မတ်မလီု၊ သေပ်တေမ်ဗာ (၁၅)
ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန်သီအဝဵု မကော်ဘိက် အလန်ဒုတိယဂှ် နကဵုဗော်ဍုၚ်မန်တၟိ (NMSP) ဒဒှ်ရ တိုန်စိုပ်ဟွံထေက်ဂှ် လိက်သ္ၚဳဂၠိပ်တၚ်နၚ် လစွံစိုတ်ညးဍုၚ်ကွာန်မွဲ နူကဵုမုက်လိက်လ္ဂန်အိန် သၟတ်မန်တံ မသ္ကိုပ်သ္က ဒက်ပ္တန်လဝ်ဂှ် လလောၚ်တြးကၠုၚ် ပ္ဍဲဂိတုသေပ်တေမ်ဗာ (၁၃) တေံရ။
နကဵုဗော်ဍုၚ်မန်တၟိ လ္တူပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက် အလန်ဒုတိယဂှ် သွက်ဂွံတီကေတ် လညာတ်ညးဍုၚ်ကွာန်တံမာန် တိုန်စိုပ်ထေက် ဟွံထေက်ဂှ်တုဲ နူကဵုမုက်လိက်လ္ဂန်အိန် ကံက်ကပှ်လဝ် လိက်သ္ၚဳဂၠိပ်တၚ်နၚ်မွဲရ။
အတိုၚ်လိက်သ္ၚဳဂၠိပ်တၚ်နၚ်ဂှ်မ္ဂး ပ္ဍဲကဵုမၞိဟ်သွဟ် (၇၃၀) ပြၚ်ဂှ် (၉၁) တၟံကၠံဝွံ ဒဒှ်ရအာစိုပ်ဆဵုဂဗသဳကၠဳ ဟွံထေက်ဂှ် လညာတ်နွံတုဲ သှ်ေ (၉) တၟံကၠံဂှ်ဟေၚ် ဆဵုဂဗသဳကၠဳထေက်ရောၚ် သ္ပလဝ်တၚ်စၟတ်ရ။
သၟတ်မန်မွဲတၠဂှ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန်မကၠောန်ဗဒှ်ဂှ် ဗော်ဍုၚ်မန်တၟိ တိုန်စိုပ်ကၠုၚ်မ္ဂး ဟိုတ်နူဒှ်အာ ညံၚ်ကဵုသ္ပစၟတ်သမ္တီ အကာဲအရာပရေၚ်ဍုၚ်ကွာန် ဒပ်ပၞာန်ဗၟာတံဂှ်တုဲ ဟွံမိက်ကဵုတိုန်ပုဟ်ဂှ် ဟီုရ။
“ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန်မကၠောန်ဟီုဂှ် ဓဝ်ပတှ်ေဟွံမွဲတုဲ ဒှ်သွဟ်ဟွံမာန်လးလးဂှ်ရ နကဵုအဲ ဟွံဒုၚ်တဲလးလးရ၊ ဟွံမိက်ကဵုတိုန်ပုဟ်၊ မုဒှ်ရောဟီုမ္ဂး တိုန်ဏောၚ်ဟီုတှ်ေ ပ္ဍဲအကာဲအရာပရေၚ်ဍုၚ်ကွာန် ကံၚ်ဇြဳပၞာန် မကၠောန်သ္ပဂှ် ဇကု (NMSP) ပါလုပ်တုဲ တုပ်အာညံၚ်ကဵု သ္ပစၟတ်သမ္တီ ကုကံၚ်ဇြဳပၞာန်ရ၊ ကဵု Legtitmacy (ပွမလုပ်သၞောဝ်) လေဝ် ဟီုဂွံ၊ ဣဏံဂှ် ဒဵုဗၞတ်လဵု ဇီုကပိုက်မာန်ရောဟီုဂှ် ကၟိန်ဍုၚ်သ္အာၚ်တံလေဝ် ကျောဝ်အာမဏံတုဲ ကံၚ်ဇြဳပၞာန်ဂှ် ကၠောန်ကဵုဒၟံၚ် ခိုဟ်ဟ်တံ၊ ပရေၚ်ၜိုဟ်လလမ်တံ ဟီုတုဲ ဇကု (NMSP) ပါလုပ်တုဲ ဒှ်အာဒုဟ်ကီုရောၚ် ဟီုဂွံရ” သာ်ဝွံ ညးထံက်ထ္ၜးလဝ်ရ။
ဂကောံ ဒုဥက္ကဌ ဗော်ဍုၚ်မန်တၟိ နာဲအံၚ်မေန် မသ္ကိုပ်သ္ကဂှ်ဝွံ တုဲကၠုၚ်ပ္ဍဲဂိတုမေ သတ္တာဟလက္ကရဴအိုတ်ဂှ် အာစိုပ်ဆဵုဂဗသဳကၠဳလဝ် ကုက္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မပါလုပ် သီုကဵုဒပ်ပၞာန်ဗၟာတံ အလန်ပထမရ။
နူကဵုပေါဲသဳကၠဳဂှ် သွက်ဂွံဒက်ပ္တန်အာ သၞောတ်ဒဳမဝ်ကရေဇြဳဗော်ဇဳ ဂွံဗိုန်ခိုၚ်၊ နူကဵုသၞောတ်ဒဳမဝ်ကရေဇြဳဗော်ဇဳဂှ် သွက်ဂွံဒက်ပ္တန်အာ ကၟိန်ဍုၚ်ပံၚ်ကောံ ဖေဝ်ဒရေဝ်ဂှ်ကီု ကေုာံ သွက်ဂွံရေၚ်တၠုၚ်ကဵု ကိစ္စပရူပရာ ပရေၚ်ဂကူမန်တံ မပါလုပ် တၚ် (၇) တၚ် တုပ်စိုပ်ထ္ပက်လဝ်စၟတ်တဲမာန်ဂှ် ညးမၞုံအခေါၚ်ဟီုဂး ဗော်ဍုၚ်မန်တၟိ နာဲအံၚ်မ္ၚဵု ဟီုလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။
သၟတ်မန်မွဲတၠဂှ်လေဝ် သဳကၠဳပရေၚ်ၜိုဟ်လလမ် ကဵုကံၚ်ဇြဳပၞာန်ဝွံ တုပ်တဴညံၚ်ရဴ ကလေၚ်ပၠောပ်ဒၟံၚ်လမျီု ကုသၞောဝ်သ္ဇိုၚ် ၂၀၀၈ ဂှ်တုဲ အခိၚ်အလုံကၟိန်ဍုၚ်မွဲ ထပိုတ်ရိုဟ်ကၞက်ပၠန်ဂတးဒၟံၚ် ကုကံၚ်ဇြဳပၞာန်ဂှ် နကဵုဗော်ဍုၚ်မန်တၟိ ဆဵုဂဗသဳကၠဳဟွံထေက်ပုဟ်ဂှ် သ္ဂးရ။
“အာတိုန်ပေါဲသဳကၠဳသာ်ဏံဟီုဂှ် ဒှ်ညံၚ်ရဴကလေၚ်ပၠောပ်ဒၟံၚ်လမျီု သၞောဝ်သ္ဇိုၚ် ၂၀၀၈ ရ၊ ကောန်ဍုၚ်အရၚ် မၞုံပ္ဍဲဍုၚ်ဗမာဏံဂမၠိုၚ် ပ္ဍဲဒၞါဲရးဒေသမပြးဇး မပ္တံ ချေၚ်၊ ကချေၚ် အိုတ်ကၞောတ် သီုသ္ၚိရေၚ်ကၟေၚ်ဆက်ပိုယ်တံ မဒှ်တွဵုရးကရေၚ် ဒှ်တမ် ဒှ်ဒၟံၚ်ပေါဲဗ္တိုက် ကဵုကံၚ်ဇြဳပၞာန်ရ၊ နကဵုပၞာန်ပၠန်ဂတး ကံၚ်ဇြဳပၞာန်ဂှ် သွက်ဂွံကလေၚ်ထပိုတ်ထောံ ရိုဟ်ကၞက် သၞောတ်အုပ်ဓုပ်ပၞာန် အခိၚ်မဗ္တိုက်ပၠန်ဂတးဒၟံၚ်ဂှ် နကဵုဗော်ဍုၚ်မန်တၟိ မသ္ပစၞးကဵု ကောန်ဂကူမန်ပိုယ်တံ အာဆဵုဂဗသဳကၠဳကဵု ဒပ်ပၞာန်ဟီုဂှ် ကၠောန်ဟွံထေက်ပုဟ် နကဵုသၟတ်မန်မွဲတၠ ညာတ်ကေတ်ရ” သာ်ဝွံ သ္ဂးရ။
သွက်ဂွံဆဵုဂဗသဳကၠဳကဵု ကံၚ်ဇြဳပၞာန် အလန်ဒုတိယဂှ် ဗော်ဍုၚ်မန်တၟိ (NMSP) ၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် (DKBA) ကေုာံ ကံၚ်ဇြဳပရေၚ်ၜိုဟ်လလမ်ကရေၚ် (KNU/KNLA-PC) တံ ဒက်ဂကောံတုဲ သွက်ဂွံသဳကၠဳဂှ် ကံၚ်ဇြဳပၞာန် ကော်ဘိက်လဝ်ကီုလေဝ် တ္ၚဲလဵုဒှ်သဳကၠဳရောဟီုဂှ် ဟွံဂွံတီကေတ်ဏီပုဟ်ဂှ် ညးမၞုံအခေါၚ်ဟီုဂး PPST သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စပ်ကဵုပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက် အလန်ဒုတိယဂှ်တုဲ လ္ပာ်ဗော်ဍုၚ်မန်တၟိ သွက်ဂွံတိုန်စိုပ်သဳကၠဳ နွံဟွံမွဲဂှ် နကဵုသြန်လောန်တိုၚ်(မ်) ဆက်စၠောံလဝ် ဂၠိုၚ်ၚ်ကဵုဝါကီုလေဝ် ဒုၚ်တဲဟီုဂးကဵုလဝ်ဂှ် ဟွံမွဲရ။
အခိၚ်လၟုဟ် ပေါဲသဳကၠဳပရေၚ်ၜိုဟ်လလမ် ကံၚ်ဇြဳပၞာန် မကော်ဘိက်အလန်ဒုတိယဂှ် ကံၚ်ဇြဳကလေၚ်ဒက်ပတန်ရးသေံ (RCSS/SSA) ၊ ဌာန်ဂအုပ်ဗၠးၜး ကောန်ဂကူပအိုဝ် (PNLO) ၊ ဗော်ဗၠးၜးရခေၚ် (ALP) ၊ ဗော်သွးဒဳမဝ်ကရေတ်တေတ်လာဟူ (LDU) တံ ဆဵုဂဗသဳကၠဳလဝ်ရ။
ပရိုၚ်−သြၚ်လောန်တိုၚ်(မ်)