ဗြဝတဳ၊ မေ ၃၀
ဗ္ဒိုပ်ဒပ်ကံၚ်ဇြဳပၞာန် ဗ္ဒိုပ်(ကနဲလေး) မၞုံပ္ဍဲဒေသဝဝ်လေ တွဵုရးကရေၚ် ပယျဵုသေံ−ဗၟာဂှ် သီဂွံလဝ်ဖအိုတ်တုဲ သီဂိုၚ်ဂွံလဝ် သီုမကမ်လွဟ်လက်နက် ဗွဲမဂၠိုၚ်ဂၠေၚ်ရောၚ် ဗော်သွးကောန်ဂကူကရေၚ် KNU ဗဟဵု သ္ပဒတန် လလောၚ်ပ္တိတ်လဝ်ရ။
ဗ္ဒိုပ်ဒပ်ကံၚ်ဇြဳပၞာန် နွံပ္ဍဲဒေသဝဝ်လေသီုဖအိုတ်ဂှ် ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်စဵုဒၞါကောန်ဂကူကကရေၚ် KNDO ၊ ဒပ်ပံၚ်ကောံ PDF တအ် စထ္ပက်ပၞာန်ဗ္တိုက်ကၠုၚ်လဝ် ပ္ဍဲဂိတုမေ ၂၁ တေံတုဲ ပေါဲဗ္တိုက်ၜါလ္ပာ် က္တဵုဒှ်သ္ကာတ်မြဟ်ဒၟံၚ်ရ။
ဗ္ဒိုပ်(ကနဲလေး) ဂှ်တှ်ေ ပ္ဍဲဂိတုမေ ၂၈ အခိၚ်ဇိုၚ်သဝ်တ္ၚဲဂှ် ဂကောံဇြဟတ်ပၠန်ဂတး KNLA KNDO တအ် သီဂွံလဝ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ဂြိပ်တိတ်အာတုဲ လွဟ်ဇၞော်ကီု သီုကဵုမကမ်လွဟ်လက်နက် ဗွဲမဂၠိုၚ်ဂှ်လေဝ် သီဂွံလဝ်ရောၚ် ဂကောံဒပ်ပံၚ်ကောံပၠန်ဂတးတအ် လလောၚ်ပ္တိတ်လဝ်ရ။
ဂကောံဇြဟတ်ပၠန်ဂတး KNLA KNDO ဝွံ တုဲကၠုၚ်ဂိတုမေ ၂၃ တေံ သီဂွံလဝ် ဗ္ဒိုပ်(ဘလယ်ဒို) နွံပယျဵုသေံ ဒေသဝဝ်လေဂှ်တုဲ ဗ္ဒိုပ်(သေဘောဘိုး) လ္တူဂၠံၚ်ဗြဝတဳ−ဝဝ်လေဂှ်လေဝ် ဗိုၚ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ်ရ။
ညံၚ်ဗ္ဒိုပ်(သေဘောဘိုး) ဟွံဂွံစှ်ေအာဂှ် ဒပ်ကံၚ်ဇြဳပၞာန် တဝ်စၞေဟ်ဒၟံၚ် ဗွဲမသ္ကာတ်မြဟ်တုဲ နူဗျူဟာဝဝ်လေ ဗလးနၚ်လဝ်ပၞာန်အရီု ကရောၚ်ပၞာန်မွဲ ဇြဟတ် ၆၀ ပြၚ်ပါဂှ်တုဲ ပ္ဍဲဂိတုမေ ၂၈ ဂှ် ဂကောံဇြဟတ်ပၠန်ဂတး KNLA KNDO တအ် ကြတ်ဗ္တိုက်လဝ် ပ္ဍဲ(ဆုံဆည်းမြိုၚ်) ဌာန်ဂအုပ်ဗဟဵု DKBA တုဲ အလုံကရောၚ်ပၞာန်မွဲ လီုအာလဝ်ရ။
ပ္ဍဲအရာကြတ်ဗ္တိုက် ကရောၚ်ပၞာန် မကၠုၚ်ကဵုအရီုဗၚ်ဏံဂှ် ဂကောံဇြဟတ်ပၠန်ဂတးတအ် ရပ်ဂွံလဝ် ကောန်ဒပ်ကံၚ်ဇြဳပၞာန် ၁၀ တၠ ဂျိုၚ်ၚ်တုဲ မကမ်လွဟ်လက်နက်တအ်ဂှ်လေဝ် သီဂွံလဝ်တုဲ ကောန်ဒပ်ကံၚ်ဇြဳပၞာန်ဂမၠိုၚ် ပါလုပ်သီုကဵုသ္ကိုပ်ကရောၚ်ပၞာန်ဝွံ ဂြိပ်တိတ်အာလဝ် လ္ပာ်ဍုၚ်သေံရ။
ဒပ်ကံၚ်ဇြဳပၞာန် မဒးဂိအာလဝ် အလုံကရောၚ်ပၞာန်မွဲဂှ်ဝွံ ပ္ဍဲဂိတုမေ ၂၈ အခိၚ်လဒေါဝ်တ္ၚဲဂှ် အာစိုပ်ထောံလဝ်မခတိုဟ် နကဵုက္ၜၚ်ကျာ ပ္ဍဲဌာန်ဂအုပ်ဗဟဵု DKBA (ဆုံဆည်းမြိုၚ်) တုဲ ကောန်အရာပ်လ္ၚဵု ဇီုကပိုက်ဒးအာနွံဒၟံၚ်ရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် သ္ဂးရ။
ဟိုတ်နူပေါဲဗ္တိုက်(သေဘောဘိုး) တုဲ ညးဍုၚ်ကွာန်ဒေသ ၄၀၀ ပြၚ် နူကဵုကွာန်(သေဘောဘိုး၊ တောၚ်နီ၊ ဆုံဆည်းမြိုၚ်) တအ်ဂှ် စိုပ်ကၠုၚ်လ္ပာ်ဍုၚ်သေံတုဲ ကဵုလဝ်အရီုဗၚ်ပရေၚ်ဗ္စာရဏာမၞိဟ်ဂှ်လေဝ် တမ်ရိုဟ်ပရိုၚ်သေံဂမၠိုၚ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ