ညံၚ်လေဝ်ပေန်၊ သေပ်တေမ်ဗာ (၁၆)
ပ္ဍဲကဵုဒပ်မဟာ (၃) ခရိုၚ်ညံၚ်လေဝ်ပေန် တိဍာ်အုပ်ဓုပ်ကဝ်တူလေဝ် ဗော်သွးကောန်ဂကူကရေၚ် KNU ဂှ် ဒပ်ကံၚ်ဇြဳပၞာန် ဗက်ဗဒဴဘပဠဒၟံၚ် ကောန်ကွာန်ဒေသတံ ဗွဲအတေၚ်အဓမ္မ အဆက်က်ရဂှ် KNU လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၁၃) တေံဂှ် ညံၚ်ညးဍုၚ်ကွာန် မၞုံကွာန်နဝ်ကူ ပွိုၚ်ဍုၚ်မုၚ်၊ ဒပ်မဟာ (၃) KNU တံ ဂွိုအ်မံၚ်အပ္ဍဲကွာန်တံဂှ် ဒပ်ကံၚ်ဇြဳပၞာန် ထဍေၚ်ပ္တိတ်ဒၟံၚ် ဗွဲအတေၚ်အဓမ္မတုဲ အခိၚ်ကရောၚ်ပၞာန်ဒပ်ကံၚ်ဇြဳပၞာန်တံ ကလေၚ်ကၠုၚ်ဂှ် ယဝ်ရဆဵုဒး ကောန်ကွာန်တံ မံၚ်ဒၟံၚ်အပ္ဍဲကွာန်တံဂှ်မ္ဂး ပန်ဂစိုတ်ထောံသီုဖအိုတ်ရောၚ် ဒဒှ်ရဘပဠဟီုဂးလဝ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ဟိုတ်နူကံၚ်ဇြဳပၞာန် ဘပဠသာ်ဏံတုဲ ကောန်ကွာန်နဝ်ကူတံဝွံ သာဲစ္ဍးနူကွာန်တုဲ အခိၚ်မတတ်စိုပ်ကၠုၚ် ဗ္ဒိုပ် (ဆိပ်ကြီး) ဒပ်ကံၚ်ဇြဳပၞာန်ဂှ် ဒပ်ကံၚ်ဇြဳပၞာန်တံ စၟဳစၟတ်လဝ် ကောန်ကွာန်တံတုဲ ဖုၚ်ကောန်ကွာန်ဂမၠိုၚ် (၃၆) မဂှ်တံလေဝ် သီကေတ်လဝ် အတေၚ်အဓမ္မရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဝွံရ။
ဒၟါနူ ပွမချဳဒရာၚ်ပရေၚ်ပၞာန် ဒပ်ကံၚ်ဇြဳပၞာန်တံကဵု ပွမဗက်ဗဒဴဘပဠ ကောန်ကွာန်တံ ဗွဲအနိၚ်အထက် ပ္ဍဲကဵုခရိုၚ်ညံၚ်လေဝ်ပေန်တံဂှ်ရ ကောန်ကွာန်ညးဒေသ နူပွိုၚ်ဍုၚ်ကျံက်ကျဳ ကဵု ပွိုၚ်ဍုၚ်မုၚ်တံဝွံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲရဂှ် ညးမၞုံတာလျိုၚ်ဂကောံ ကေၚ်ကာကရေၚ်ကောန်ဒေသ ခရိုၚ်ညံၚ်လေဝ်ပေန်မွဲတၠ ဟီုရ။
အတိုၚ်တၚ်လလောၚ်တြး KNU ဂှ်မ္ဂး ဒပ်ကံၚ်ဇြဳပၞာန်ဝွံ ထဍေၚ်ပ္တိတ်လဝ် လၟိဟ်မၞိဟ် (၉၄၅) တၠ နူသ္ၚိဒၟံၚ် အပံၚ် (၁၆၇) မ အပ္ဍဲကွာန်နဝ်ကူတံ ဗွဲအတေၚ်အဓမ္မရောၚ် ရဴဝွံ သ္ဂးလဝ်ရ။
အပ္ဍဲတိဍာ် ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် အကြာဒပ်ကံၚ်ဇြဳပၞာန်ကဵု ဒပ် KNLA, KNDO တံဂှ် ပေါဲဗ္တိုက်တံ က္တဵုဒှ်ဒၟံၚ် ကြပ်အရိုဟ်တ္ၚဲတုဲ အခိၚ်လၟုဟ်လေဝ် လၟိဟ်ညးပါဲဒဴဘဲပၞာာန် ဂၠိုၚ်ကၠုၚ်ဒၟံၚ်ဂှ်ရ ဒးပ္တဝ်မုက်ဂဗဒၟံၚ်ကဵု အခက်အခုဲဗွဲမဂၠိုၚ်ဂၠေၚ်ရတုဲ နွံပၟိက်ဒၟံၚ်ကဵု အရီုဗၚ် စပ်ကဵုပရေၚ်ဗ္စာရဏာမၞိဟ် ကာတၟေၚ်တံဂှ်လေဝ် KNU လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)