သၞေဟ်ကၚ်စၟဳတ် (ဘုရားမဲ) ထဝါဲ ဒးဒုၚ်ပန်ကဵုသနာ်ပါတုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာ

ထဝါဲ၊ ဂျောန် ၂၀

သၞေဟ်ကၚ်စၟဳတ် (ဘုရားမဲ) ကံၚ်ဇြဳပၞာန် နွံဗ္ဒါဲကွာန်(မောင်မယ်ရှောၚ်) ပွိုၚ်ဍုၚ်ထဝါဲ ရးတၞၚ်သဳ ဒးဒုၚ်ပန်ကဵုသနာ်ပါတုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရောၚ် ဂွံတီကေတ် ဇရေၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗုရ။

တုဲကၠုၚ် ပ္ဍဲဂိတုဂျောန် ၁၇ အခိၚ်နူဂယး ၜိုတ် ၉ နာဍဳဝိုက်ဂှ် သၞေဟ်ကၚ်စၟဳတ် (ဘုရားမဲ) ဖျေံလဝ်ဒပ် နကဵုဇြဟတ် ၃၀ ပြၚ် ဂှ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု YPPDF ကေုာံ ဒပ်ဒမၠုက်စဵုဒၞါညးဍုၚ်ကွာန် ပွိုၚ်ဍုၚ်ထဝါဲ DGRF တံ အာစိုပ်ပန်ပှော်ဗ္တိုက်လဝ် နကဵုသနာ်ပါရ။

ဟိုတ်နူဒးဒုၚ်ပန်ကဵုသနာ်ပါတုဲ ကောန်ဒပ်ကံၚ်ဇြဳပၞာန် နွံသၞေဟ်ကၚ်စၟဳတ် (ဘုရားမဲ) ၂ တၠ ဒးမကမ်ချိုတ်အာလဝ်ရောၚ် ညးဒုၚ်တာလျိုၚ် လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဍာ်ဗု ဖိုဝ်ချဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အပ္ဍဲပရေၚ်ဗ္တိုက်ဏံဂှ် လ္ပာ်ကံၚ်ဇြဳပၞာန် ပန်ပှော်လဝ် နကဵုလွဟ်ဇၞော် လွဟ်ဍောတ် ကြာန်န်ကီုလေဝ် လ္ပာ်ဒပ်စဵုဒၞါညးဍုၚ်ကွာန်တံ ဇီုကပိုက်ဒးဟွံမွဲ ဆုတ်ကလေၚ်လဝ်ရောၚ် သ္ဂးရ။

သၞေဟ်ကၚ်စၟဳတ်ကံၚ်ဇြဳပၞာန်တံဝွံ ဟိုတ်နူဒးဒုၚ်ဗ္တိုက်ဒၟံၚ်ကဵု ဂကောံဒပ်စဵုဒၞါညးဍုၚ်ကွာန်တံ မွဲဏှမွဲဏှဂှ်တုဲ သၞေဟ်ကၚ်စၟဳတ်ဗွဲမဂၠိုၚ်ဝွံ ပတေၚ်ဂြတ်ကၠုၚ် ပရေၚ်ဂီုကၠီု ကေုာံ ပရေၚ်စၟဳတ်တံ နူကဵုကၠာတေံဂှ် ဂွံတီကေတ် အတိုၚ်ဂလာန် ဒပ်စဵုဒၞါညးဍုၚ်ကွာန်တံ ဟီုလဴထ္ၜးဂှ်ရ။

တုဲကၠုၚ် ဂိတုဂျောန် ၁၄ ကဵု ဂိတုဂျောန် ၁၅ တေံဂှ်လေဝ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲကွာန် (မောင်မယ်ရှောင်) ဂှ် ဒးဒုၚ်ဗ္တိုက်လဝ် ၜါတ္ၚဲအဆက်က်တုဲ ကောန်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်ရောၚ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−Dawei PDF