ကျာ်မြဟ်၊ ဂျောန် ၂၅
သွက်ဂွံကဵုအခေါၚ်ကလေၚ်မံၚ် ပ္ဍဲကွာန်ၜါသွာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် အာစိုပ်ပ္တိုန်ထ္ၜးလဝ် ဂၠိုၚ်ၚ်ကဵုဝါကီုလေဝ် ဒပ်ကံၚ်ဇြဳပၞာန် ဟွံကဵုလုပ်ကွာန်ဂှ်ရ စဴဌာန်ဒၟံၚ်ဟွံဂွံဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဒေသၜါသွာၚ်ဂှ် စနူဂိတုနဝ်ဝေမ်ဗာ ၁၀ သၞာံတုဲကၠုၚ်တေံတုဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ပွိုၚ် ၅၀ တ္ၚဲဂှ်ရ ညးဒေသဂမၠိုၚ် ဒးပါဲဒလေတ်လဝ် အလုံကွာန်မွဲရ။
ဒေသၜါသွာၚ်ဂှ် အပ္ဍဲဂိတုဒဳဇြေမ်ဗာတုဲကၠုၚ်တေံ လ္ပာ်ကံၚ်ဇြဳပၞာန် ကလေၚ်ထိၚ်ဒက်လဝ်ကီုလေဝ် စဵုကဵုဒ္စါံဂိတုလအ်ကၠုၚ်ဂှ် ဟွံကဵုလဝ်အခေါၚ် ကုညးဒေသတံ ကလေၚ်စဴမံၚ်တုဲ မၞိဟ်စဴကၠုၚ်တံဂှ်လေဝ် ပန်ပှော်လဝ်တံ နွံဒၟံၚ်ရ။
သွက်ဂွံကဵုအခေါၚ်ကလေၚ်မံၚ်စံၚ်ဂှ် ညးဒေသတံ အာစိုပ်အာတ်မိက်လဝ် ဇရေၚ်ဌာနက္ဍိုက်ပ်အုပ်ဓုပ်ကာနာနာ ပွိုၚ်ဍုၚ်ကျာ်မြဟ်ဂှ်ကီု၊ ဇရေၚ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲဗ္ဒိုပ်ဗၠာဲသၟိၚ်ၜါသွာၚ်တံဂှ် မပါလုပ် သီုကဵုဇရေၚ်ဒပ်ဗၠာဲသၟိၚ်ပွိုၚ်ဍုၚ်တံဂှ် ဟွံအောန်နူကဵု ၇ ဝါကီုလေဝ် အခိၚ်လၟုဟ် ရေၚ်တၠုၚ်ကဵုလဝ် မုမွဲမှ ဟွံမွဲပုဟ်ဂှ် ညးဒေသတံ လဴထ္ၜးလဝ်ရ။
လ္ပာ်ကံၚ်ဇြဳပၞာန်ဂှ်တှ်ေ အပ္ဍဲဒေသၜါသွာၚ်ဂှ် ဟိုတ်နူပစူလဝ်မာၚ်တိုပ်တိတံဂှ်ရ ဟွံကဵုလဝ်အခေါၚ်ညးဒေသတံ စဴဌာန်ဒၟံၚ်ရောၚ် ထ္ၜးလဝ်ဟိုတ်တုဲ ကၠတ်ဂၠံက်ကေတ်ဒၟံၚ် ကပေါတ်မၞုံကဵုၚုဟ်မး နူကဵုသ္ၚိဒၟံၚ်ညးဒေသ သှ်ေဒၟံၚ် အပ္ဍဲကွာန်တံဂှ် ကလိလောန်ဒၟံၚ်အဆက်က်ရောၚ် သ္ဂးရ။
ညးဍုၚ်ကွာန်ပါဲဒဴဘဲပၞာန်ၜါသွာၚ်တံဝွံ တ္ၚဲပါဲဒဴဘဲပၞာန်ဂၠိၚ်သ္ၚောဲကၠုၚ်ဗက် သွက်ပရေၚ်စသုၚ်မံၚ်စံၚ်ဂြောဝ်ဂတာတဂှ်ေ ဒးဆေၚ်ဒၟံၚ်မုက်ကဵု အခက်အခုဲနာနာသာ်တုဲ ဒးဆောံလေၚ်ဒၟံၚ် စနူကဵုအခေါၚ်ဗ္တောန်ပညာ ကောန်ၚာ်သၟတ်တံရ။
ညးဍုၚ်ကွာန်ပါဲဒဴဘဲပၞာန်ၜါသွာၚ် ၂၀၀၀ ပြၚ် ဟွံဂွံအခေါၚ်စဴဌာန်ဒၟံၚ်ဏီတံဂှ်ဝွံ ဒးမံၚ်တန်တဴဒၟံၚ် ပ္ဍဲကဵုသ္ၚိမသကလောကောဒေံ၊ သ္ၚိပြောဲဇွာ ကေုာံ ဘာလကျာ် လ္တူဍုၚ်မတ်မလီု၊ မုဟ်ဍုၚ်၊ ကျာ်မြဟ်တံဂှ်ရ။
အပ္ဍဲပေါဲဗ္တိုက်ၜါသွာၚ်ဂှ် သ္ၚိဒၟံၚ်ဂၠိုၚ်ကဵုလ္ၚီ နူကဵု ၁၀ ကွာန်ဟွံက ပါလုပ်သီုကဵုၜါသွာၚ်၊ တၟအ်ဗြဴ၊ လှာကဇိုၚ်တံဂှ် လ္ပာ်ဒပ်ကံၚ်ဇြဳပၞာန် လုပ်ကၠတ်ဂၠံၚ်လဝ်ကီု၊ ရပ်ဒက်ၜုၚ်တက်ညးဍုၚ်ကွာန်ဒေသတံဂှ် ကလိလောန်လဝ်ရောၚ် ဂွံတီကေတ် ဇရေၚ်ညးဒေသတံရ။
အပ္ဍဲကာလပေါဲဗ္တိုက်ၜါသွာၚ်ဂှ် ညးဒေသ ဟွံအောန်နူကဵု ၁၀ တၠ ချိုတ်အာလဝ်တုဲ ၂၀ တၠပြၚ် ဇီုကပိုက်ကလိဂွံလဝ်ဝပ်တုဲ သ္ၚိဒၟံၚ် ဗ္ဒါဲ ၁၀၀ ပၟတ်တူလီုလာ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ