ၜၚ်ကံက်၊ ဨပရဴ ၁၉
ပ္ဍဲဍုၚ်ဗၟာ ပၞာန်အပ္ဍဲဍုၚ် ဒှ်ဒၟံၚ်ဂှ် ကြဴနူကသဳတိ ဇြဟတ်ဇၞော်မွဲ က္တဵုဒှ်အာတုဲ ညံၚ်ဂွံဒှ်အထံက်အရီု သွက်ပရေၚ်ကဵုအရီုဗၚ်တံဂှ် ကံၚ်ဇြဳပၞာန်ဍုၚ်ဗၟာကဵု ဂကောံဒစဵုဒစး အဓိကဂမၠိုၚ် ဂွံပပဵုပ္တိုန်အာယုက် တၚ်တုပ်စိုတ်ဒေါအ်ပန်ပှော်ဂှ် ထ္မံက်ထ္ၜးလဝ်ရောၚ် သ္ကိုပ်ဝန်ဇၞော်မလေဝ်ယှာ ဟီုလဝ် ပ္ဍဲဂိတုဨပရဴ ၁၈ တေံရ။
ဥက္ကဌဂကောံအာဇြဳယာန် ဒါတောန် သဳရဳအာန်ဝါ အေဗရာဟေန် ဟီုပ္တိတ်ကၠုၚ်လဝ်သွဟ် မသဳကၠဳလဝ် ကုသ္ကိုပ်ဝန်ဇၞော် အလဵုအသဳညဳသၟဟ်ဂကူ NUG၊ ကုဇၞော်သ္ကိုပ်ကံၚ်ဇြဳပၞာန် ပ္ဍဲဂိတုဨပရဴ ၁၇ တေံဂှ်ရ။
ဒေါအ်ပန်ပှော်တုဲ ဟွံမွဲပၟိက်မွဲသာ် ပရေၚ်ဂၠါဲသၞဗ္တိုက်ကၠုၚ်တံ နွံအာဟွံသေၚ်ပုဟ်ဂှ် သ္ကိုပ်ဝန်ဇၞော် အာန်ဝါ ဟီုလဝ်တုဲ သာ်ဂှ်ဟွံသေၚ်မ္ဂး ပရေၚ်ပ္တိတ်ဇြဟတ်ကဵုအရီုဗၚ်ပရေၚ်မၞိဟ်တံ ဟွံအံၚ်ဇၞး ဒှ်အာဏောၚ်ဂှ် ဟီုလဝ် ကုအ္စာပရိုၚ်ဂမၠိုၚ် ပ္ဍဲဍုၚ်ဇၞော်ၜၚ်ကံက် ဍုၚ်သေံရ။
ပရေၚ်သဳကၠဳဗွဲကိုပ်ကၠာ ကုသ္ကိုပ်ဝန်ဇၞော်ကံၚ်ဇြဳပၞာန်၊ ကုအလဵုအသဳ NUG တံဂှ် ဒှ်အထံက်အပၚ်ဏောၚ်ဂှ် သ္ကိုပ်ဝန်ဇၞော် အာန်ဝါ ဟီုရ။
ကြဴနူကသဳတိ ချဳဇတဝ်အာလဝ် ပ္ဍဲဂိတုမာတ် ၂၈ တေံတုဲ မၞိဟ် ဗ္ဒါဲ ၄၀၀၀ မ္ဒးချိုတ်အာလဝ်တုဲဂှ် NUG လလောၚ်တြးလဝ် ဒဒှ်ရဒေါအ်ပန်ပှော်ဂှ်တုဲ ကံၚ်ဇြဳပၞာန်ဂှ်လေဝ် ဒေါအ်အာပန်ပှော်ပွိုၚ် ၂၀ တ္ၚဲဏောၚ်ဂှ် ပ္ဍဲဂိတုဨပရဴ ၂ တေံ လလောၚ်တြးလဝ်ရ။
ဆ္ဂး ကံၚ်ဇြဳပၞာန်ဝွံ ပ္ဍဲဒေသလ္ၚဵုတံဂှ် ဆက်ကၠောန်သ္ပဒၟံၚ် ပရေၚ်ပၞာန်တံတုဲ ပရေၚ်ဗ္တိုက်ပၞာန်ကျာတံလေဝ် နွံဒၟံၚ်ဂှ် ကုလသမဂ္ဂ ဟီုရ။
နကဵုညးတံ ကဵုအာက္ဍိုပ် ရေၚ်တၠုၚ်အာ ပရေၚ်ပ္တိတ်ဇြဟတ်ကဵုအရီုဗၚ်ပရေၚ်မၞိဟ်တံဂှ်ဏောၚ်တုဲ ပ္ဍဲအရာပလံၚ်ဗစိုပ်ကဵုအရီုဗၚ်ဂှ် ညးမပါလုပ်ဂမၠိုၚ် ဂွံဗၠးဘဲဂှ် ဒးဒေါအ်ပန်ပှော်ဏောၚ် သာ်ဝွံ သ္ကိုပ်ဝန်ဇၞော် အာန်ဝါ ဟီုလဝ်ရ။
Ref: Reuters