဍိုပ်တံဂှ် မကမ်ကၠိုဟ်လုပ် ကလိဂွံအာဝပ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
ကြဴနူပရေၚ်ပန်ပှော်ဂှ်တုဲ ကောန်ဒပ်ကံၚ်ဇြဳပၞာန်တံ စိုပ်ကၠုၚ်တုဲ ကၟာတ်ဂၠံၚ်စၟဳတ်တုဲ ပလံၚ်ဏာလဝ်ဇွဂှ် ပ္ဍဲရုၚ်ဂဥုဲၜဳကလေၚ်ဂှ် ဂွံတီကေတ်ရ။
စပ်ကဵုအကြာပ်ဒပ်ဗၠာဲသၟိၚ် ဒးဒုၚ်ပန်ပသောၚ်ထောံဂှ်တုဲ ဒပ်ပၠန်ဂတးဖျေံသ္ဇိုၚ်ဒေသတံ အခိၚ်လၟုဟ် လလောၚ်ပ္တိတ်လဝ်ပရိုၚ်မွဲမွဲဂှ် ဟွံဂွံဆဵုကေတ်ဏီရ။
အတိုၚ်တၚ်နၚ် နူသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်တံဂှ်မ္ဂး သၞာံဏံ နူဂိတုဂျာန္နဝါရဳ စဵုကဵုဂိတုဂျောန် ပ္ဍဲပွိုၚ်ဍုၚ်ၜဳကလေၚ်ဂှ် သ္ကိုပ်အုပ်ဓုပ် ကံၚ်ဇြဳပၞာန် ခါန်ကၞက်ပ္တိုန်လဝ်ဂမၠိုၚ်၊ ကောန်ဒပ်ဗၠာဲသၟိၚ်ဂမၠိုၚ်၊ ပၞာန်မၚ်ကွာန်ဂမၠိုၚ် မပါလုပ် ရဲကဵုပရိုၚ် ဟွံအောန်နူကဵု ၁၂ တၠ ဒးဒုၚ်ပန်ပသောၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media