သဓီု၊ မေ ၃၀
လ္ပာ်ကံၚ်ဇြဳပၞာန် ထပ်ပပဵုကၠုၚ်ဇြဟတ်ဒပ် ဇရေၚ်ဗ္ဒိုပ်ဒပ် နွံပ္ဍဲပွိုၚ်ဍုၚ်သဓီု ကဵု ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ်တုဲ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ဒၟံၚ်ရောၚ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ အပ္ဍဲဂိတုမေဏံ ထပ်ဗပေၚ်ကၠုၚ်ဇြဟတ်ဒပ် ဇရေၚ်ဗ္ဒိုပ်ဒပ်ပုၚ်နေဝ်တဝ် ပွိုၚ်ဍုၚ်သဓီုကဵု ဗ္ဒိုပ်ဒပ်ဝေန်တာပါန်၊ ဗ္ဒိုပ်ဒပ်နာတ်ကျဳ ပွိုၚ်ဍုၚ်ၜဳကလေၚ်ရ။
ဗပေၚ်လဝ်ဇြဟတ်ဒပ် ပ္ဍဲဗ္ဒိုပ်တံဏံ ဗွဲတွဵုမအောန် နူ ၃၀၀ စဵုကဵု ၅၀၀ တုဲ အရိုဟ်ဒဒှ်တ္ၚဲ ပန်ပှော်ဒၟံၚ်ကဵုလွဟ်ဇၞော်ရ။
ဒပ်ကံၚ်ဇြဳပၞာန် ဗပေၚ်ကၠုၚ်ဇြဟတ်ဂှ်ဝွံ သွက်ဂွံကလေၚ်သီကေတ် ဗ္ဒိုပ်မဒးဗလးလဝ်တဲဂမၠိုၚ် ကေုာံ သွက်ဂွံဒစးဒုၚ်ပလေဝ်ပလေတ် သွက်ပၞာန်ဒုၚ်ဒှ်မာန်ရောၚ် ပဒိုဝ်သဝ်အေနာၚ် သ္ၚဳဂၠိပ်လဝ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ပ္ဍဲကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု မဒှ်ပွိုၚ်ဍုၚ် နွံအပ္ဍဲခရိုၚ်သဓီုတံဂှ် လၟေၚ်ဒဒှ်တ္ၚဲ ပန်ပှော်ဒၟံၚ်ကဵုလွဟ်ဇၞော်တုဲ ဆက်ထံၚ်ကၠုၚ်ဒၟံၚ်ပရိုၚ် နူကဵုပၞာန်ကျာရ။
လအာတုပ်သာ်ဂှ်ကီု ဒပ်ကံၚ်ဇြဳပၞာန်ဝွံ ပ္ဍဲသ္ကုတ်သၠုၚ်ကျာတွဵုရးဍုၚ်မန် ပွိုၚ်ဍုၚ်ရေဝ် ဒၞါဲဂကောံဇြဟတ်ပၠန်ဂတးတံ ချဳဒရာၚ်ဇြဟတ်ခိုဟ်ဂှ် ထပ်ဗပေၚ်ဇြဟတ်ဒပ် ဗွဲမဂၠိုၚ်ဂၠေၚ်တုဲ သၠုၚ်ပ္တိုန်ပလေဝ်ပလေတ်လဝ်ပၞာန်ဒုၚ်ရ။
ဟိုတ်နူဒပ်ကံၚ်ဇြဳပၞာန် ဗပေၚ်ကၠုၚ်ဇြဟတ်ဒပ်ဂှ်တုဲ ပ္ဍဲရာသဳကသီုဏံလေဝ် ပေါဲဗ္တိုက်ၜါလ္ပာ် သာသ္ကာတ်မြဟ်ကၠုၚ်မာန်ရောၚ် ဂကောံဒပ်ပၠန်ဂတးဂမၠိုၚ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ