ပ္ဍဲပေါဲဗ္တိုက် (မောင်မယ်ရှောင်) ထဝါဲဂှ် ကောန်ဒပ်ကံၚ်ဇြဳပၞာန် ၁၁ တၠ ချိုတ်အာ

ထဝါဲ၊ ဂျောန် ၁၈

အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ်ၜါတ္ၚဲအဆက်က် ပ္ဍဲကွာန် (မောင်မယ်ရှောင်) ပွိုၚ်ဍုၚ်ထဝါဲ ရးတၞၚ်သဳဂှ် ကောန်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်ရောၚ် ဂွံတီကေတ် အတိုၚ်ဂလာန် ဂကောံဒပ်ပံၚ်ကောံစဵုဒၞါညးဍုၚ်ကွာန်တံရ။

တုဲကၠုၚ်ဂိတုဂျောန် ၁၄ အခိၚ်နူဂယးပြဟ်ဂှ်တုဲ ဒပ်ကံၚ်ဇြဳပၞာန် ဇြဟတ်ၜိုတ် ၁၀၀ ဂှ်ဝွံ လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်(မောင်မယ်ရှောင်)ရ။

ကြဴနူဂှ်တုဲ ဒပ်ကံၚ်ဇြဳပၞာန် မလုပ်ကၠတ်ဂၠံက်ဒၟံၚ် ပ္ဍဲသ္ၚိဒၟံၚ် ကေုာံ ပိုန်ဒြပ်အရပ်ရာညးဍုၚ်ကွာန် အပ္ဍဲကွာန်တံဂှ် ဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ပ္ဍဲကဵုတ္ၚဲဂှ် အခိၚ်လဒေါဝ်တ္ၚဲ ၜိုတ် ၁၁ နာဍဳရ။

သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန် မၚ်တောပ်ဗ္တိုက်ဒၟံၚ် ဗ္ဒါဲဒဒန်ဗု အကြာကွာန် (မောင်မယ်ရှောင်) ကဵု ကွာန်ဇဟာတံဂှ် ဒပ်ပံၚ်ကောံစဵုဒၞါညးဍုၚ်ကွာန်တံ ထပ်ဗ္တိုက်လဝ် ပ္ဍဲဂိတုဂျောန် ၁၅ အခိၚ်လဒေါဝ်တ္ၚဲ ၁၁ နာဍဳရ။

ဟိုတ်နူပရေၚ်ဗ္တိုက် ၜါတ္ၚဲအဆက်က်တုဲ ပ္ဍဲပေါဲဗ္တိုက် မက္တဵုဒှ်လဝ်တံဂှ် ကောန်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်ဂှ် သ္ပဒတန်မာန်လဝ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု ဖိုဝ်ချဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲကဵုပေါဲဗ္တိုက် စက္တဵုဒှ်လဝ် နူဂိတုဂျောန် ၁၄ ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ကြာန်န်တုဲ ဥူလှမျေတ် အာယုက် ပွဳပွူ ၈၀ သၞာံမွဲတၠ ဒးမကမ်ချိုတ်အာလဝ်ရောၚ် ဂွံတီကေတ် အတိုၚ်ဂလာန် ညးဒေသတံရ။

ဟိုတ်နူပေါဲဗ္တိုက်ၜါလ္ပာ် ကေုာံ ဒပ်ကံၚ်ဇြဳပၞာန်တံ လုပ်စိုပ်ထ္ပက်ကရောၚ်ပၞာန်ဂှ်တုဲ ညးဒေသဂၠိုၚ်ကဵုလ္ၚီ နူကွာန် (မောင်မယ်ရှောင်) တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံ အလုံကွာန်မွဲရ။

ပရေၚ်ဗ္တိုက်ဏံဂှ် ဒပ်ပၞာန်ဗၠးၜးကောန်ဂကူထဝါဲ DNLA ၊ ဒပ်စဵုဒၞါညးဍုၚ်ကွာန်ဍာ်ဗု YPPDF ၊ ဂကောံစဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု ပကဖ၊ ဒပ်ဒမၠုက် စဵုဒၞါညးဍုၚ်ကွာန် ပွိုၚ်ဍုၚ်ထဝါဲ DGRF ကေုာံ ကရောၚ်ပၞာန်ဥသြ တံ ပံၚ်တောဲဗ္တိုက်လဝ်ရ။

စနူဂိတုဂျောန် ၁ တုဲကၠုၚ်တေံတုဲ စဵုကဵုဂိတုဂျောန် ၃ ဒပ်ကံၚ်ဇြဳပၞာန် မဖျေံဒပ်မံၚ်လဝ် အပ္ဍဲကွာန် (မောင်မယ်ရှောင်) တံဂှ်ဝွံ လုပ်ကၠတ်ဂၠံက် သ္ၚိဒၟံၚ် ဗ္ဒါဲ ၁၀၀ တုဲ ကေတ်ဏာလဝ် ကပေါတ်မၞုံကဵုၚုဟ်မးတံရောၚ်ဂှ် ဂွံတီကေတ် နူညးဒေသတံရ။

ပရိုၚ်−သြၚ်လောန်တိုၚ်(မ်)

ဗီု−Dawei PDF