နေဗျဳဒဝ်၊ ဂျောန် ၁၅
ဟိုတ်နူပရေၚ်ဗ္တိုက် ဂကောံပၠန်ဂတးရပ်လွဟ် အလုံဍုၚ်မွဲဂှ်တုဲ ဒပ်ကံၚ်ဇြဳပၞာန် ဒးဆေၚ်ဒၟံၚ်မုက် ကုဇြဟတ်ဒပ်လေၚ်ဒိုက် ဇၞော်ကဵုဇြဟတ်ဂှ်ဝွံ စနူဂိတုဂျောန် ၁၄ တုဲ နူကဵုလိက်ပရိုၚ်တြးဝါဒတံမွဲကဆံၚ် စကော်ဒၟံၚ် အလံၚ်ဗိုလ်ဂမၠိုၚ်ရ။
ပ္ဍဲအရာကော်ဘိက် အလံၚ်ဗိုလ် သွက်တန်ဗ္တောန်အလံၚ်ဗိုလ် သၞာံဏံဂှ် တၟေၚ်တၟဟ်မွဲဂှ်တှ်ေ ကၠာတေံ ဇၞော်အိုတ်ဂှ် လ္တူအာယုက် ၁၈ သၞာံဘာ် ဇၞော်ဟွံဂွံပုဟ် စၟတ်လဝ်ကီုလေဝ် သၞာံဏံဂှ် ဖအောန်ဖျေံလဝ် တၚ်သၞောတ်ဗ္ၜတ် ဇၞော်နူအာယုက် ၂၀ သၞာံဟွံဂွံ မဒှ်ရ။
ပ္ဍဲအရာကော်အလံၚ်ဗိုလ်တံှဂ် နကဵုညးမအံၚ်ဇၞးလဝ် တန်လုပ်တက္ကသိုလ် သၞာံ ၂၀၂၄ တံဂမၠိုၚ်ဂှ် ကော်ဒၟံၚ် သွက်အလံၚ်ဗိုလ်တက္ကသိုလ်ပၞာန်၊ အလံၚ်ဗိုလ် တက္ကသိုလ်နဲကွတ်ပညာ ဒပ်ပၞာန်၊ အလံၚ်ဗိုလ် တက္ကသိုလ်ဂဥုဲ ဒပ်ပၞာန် ကေုာံ အလံၚ်ဗိုလ်ညးဗြဴ တက္ကသိုလ်ဂဥုဲ ဒပ်ပၞာန်တံရ။
နကဵုညးမိက်ဂွံတိုန်စိုပ် တန်ဗ္တောန်အလံၚ်ဗိုလ်တံဂမၠိုၚ် စနူဂိတုဂျောန် ၁၇ တုဲ ပ္တိတ်ကေတ်လိက်တၞးအာတ်ပ္တိုန် အခေါၚ်လုပ်ဘာအလံၚ်ဗိုလ်တံ ပ္ဍဲဌာန်ဂအုပ်ပၞာန်ရး မကြပ်တံဂှ်မာန်တုဲ လိက်တၞးတံဂှ် ဂိတုအဝ်ဂါတ် စၟတ်တ္ၚဲ ၁၅ စွံလက္ကရဴအိုတ်တုဲ ဒးကလေၚ်ပလံၚ်ဗစိုပ်ဏောၚ်ဂှ် လလောၚ်တြးလဝ်ရ။
ဗိုလ်ဇၞော် CDM လေန်ထက်အံၚ်ဂှ် ဒပ်ကံၚ်ဇြဳပၞာန်ဝွံ ဇၟာပ်ပေါဲသၟာန်သှ်လိက်တန်လုပ်တက္ကသိုလ်တုဲဂှ် ကော်ကေတ်ဒၟံၚ် အလံၚ်ဗိုလ်တံကီုလေဝ် ပြံၚ်လှာဲထောံ တၚ်မၞုံပၟိက်လ္ၚဵုတံဂှ်ဝွံ ဒၟါနူနွံပၟိက်ကဵု ကောန်တန်ဗ္တောန်တံ သၠုၚ်တိုန်ဒၟံၚ်ရောၚ် မဒှ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ညအ်ဂှ် ပေါဲသၟာန်သှ်လိက် ၁၀ တန်တုဲဂှ် ဒှ်အခိၚ်ကာလ ဍေံတံကော်ဒၟံၚ်လၟိုန်ရဏောၚ်။ ဆ္ဂး ပြံၚ်လှာဲထောံ တၚ်နွံပၟိက်တံဂှ်တှ်ေ ဟိုတ်နူတၚ်နွံပၟိက် ကောန်တန်ဗ္တောန်ဍေံတံဏောၚ်ဂှ် ချိုတ်ပၠိုတ်ရ။ အဓိကဂှ်တှ်ေ ညံၚ်ရဴဒၞါဲ DSA ဍေံတံဂှ် ဗွဲကြဴဏံ DSA ဂှ် ဗၞတ်ၜိုတ်လဵုပရေံစှ်ေအာရော ဒှ်အာသာ်လဵုရော လညာတ်သာ်ဏံဂှ် အကြာညးဍုၚ်ကွာန်တံ ဒှ်ကၠုၚ်တၟာဂလိုၚ်ယျ။ တုဲပၠန် ညးဍုၚ်ကွာန် တီကၠုၚ်သဘဴ ဒပ်ပၞာန် ညံၚ်ရဴသၞောဝ်ယိုက်ဂၠေၚ်လျိုၚ်ပၞာန်တံဂှ်တှ်ေ ဓမ္မတာမ္ဂး အခိၚ်စိုတ်လုပ်စအောန် လ္တူတန်ဗ္တောန်အလံၚ်ဗိုလ်တံဂှ် နကဵုညးတံ ဂလိုၚ်ပ္တိုန်တုဲ ဟိုတ်နူတၚ်နွံပၟိက် ကောန်တန်ဗ္တောန်တုဲ ကော်ဒၟံၚ်ရောၚ်ဂှ် အဲညာတ်ရ” သာ်ဝွံ သ္ဂးရ။
အလုံဍုၚ်မွဲ အခိၚ်ပေါဲဗ္တိုက် သ္ကာတ်မြဟ်ဒၟံၚ်ဂှ် ကော်ဒၟံၚ်တန်ဗ္တောန်အလံၚ်ဗိုလ်တံ သာ်ဏံကီုလေဝ် နကဵုညးဍုၚ်ကွာန်တံ စိုတ်ဂွံလုပ်စဟွံမွဲတုဲ လၟိဟ်ကောန်တန်ဗ္တောန်ဂွံပေၚ်ဂှ်လေဝ် ဒးကၠောန်ၜိုတ်အာ တၟာလှ်ေဏောၚ်ဂှ် ညးဆက်ဟီုရ။
ဗိုလ်ဇၞော် CDM ညဳသုတဂှ်လေဝ် ပြံၚ်လှာဲထောံ ဗ္ၜတ်အာယုက်ဂှ်ဝွံ ဟိုတ်နူတန်ပြံၚ်အာ ဒှ်မာန်တုဲ ပ္ဍဲဍေံတံ တၚ်နွံပၟိက်နွံဂှ်ရ ကၠောန်ကၠုၚ် နကဵုဗီုပြၚ် အာယုက်ဇၞော်လေဝ်ဂွံ မဒှ်ရဂှ် ဟီုရ။
“အာယုက် ၁၇ ဂှ်တှ်ေ ဒၟါနူတန်ပြံၚ်အာ ဒှ်မာန်ရ။ သှ်ေ ဂှ်တှ်ေ အခိၚ်ကာလစၟတ်လဝ် ပဵုတိုန်အာဂှ်တှ်ေ ပ္ဍဲကဵုဍေံတံ တၚ်နွံပၟိက်ဇြဟတ် နွံဒၟံၚ် ဒှ်မာန်ဏောၚ်။ ဟိုတ်ဂှ်ရ ဍေံတံဂှ် အာယုက်ဇၞော်လေဝ်ဂွံ ဒှ်အာဗီုပြၚ်ဏံရ။ ဗွဲကြဴမ္ဂး အာယုက်ရဲဂွံတဆိပ်ကြာတုဲတံဂှ်လေဝ် ဍေံတံပပဵုပ္တိုန်တုဲ ကော်တံ နွံကၠုၚ်မာန်ဏောၚ်” သာ်ဝွံ သ္ဂးရ။
မွဲလ္ပာ်ဂှ်ပၠန် အပ္ဍဲကာလသီအဝဵုဏံ ဒပ်ကံၚ်ဇြဳပၞာန် ဒးဆောံလေၚ်ကၠုၚ်တိဍာ် ဂၠိုၚ်ကၠုၚ်ဂှ်ဝွံ စၞောန်ပျးကၠုၚ် သၞောဝ်ယိုက်ဂၠေၚ်လျိုၚ်ပၞာန် ဇၟာပ်ကောန်ဍုၚ်အာယုက်စိုပ်တုဲ ဒးလုပ်ပၞာန် ဟွံဒေါအ်ဟွံဂွံတံဂှ်ကီု၊ စဵုကဵုဒးကလေၚ်ကော် ကောန်ပၞာန်တြေံတြေံတံဂှ် ဇြဟတ်ဒပ် ဆုတ်ယုတ်ကၠုၚ်ရ။
အတိုၚ်တၚ်နၚ် ဂကောံသုတေသန ဗၠးၜးတံဂှ်မ္ဂး အပ္ဍဲကာလသီအဝဵု ပွိုၚ်ပိသၞာံပြၚ်ဏံ ပ္ဍဲဒပ်ကံၚ်ဇြဳပၞာန် ဇီုကပိုက်ချိုတ်အာ အပ္ဍဲပေါဲဗ္တိုက်တံကီု၊ ဂြိပ်ပၞာန်ကီု ကေုာံ ဟိုတ်နူပရေၚ်ချဳဒရာၚ် ဒစဵုဒစးအဝဵု CDM တံဂှ်တုဲ ဒးဆောံလေၚ်လဝ် ဇြဟတ်ဒပ် မွဲကိုဋ်ပြၚ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဝှ်ကြံၚ် ဥူတာန်သဵုနာၚ်ဂှ် လ္ပာ်ကံၚ်ဇြဳပၞာန် ကော်ဒၟံၚ် အလံၚ်ဗိုလ်တံကီုလေဝ် ညးဍုၚ်ကွာန်တံ စိုတ်ဓွံလုပ်စဂှ် ၜိုန်ဟွံမွဲကီုလေဝ် ၜိုတ်ဆညးမဆက်စပ်ကဵုဍေံတံသၟးရ အာတ်ပ္တိုန်ကၠုၚ်မာန်ဂှ် ဟီုရ။
“ညးဍုၚ်ကွာန်တံဂှ်တှ်ေ စိုတ်လုပ်စဟီုဂှ် ဟွံဒးဟီုရ။ စိုတ်ဟွံလုပ်စပုဟ်။ ဆ္ဂး လၟုဟ်ဂှ် ပ္ဍဲဍုၚ်ဗၟာဏံ ဂြောဝ်ဂတာ ဆက်စပ်ကဵုဒပ်ပၞာန်တံ ပွဳဗွိုၚ်ဍေံတံဟီုဂှ်လေဝ် အလုံဍုၚ်မွဲ ပ္ဍဲကဵုလၟိဟ်မၞိဟ်နွံ ၅၀ ပြကောဋိကိုဋ် ၅၂ ပြကောဋိကိုဋ်ဂှ် အကြာ ၅ ကိုဋ်ကဵု ၁၀ ကိုဋ်ဂှ်တှ်ေ မၞိဟ်ဆက်စပ်ကဵုဍေံတံ နွံမာန်ဒၟံၚ်ဏီရ။ ပ္ဍဲကဵုဏံ ရဲအာတ်ပ္တိုန် တန်ဗ္တောန်အလံၚ်ဗိုလ်တံဂှ် နွံဒၟံၚ်ညိညမာန်ရ။ ဆ္ဂး အောန်စှ်ေအာ နူကဵုကၠာတေံဟီုဂှ် ရံၚ်ကေတ် အကာဲအရာ ဘာပၞာန် လၟေၚ်လၟေၚ် ပ္ဍဲပျေန်ဥူလွေန်ဂှ်မ္ဂး တီကေတ်မာန်ရ” သာ်ဝွံ သ္ဂးရ။
အတိုၚ်လိက်ဒုၚ်စဳရေၚ် ဂကောံမၚ်လ္ၚတ်ကေၚ်ကာဍုၚ်ဗၟာ ကေုာံ ပဋိပက္ခ BACS တံဂှ်မ္ဂး ဒပ်ကံၚ်ဇြဳပၞာန် ဇြဟတ်ဒပ်လေၚ်ဒိုက်ဒၟံၚ်ဂှ်ဝွံ သွက်တန်ဗ္တောန်ကွတ်ပၞာန် လၟေၚ် (၁) ကဵု လၟေၚ် (၂) ဂှ် ပံက်လဝ်ဘာ ၂၁ ဘာတုဲ သွက်ၜါလၟေၚ်ဏံဂှ် ပကောံလဝ်ညးသၟတ်တံ နဒဒှ်ကောန်ဒပ် ဗ္ဒါဲ ၉၀၀၀ ရ။
ကံၚ်ဇြဳပၞာန် ကျဒၟံၚ်ပၞာန် ဟိုတ်နူဇြဟတ်ပၠန်ဂတးတံဂှ်ဝွံ ပပ္တံနူကဵုပရေၚ်ပၞာန် ၁၀၂၇ စဵုကဵုအခိၚ်လၟုဟ် ပ္ဍဲကချေၚ်၊ ချေၚ်၊ ရခေၚ်၊ ရးသေံသ္ကုတ်သၟဝ်ကျာ၊ ကရေၚ်ဍာဲ၊ ကရေၚ် ကေုာံ ရးသက်ကိုၚ်တံဂှ် ဒးဗလးလဝ်တဲ တိဍာ်အုပ်ဓလီု ဗ္ဒိုပ်ဒပ်ဍေံတံ ဗွဲမဂၠိုၚ်ဂၠေၚ်တုဲ ဒးဆောံလေၚ်လဝ်ဍုၚ် ဗ္ဒါဲ ၆၀ ဍုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI