နေဗျဳဒဝ်၊ ဂျောန် ၂၁
အပ္ဍဲကာလသီအဝဵုဏံ ဗၞိက်စၞစသုၚ်သ္ဇိုၚ်တံကီု ကပေါတ်ဗၞိက်တၞဟ်သ္အာၚ်တံကီုဂှ် ၚုဟ်သၠုၚ်တိုန်ဒၟံၚ် ကဵုဆတုဲ ညံၚ်ၚုဟ်ဖျာဂွံညိၚ် ကၠောန်ၜိုတ်ဒၟံၚ် အဆက်က်ရောၚ် ဝန်ဇၞော်ကိုန်စဳမာန် ကေုာံ ပရေၚ်ဘဏ္ဍာ ကံၚ်ဇြဳပၞာန် ဟီုရ။
ပ္ဍဲကဵုကောံဓရီုကမ္မတဳ သွက်ဗၞိက်ဖျာဂွံညိၚ်ဝတ် ကဆံၚ်ကၟိန်ဍုၚ် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျောန် ၁၉ ဂှ် ဝန်ဇၞော်ကၟိန်ဍုၚ် ကိုန်စဳမာန် ကေုာံ ပရေၚ်ဘဏ္ဍာ ဥူဝေန်ယှုၚ် သီုကဵုဒှ်ဒုဝန်ဇၞော် ကံၚ်ဇြဳပၞာန်ခါန်ကၞက်လဝ်ဂှ် ဟီုကၠုၚ် သာ်ဏံရ။
ဥူဝေန်ယှုၚ်ဂှ် ဂဥုဲဇဗ ကေုာံ ကပေါတ်အထံက်အရီုဂဥုဲတံ မပါလုပ် ဗၞိက်ပၟိက်ဇၞော်တံ ပိုတ်အိုတ်ဂှ်ကဵု ၚုဟ်တိုန်ကၠုၚ်တံ ညံၚ်ဂွိုအ်မွဲ ရေၚ်တၠုၚ်ဒၟံၚ်တုဲ အလုံဍုၚ်မွဲ ရုၚ်ကြိုၚ်သ္ၚုတံ၊ ဆေၚ်သ္ၚုတံ၊ ရုၚ်ကြိုၚ်ဂဥုဲ ကေုာံ ဆေၚ်ဂဥုဲတံဂှ် ရန်တၟံသွက်ဂွံဝေၚ်ၚုဟ်တုဲ ကြိုၚ်စွံလဝ်တံ ညံၚ်ဂွိုအ်မွဲ လၟေၚ်သတ္တာဟ စၟဳတ်ဒၟံၚ်ရောၚ် ဟီုရ။
အပ္ဍဲဂိတုမေတုဲကၠုၚ်တေံ ၚုဟ်လှာဲလှုဲဍုၚ်သ္အာၚ် ကေုာံ ၚုဟ်ထဝ် သၠုၚ်တိုန်ကၠုၚ်ဂှ် ဒုၚ်လဝ်ဝန်တုဲ ၚုဟ်နှေန်ထဝ် ကေုာံ ၚုဟ်လှာဲလှုဲဍုၚ်သ္အာၚ်တံ ညံၚ်ဂွံညိၚ် ဂကောံမဆက်စပ်ဂမၠိုၚ် ရေၚ်တၠုၚ်ဒၟံၚ်တုဲ ညးမနွံပၟိက် သြန်ဍုၚ်သ္အာၚ် ဍာံဍာံတံဂှ်လေဝ် ညံၚ်ဂွံဂွံမာန် ရေၚ်တၠုၚ်ကဵုဒၟံၚ်ရောၚ် သ္ဂးရ။
တၠပညာပရေၚ်ပိုန်ဒြပ်မွဲတၠဂှ် ၚုဟ်ဗၞိက်ဖျာ ဟွံညိၚ်ဝတ်ဂှ်ဝွံ ဒၟါနူထိၚ်ၚုဟ်ဒဝ်ဠာဟွံမာန်ဏောၚ် မဒှ်တုဲ ကံၚ်ဇြဳပၞာန် သွံတြးကဵုဒဝ်ဠာ နွံကီုလေဝ် ဟိုတ်နူလၟိဟ်ပမာဏ ရုမ်မ်ဂပ်ပ်တံ ဟွံသေၚ်ဂှ်ရ အကာဲအရာဂွံဖျေံ ၚုဟ်ဒဝ်ဠာမာန် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ ညံၚ်ၚုဟ်ဖျာဂွံညိၚ် ညံၚ်ၚုဟ်သြန်ဒဝ်ဠာအမေရိကာန် ဂွံညိၚ် ထိၚ်ဟွံမာန်တုဲ သံၚ်ဗြံၚ်အာအိုတ်ရ။ သြန်ဍုၚ်သ္အာၚ်တံဂှ် တိုက်သြန်ဗဟဵု သွံပ္တိတ်ဒၟံၚ်ဂှ် ဍာံ။ ဆ္ဂး တိုက်သြန်ဗဟဵု သွံကဵုဒၟံၚ်ဂှ် ညိညရဏောၚ် ဆၜိုတ်ဒှ်ဂဥုဲရဏောၚ်။ သွံပ္တိတ်ဟီုဂှ်လေဝ် လှုဲဒဝ်ဠာၚုဟ်မးဇၞော်ဇၞော်တံဂှ် သွံပ္ဍဲဗွဝ်ဖျာ ဟွံသေၚ်ပုဟ်။ အေ ဂှ်တှ်ေ စဵုကဵုအကာဲအရာ ဂွံဂြဲဖျေံ ၚုဟ်ဒဝ်ဠာဂှ် ဍေံတံ သွံကဵုဟွံမာန်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ဗၞိက်စၞစသုၚ်သ္ဇိုၚ် မဒးရပ်စပ်ဒၟံၚ် အပ္ဍဲဍုၚ်တံ မပါလုပ် ကပေါတ်ဗၞိက်ဗွဲမဂၠိုၚ်ဝွံ ဒးပၠောပ်ပ္တိုန်ဒၟံၚ် နူကဵုဍုၚ်သ္အာၚ်တံမွဲကဆံၚ်တုဲ ယဝ်ရထိၚ်ဒက် ၚုဟ်ဒဝ်ဠာဟွံမာန်မ္ဂး ၚုဟ်ဖျာတံ ဂွံစှ်ေကၠုၚ် ဟွံမွဲတုဲ ဂွံညိၚ်ဝတ်လေဝ် ဒှ်ဟွံမာန်ပုဟ်ဂှ် ညးဆက်ဟီုရ။
ကံၚ်ဇြဳပၞာန်ဂှ်တှ်ေ ၚုဟ်ကၠေၚ်စကဵု ၚုဟ်သ္ၚု ဂွံညိၚ်ဝတ်ဂှ် စွံလဝ်မဂၞန်မွဲတုဲ ၚုဟ်ဗၞိက်စၞစသုၚ်သ္ဇိုၚ် ဟွံညိၚ်ဝတ်ကီု၊ ၚုဟ်သၠုၚ်တိုန်ကၠုၚ် လွာဲဂှ်ကီုတံဂှ်လေဝ် နကဵုဂကောံမဆက်စပ်ဂမၠိုၚ် ရေၚ်တၠုၚ်ဒၟံၚ် ဗွဲမဇြိုဟ်နက်ရာၚ် သ္ဂးရ။
ညးဗြဴတၠသ္ၚိမွဲတၠဂှ် ၚုဟ်ဗၞိက်ဖျာ တိုန်ကၠုၚ် ဂၠိုၚ်ကဵုဆတုဲ ဒးဆေၚ်ဒၟံၚ်မုက်ကဵု ပြသၞာသြန်လုပ်ကဵု သြန်တိတ် ဟွံသၟဟ်တးတံ ဇၞော်ကဵုဇြဟတ်တုဲ စနူကဵုပရေၚ်စသုၚ်မံၚ်စံၚ်တံဂှ် ခက်ခုဲကၠုၚ်ကွေံကွေံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ် ညးဍုၚ်ကွာန်တံဂှ်တှ်ေ ၚုဟ်ဗၞိက်ဖျာတံ တိုန်ဒၟံၚ်ကဆံၚ်ဏံဂှ် ဗက်ဟွံဂတာပ်ရပုဟ်လေဝ်။ ပ္ဍဲကဵုပိုယ်တံဂှ် ညးဍုၚ်ကွာန်တံဂှ်တှ်ေ လ္ၚဵုတံဂှ် ကၠောန်မွဲတ္ၚဲစမွဲတ္ၚဲ လ္ၚဵုတံဂှ် ကလောန်ဟွံမွဲ ဒှ်ဒၟံၚ်အိုတ်ရ။ အေ ဂှ်တှ်ေ သြန်လုပ်သြန်တိတ်ညးတံဂှ်လေဝ် ဍေံဟွံညဳပုဟ်။ ညးဍုၚ်ကွာန်တံဂှ်တှ်ေ စပ်ကဵုၚုဟ်ဖျာတိုန်အာဂှ်တုဲ ခက်ခုဲဒၟံၚ်ကွေံကွေံဏောၚ်။ ၚုဟ်ဗၞိက်ဖျာဏံဂှ်လေဝ် ဗက်ဟွံဂတာပ်တုဲ ပရေၚ်စသုၚ်မံၚ်စံၚ်ဂှ် ခက်ခုဲဒၟံၚ်ကွေံကွေံရ”သာ်ဝွံသ္ဂးရ။
သွက်ၚုဟ်ဗၞိက်ဖျာ ဂွံညိၚ်ဝတ် ကံၚ်ဇြဳပၞာန် ပံၚ်ဖျပ်ပ္ညဳပ္ညပ်ကဵု ကမ္မတဳမဆက်စပ်တံတုဲ ရေၚ်တၠုၚ်ဒၟံၚ်ရောၚ် ဟီုဂးဒၟံၚ်ကီုလေဝ် ပ္ဍဲဗလးတိဏံဂှ်တှ်ေ ဟိုတ်နူအကာဲအရာ ၚုဟ်ဗၞိက်ဖျာ တိုန်ဒၟံၚ်ဂှ်တုဲ အကာဲအရာကျာတ်ဝါတ်ဂှ်ဝွံ ဂွံစသုၚ်အရိုဟ်တ္ၚဲရဂှ် သာတုဲကြေပ်ဂြတ်ကၠုၚ်ရ။
တိုက်သြန်ဗဟဵုဂှ်တှ်ေ အပ္ဍဲကာလသီအဝဵုဏံ ဒမြိပ်ပရေၚ်ပိုန်ဒြပ်ဍုၚ်ဗမာ တောတက်ဂှ် ဒေါအ်ဒေၚ်ကၠုၚ်တုဲ ဒဒှ်မဒိုက်ဝါတ်တံလေဝ် သာပရေံကၠုၚ်တုဲ သြန်ဖောဝ်ကဵု ဒမြိပ်ဒှ်ကလောန်ကၟိတ်ဟွံမွဲတံဂှ်လေဝ် သ္ဇက်ဂွံသၠုၚ်တိုန် နွံဒၟံၚ်တုဲ အကာဲအရာဒိုက်ဝါတ်ဂှ်ဝွံ ပရေံစှ်ေကၠုၚ်ဒၟံၚ် အလုံဍုၚ်ဗၟာမွဲရောၚ် ပ္ဍဲဂိတုဂျောန် ၁၂ တုဲကၠုၚ်တေံ လလောၚ်ပ္တိတ်လဝ်ရ။
ဗၞိက်ပၠောပ် ပိုတ်အိုတ်ကီု၊ ဗွဝ်ဖျာကောန်ကလောန် ဟွံညိၚ်ဝတ်၊ ဇြဟတ်ဓာတ်လလဳ ပိုတ်တံဂှ်လေဝ် သွက်ကမၠောန်ကၠောန်ပ္တိတ်ဗၞိက်တံဂှ် သ္ကဵုဒှ်တဴပွစဵုဒၞါတုဲ သြန်လုပ်စှ်ေတံကဵု ဒးခၞေံရပ်စပ်ဒၟံၚ် ခရိတ်အိုတ်နာနာ ပ္ဍဲဂြောဝ်ဂတာတံှဂ်လေဝ် သွက်ပရေၚ်စသုၚ်တံကဵု သွက်ကမၠောန်သွံတြးတံဂှ် ဒှ်တဴအရာမပထုဲပလာပ်ရောၚ် သ္ဂးရ။
ပ္ဍဲသၞာံ ၂၀၂၄ မံက်ဏံ လၟိဟ်မၞိဟ်ကၟိန်ဍုၚ် ၃၂ တၟံကၠံဂှ်ဝွံ စိုပ်ကၠုၚ်ဒၟံၚ်ကဆံၚ် ကျာတ်ဝါတ်ကၠုၚ်ဂှ်ရ ကလေၚ်စိုပ်အာကဆံၚ် ဂွံဆဵုညာတ်လဝ် ပ္ဍဲသၞာံ ၂၀၁၅ လောန်ကၠုၚ်တေံရောၚ်ဂှ် ပါလုပ် ပ္ဍဲလိက်ဒုၚ်စဳရေၚ် တိုက်သြန်ဂၠးတိရ။
ပရိုၚ်−သြၚ်လောန်တိုၚ်(မ်)
ဗီု−CJ