မတ်မလီု၊ မေ ၃၀
က္ၜၚ်တမ္ၚာ၊ က္ၜၚ်ဖ္ဍိုက်ဖကောဝ်၊ က္ၜၚ်ဖ္ဍိုက်ဆု ဟွံလုပ်သၞောဝ် အပ္ဍဲကဵုပရၚ်ၜဳတွဵုရးဍုၚ်မန်ဂှ် ကေတ်အာအရေဝ် ဗွဲမစိုပ်တရဴဏောၚ် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက်ပ္တိုန်လဝ် ဥူအံၚ်ကျဳတုၚ် ဟီုကြီုလဝ်ရ။
ညးဟီုကၠုၚ်လဝ် ကုဌာနမဆေၚ်စပ်ဂမၠိုၚ် မၞုံသၟဝ်တဲညး ပ္ဍဲကောံဓရီုကမ္မတဳပရေၚ်အုပ်ဓုပ်ကောပ်ကာဲ သယံဇာတပရၚ်ၜဳတွဵုရးဍုၚ်မန် အလန်ဆဋ္ဌမ မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရးဍုၚ်မန် လ္တူဍုၚ်မတ်မလီု ပ္ဍဲဂိတုမေ ၂၈ ဂှ်ရ။
တၞဟ်နသ္ဂောံရပ်ဒက်က္ၜၚ်ဟွံလုပ်သၞောဝ်တအ်ဂှ်တုဲ သွက်ဂွံထ္မံက်ပ္တိတ် ဒၞါဲဒေသမ္ဒးကဵုက္ဍိုပ် ရေၚ်တၠုၚ်အာဂှ် စၞောန်ကၠုၚ်လဝ် သွက်ဂွံပံၚ်တောဲရေၚ်တၠုၚ် အတိုၚ်တၚ်စၞောန်ဂကောံအလဵုသဳဒေသမဆေၚ်စပ်တံဂှ်ရ။
ညးမကၠောန်ၜိုတ်ကမၠောန်တမ္ၚာမွဲတၠဂှ်တှ်ေ ၜိုန်ဟီုဒၟံၚ် ကေတ်အာအရေဝ် ကုက္ၜၚ်ဟွံလုပ်သၞောဝ်တံဏံ ဗွဲမစိုပ်တရဴဏောၚ်ကီုလေဝ် ပ္ဍဲဗလးတိဏံ ညးမကၠောန်ၜိုတ်ဒၟံၚ် ဟွံဗဗွဲကဵုသၞောဝ်တအ် ဂၠိုၚ်ကၠုၚ်ဂှ် ဟီုရ။
“ ပ္ဍဲဗလးတိဏံဂှ်တှ်ေ ဗီုညးကဵုညး ကၠောန်ဒၟံၚ်အိုတ်ရ။ ဆုတှ်ေဆု၊ ကတှ်ေက၊ က္ၜၚ်တှ်ေက္ၜၚ်။ ပ္ဍဲဌာနတံဂှ်လေဝ် ဌာနရ။ ဗီုညးကဵုညးဂှ် ကၠောန်ဒၟံၚ်အိုတ်ရ။ မၞိဟ်ကၠတ်ရပ်တအ်ဂှ်တှ်ေ ပြေပြံၚ်ရ။ မၞိဟ်ဒ္ဂေတ်ဗက်ဂှ်တှ်ေ ဟွံပြေပြံၚ်ပုဟ်” သာ်ဝွံ သ္ဂးရ။
က္ၜၚ်ပါမ်က ဟွံလုပ်သၞောဝ်မပါလုပ် က္ၜၚ်တၞဟ်သ္အာၚ်ဂမၠိုၚ်ဝွံ ဂွံအခေါၚ်နူကံၚ်ဇြဳပၞာန်မှဟေၚ် ဂွံတိတ်ဂှ်ရ အခိၚ်လၟုဟ် ဒးကဵုသၠုဲတုဲမှ ကဵုမံၚ်အခေါၚ်တိတ်တုဲ သၟဝ်ဏံဂှ် ပရေၚ်စလာပ်ဗဇဴ သၠုၚ်တိုန်ကၠုၚ်ဒၟံၚ်ရ။
ညးမကၠောန်ကလောန်တမ္ၚာမွဲတၠဂှ်တှ်ေ ကေတ်အာတအရေဝ် လ္တူက္ၜၚ်တမ္ၚာ ဟွံလုပ်သၞောဝ်တအ်ဂှ်ဏောၚ် ဟီုကီုလေဝ် ပ္ဍဲဗလးတိဏံဂှ် သ္ကိုပ်အုပ်ဓုပ်ဂမၠိုၚ်ကဵု ဒပ်ပၞာန် ပံၚ်တောဲတုဲ ကေတ်ဒၟံၚ်သြန်တုဲ ကဵုဒၟံၚ်အခေါၚ်ကၠောန်ဂှ်ရ ရဲပါမ်ကဟွံဗဗွဲကဵုသၞောဝ်တအ် ဂၠိုၚ်ကၠုၚ်ဂှ် ညးဟီုရ။
“ ဍေံတံဗက်လှုဲ ဗွဲမလုပ်သၞောဝ်တုဲ ဖျေံကဵုဒၞါဲတံဂှ်တုဲ ကၠောန်စဒၟံၚ်ရ။ လ္ပာ်သြၚ်ပလိုတ် ၜဳသက်တိုၚ်မွဲဂှ် အိုတ်ယျ။ လှုဲတံဏံဂှ် ဍေံတံ နူကဵုသ္ကိုပ်အုပ်ဓုပ်အရာပ်မွဲကဆံၚ် ထံက်ပၚ်ဒၟံၚ်ဒပ်ပၞာန် လ္ပာ်သြၚ်ပလိုတ်ဂှ်ရ။ လၟုဟ် ဗ္ဒါဲကွာန်ဏံ မူစိတၠ ကၠောန်စဂွံရော၊ မၞိဟ်ဂွံကၠောန်စဂှ် ဒးကဵုဥက္ကဌကွာန်ဂှ်၊ ဥက္ကဌကွာန်ဏံ ကလေၚ်ဒးကဵုပၠန်၊ ပ္ဍဲဗလးၜဳလၟုဟ်ဂှ်လေဝ် ဟိုတ်နူပရေၚ်ရပ်ဒက်ဂၠုၚ်ပါမ်ကတံဂှ်ဟွံမွဲတုဲ သာတုဲဂၠိုၚ်ကၠုၚ်ရ” သာ်ဝွံ သ္ဂးရ။
ကံၚ်ဇြဳပၞာန် ကေတ်သြန်ဟွံလုပ်သၞောဝ်တုဲ ဟိုတ်နူကဵုလဝ်အခေါၚ်ကၠတ်ပါမ်ကတံဂှ်တုဲ အခိၚ်ကဖျေံခၟာဲလၟုဟ်ဏံရဂှ် ဟိုတ်နူပါမ်ရပ်ကၠုၚ်ဒၟံၚ်က အပ္ဍဲၜဳတံဂှ်တုဲ ပ္ဍဲရာသဳပါမ်က ဂတဏံမ္ဂး လၟိဟ်ကအောန်စှ်ေကၠုၚ်မာန်ဏောၚ် ညးဆက်ဟီုရ။
အပ္ဍဲဗလးၜဳ တွဵုရးဍုၚ်မန်ဂှ် သၞာံတုဲတုဲကၠုၚ်တေံ နူဂိတုဨပရဴ စဵုကဵုဂိတုဂျောန် ပွိုၚ် ၃ ဂိတုဂှ် ကံၚ်ဇြဳပၞာန် ကၟာတ်လဝ် ရာသဳပါမ်ရပ်ကဟွံဂွံ မဒှ်အခိၚ်ကဖျေံခၟာဲတုဲ သၞာံဏံ နူဂိတုမေ စဵုကဵုဂိတုဂျောန် ပွိုၚ်ၜါဂိတုရဟေၚ် ကၟာတ်လဝ်ဂှ် ညးကၠောန်ကမၠောန်တမ္ၚာဂမၠိုၚ် သ္ဂးရ။
ပ္ဍဲလက်ထက်ကံၚ်ဇြဳပၞာန်ဏံ ပရေၚ်ထိၚ်ဒက်သယံဇာက စဵုကဵုဟွံမွဲအောန်ကၠုၚ်ဒၟံၚ်တုဲ ဗက်ကဵုရာသဳတုဲ ဂွံဂကူက အောန်စှ်ေကၠုၚ်ကီု၊ ကဇၞော်ဇၞော် ပလံၚ်ပ္တိတ်ဂွံတအ်ဂှ် ဂွံအောန်စှ်ေကၠုၚ်ကီု၊ သီုကဵုဂကူကလ္ၚဵု မဒးကၠက်အာလေဝ် နွံကၠုၚ်ဂှ် ဂွံတီကေတ်ရ။
ပ္ဍဲတွဵုရးဍုၚ်မန်ဂှ် ကြဴနူပၞာန်သီအဝဵုတုဲ ကေတ်ကၠုၚ်ၚုဟ် လ္တူက္ၜၚ်တမ္ၚာဟွံလုပ်သၞောဝ်တအ် ပါလုပ်သီုကဵုက္ၜၚ်ဖ္ဍိုက်သယံဇာတတံဂှ်တုဲ ကဵုလဝ်အခေါၚ်ညံၚ်ရဴမလုပ်သၞောဝ်ကီုဂှ်ရ သယံဇာတသဘာဝ ဇီုကပိုက်ကၠုၚ်တအ် သာတုဲပရေံစှ်ေကၠုၚ်ဂှ် ညးလ္ၚတ်ပရေၚ်သယံဇာတဂမၠိုၚ် ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ