မတ်မလီု၊ ဂျောန် ၂၆
ပ္ဍဲတွဵုရးဍုၚ်မန်ကဵု တွဵုရးကရေၚ်ဂှ် လက်ထက်ကံၚ်ဇြဳပၞာန်ဏံ ပရေၚ်ဓလိုက်တမ်ရိုဟ်ဍုၚ်သ္အာၚ်တံ လုပ်စိုပ်ကၠုၚ် စဵုကဵုဟွံမွဲ အောန်ဒၟံၚ်ရောၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ် ဥူအံၚ်ကျဳတုၚ်ဂှ် အခိၚ်ဆဵုဂဗကဵု အမာတ်ကလုတ်ကြုက် ချာန်ဟိုၚ်ဂှ် ဒုၚ်ဝန်ဟီုလဝ်ရ။
တုဲကၠုၚ်ဂိတုဂျောန် ၂၄ တေံ သ္ကိုပ်ဝန်ဇၞော် ဥူအံၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်ဂှ်ဝွံ ဒုၚ်တဲဆဵုဂဗလဝ်ကဵု အမာတ်ကလုတ်ကြုက် စပ်ကဵုဍုၚ်ဗၟာ ချာန်ဟိုၚ် ပ္ဍဲရုၚ်အလဵုအသဳတွဵုရး လ္တူဍုၚ်မတ်မလီုဂှ်ရ။
ပ္ဍဲပေါဲဆဵုဂဗဏံ ဥူအံၚ်ကျဳတုၚ်ဂှ် ပ္ဍဲတွဵုရးဍုၚ်မန်ကဵု တွဵုရးကရေၚ်ဂှ် ပရေၚ်ဓလိုက်တမ်ရိုဟ်ဍုၚ်သ္အာၚ်တံ အောန်ဒၟံၚ်တုဲ ညးဍုၚ်ကွာန်အပ္ဍဲဒေသတံဝွံ အာစိုပ်ကၠောန်ဒၟံၚ်ကလောန် ဍုၚ်သ္အာၚ်တံအိုတ်ရောၚ်ဂှ် သ္ဂးရ။
ညးဍုၚ်ကွာန် အပ္ဍဲဒေသတံ အာစိုပ်ကၠောန်ဒၟံၚ်ကလောန် ဍုၚ်သ္အာၚ်တံဂှ်ရ ဒးဆောံလေၚ်ဒၟံၚ် တမ်ရိုဟ်မၞိဟ်တံဂှ်တုဲ နကဵုဍုၚ်ကြုက် မိက်ဂွံကဵုရေၚ်တၠုၚ် ပရေၚ်ဓလိုက်တမ်ရိုဟ် အပ္ဍဲဒေသဂၠိုၚ်ၚ်ဂှ် အာတ်မိက်လဝ်ရ။
တၠကမၠောန်ပရေၚ်ပိုန်ဒြပ် အပ္ဍဲဒေသမွဲတၠဂှ် ပရေၚ်ဓလိုက်တမ်ရိုဟ်ဍုၚ်သ္အာၚ်တံ ဟွံလုပ်ဂှ်ဝွံ ဒၟါနူတၚ်နွံပၟိက် ပၟတ်ဓာတ်လလဳ မဒှ်တုဲ ပရေၚ်ရပ်စပ်တိဍာ်တံကီု ဂွံကလေၚ်ပ္တိတ် ပရဲပရာ ဟိုတ်နူအခက်အခုဲဂမၠိုၚ် မဒှ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲတွဵုရးဍုၚ်မန်၊ တွဵုရးကရေၚ်ပိုယ်တံဂှ်တှ်ေ ပရေၚ်ဓလိုက်တမ်ရိုဟ်ဍုၚ်သ္အာၚ်ဟီုမ္ဂး ဇြဟတ်ဓာတ်လလဳဂှ် ဟွံဍိုက်ပေၚ်ဟဂှ်ရ။ အခက်အခုဲဂှ်တှ်ေ ညအ်နွံ။ အကာဲအရာလၟုဟ်ဂှ်လေဝ် ပရေၚ်ရပ်စပ်တိဍာ်တံရ။ သၞောဝ်ရပ်စပ်တိဍာ်လ္ၚဵုတံဂှ် အခက်အခုဲနွံဒၟံၚ်ညိည။ ကၠောန်လဝ်ပရေၚ်ဓလိုက်တမ်ရိုဟ်တုဲမ္ဂးလေဝ် ပရဲပရာဂွံလဝ်လၟုဟ်တံှဂ်လေဝ် ဂွံကလေၚ်ပ္တိတ်ဏာဍုၚ်သ္အာၚ်ဂှ်လေဝ် ခက်ခုဲဒၟံၚ်ဏောၚ်။ အေ ဂှ်တှ်ေ ဟိုတ်နူအရာတံဏံလေဝ် စိုတ်ဟွံလုပ်စဂှ် ပါရ” သာ်ဝွံ သ္ဂးရ။
သ္အာၚ်နူဂှ်ပၠန် သြန်ဍုၚ်ဗၟာစှ်ေတုဲ ပ္ဍဲအရာရာန်စပ်ဗၞိက်အပြောံတံဂှ် ၚုဟ်တိုန်ဒၟံၚ် ကဵုဆကီု၊ ဂွံရာန်ကေတ် သြန်ဍုၚ်သ္အာၚ် ခက်ခုဲကီု၊ တိဍာ်ဟွံညိၚ်ဝတ်တံဂှ်တုဲလေဝ် ပရေၚ်ဓလိုက်တမ်ရိုဟ်ဍုၚ်သ္အာၚ်တံ ဟွံလုပ်စိုပ်ကၠုၚ်ဂှ် ညးဆက်ဟီုရ။
ကမၠောန်ပရေၚ်ဓလိုက်တမ်ရိုဟ် အပ္ဍဲဒေသတံဂှ်လေဝ် ဇၟာပ်ကၠောန်ပရေၚ်ဓလိုက်တမ်ရိုဟ်မွဲ နူကဵုကၠာတေံ ဒးဓလိုက်ဒၟံၚ်တမ်ရိုဟ် ဗ္ဒါဲပိဆပြၚ်ဂှ်ရ ပရေၚ်ဓလိုက်တမ်ရိုဟ်တံဂှ် ဟွံကၠောန်ရတုဲ ကမၠောန်နွံဒၟံၚ်တုဲတုဲတံရဂှ် ညံၚ်ဂွံဂေတ်ဂြိပ်မာန် ဒးရုန်ဂ္စါန်ဒၟံၚ်တၟာလှ်ေရောၚ် တၠကမၠောန်ဂမၠိုၚ် သ္ဂးအိုတ်ရ။
ပရေၚ်ဓလိုက်တမ်ရိုဟ်ဍုၚ်သ္အာၚ်တံ အောန်စှ်ေကၠုၚ်ှဂ်ရ ညးဍုၚ်ကွာန်တံ ဒးအာစိုပ်ကၠောန်ဒၟံၚ်ကလောန် ဍုၚ်တၞဟ်သ္အာၚ်ရောၚ် ကံၚ်ဇြဳပၞာန် ဟီုဒၟံၚ်ကီုလေဝ် အပ္ဍဲဒေသ ၚုဟ်ကလောန်အောန်တုဲ ၚုဟ်ဗၞိက်သၠုၚ်တိုန်ဒၟံၚ်ဂှ်ရ ပရေၚ်စသုၚ်မံၚ်စံၚ် ဟွံပြေပြံၚ်တုဲ ဒးတိတ်ဍုၚ်သ္အာၚ် ကၠောန်စအိုတ်ရဂှ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်သၟာကမၠောန်မွဲတၠ ဟီုရ။
“ကောန်ကလောန်အောန်စှ်ေကၠုၚ်ဟီုဂှ် ဍာံဍာံရ။ မွဲဂှ် ပ္ဍဲကဵုဍုၚ်ပိုယ်ဏံ သၞောတ်ၚုဟ်လိၚ်တံဂှ်တှ်ေ ပ္ဍဲသၞာံ ၂၀၁၈ တေံ ၚုဟ်ကလောန်အောန်အိုတ် နူကဵုအလဵုအသဳ ခုတ်ကဵုလဝ်ဂှ် မွဲတ္ၚဲတှ်ေ ၄၈၀၀ ။ မွဲလ္ပာ်ဂှ်ပၠန် ၚုဟ်ဗၞိက်တံ တိုန်ကၠုၚ်။ ခၟာဲကဒါမွဲမ အခိၚ်ဒှ်ဒၟံၚ် ၅၀၀ ဂှ် ပရေၚ်စသုၚ်မံၚ်စံၚ် ဟွံပြေပြံၚ်ရပုဟ်။ ပရေၚ်စသုၚ်မံၚ်စံၚ် ဟွံပြေပြံၚ်တုဲ ညးသၟတ်ဗွဲမဂၠိုၚ် နကဵုဗီုပြၚ်နာနာ တတ်ကၠောံပယျဵု တိတ်ကၠုၚ်ဍုၚ်သ္အာၚ်တံအိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပရေၚ်ဓလိုက်တမ်ရိုဟ်ဍုၚ်သ္အာၚ် နွံဒၟံၚ်တံဂှ် တိတ်အာအိုတ်ဂှ်ရ ကလောန်ကၟိတ်အောန်တုဲ တိတ်စ္ဍးအာဍုၚ်သ္အာၚ်တံလေဝ် နွံတုဲ ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ကလေၚ်ပၠောပ်လဝ်လမျီုဂှ်တုဲလေဝ် ဒမြိပ်တိတ်ဍုၚ်သ္အာၚ် သၠုၚ်တိုန်ကၠုၚ် တီတီရောၚ် ညးဆက်ဟီုရ။
တိုက်သြန်ဂၠးတိဂှ် ပရေၚ်ဓလိုက်တမ်ရိုဟ် အောန်စှ်ေကၠုၚ်ဂှ်ရ ဒမြိပ်ပရေၚ်ိပုန်ဒြပ်ဍုၚ်ဗၟာ တောတက်ဂှ် ဒေါအ်ဒေၚ်ကၠုၚ်တုဲ ပရေၚ်ဒိုက်ဝါတ်တံ သာပရေံစှ်ေတုဲ ဒမြိပ်သြန်ဖောဝ်တံကဵု ကလောန်ကၟိတ်ဟွံမွဲတံ ဂွံဆက်သၠုၚ်တိုန်အာနွံဂှ်ရ အကာဲအရာကျာတ်ဝါတ်ဂှ်တှ်ေ အလုံဍုၚ်ဗၟာမွဲ ပရေံဒၟံၚ်ရောၚ် ပ္ဍဲဂိတုဂျောန် ၁၂ တေံ လလောၚ်ပ္တိတ်လဝ် လိက်ဒုၚ်စဳရေၚ်ရ။
သ္အာၚ်နူဂှ်ပၠန် အပ္ဍဲကာလသီအဝဵုပွိုၚ်ပိသၞာံဏံ ပ္ဍဲသၞာံ ၂၀၂၄ မံက်တေံ လၟိဟ်မၞိဟ်ကၟိန်ဍုၚ် ၃၂ တၟံကၠံဂှ်ဝွံ စိုပ်ကၠုၚ်အကာဲအရာ ကျာတ်ဝါတ်တံဂှ်ရ ကလေၚ်စိုပ်အာ အကာဲအရာ ဂွံဆဵုညာတ်လဝ် ပ္ဍဲသၞာံ ၂၀၁၅ တေံဂှ်ယျဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−Myint Soe