ဟံၚ်ဂံၚ်၊ မေ ၃၀
ပ္ဍဲတကအ်ပါရာသေဲ မဒှ်ဒၟံၚ်ပရေၚ်ကယျာန်ဓဝါန် ပ္ဍဲၜဳကြုက်သၠုၚ်ကျာဂှ် ကြုက် ကၠုၚ်စိုပ်ဖျေံစွံလဝ်က္ၜၚ်ကျာထောံမခတိုဟ်ညးတံ မဒှ်ကဆံၚ်သၠုၚ်အိုတ် ၜါဖ္ဍိုက်ဂှ် နူကဵုဂြိုဟ်ပတောံဂမၠိုၚ် ထ္မံက်ထ္ၜးဒၟံၚ်ရ။
ဣဏံဝွံ ညံၚ်လ္ပာ်ဒစဵုဒစးညးတအ် ဂွံတီကေတ် အစောံစရာဲပရေၚ်ပၞာန်ညးတံ မဇၞော်မောဝ်ကၠုၚ်ဂှ်တုဲ ဒှ်ပွမကဵုသမ္တီ အလန်လက္ကရဴအိုတ်ရောၚ် ညးလ္ၚတ်ဂမၠိုၚ် ဟီုရ။
ကြဴနူသၞာံ ၂၀၂၀ တုဲ ကၠုၚ်စိုပ်ဖျေံလဝ် က္ၜၚ်ကျာဗေကျေန်ထောံမခတိုဟ် H-6 ပ္ဍဲတကအ်ဏံ နဒဒှ်အလန်ပထမကၠာအိုတ်ရ။
ပ္ဍဲတ္ၚဲသတ္တာဟဏံအိုတ်ဂှ် သ္ဂောံကၠောန်ဗဒှ်ကောံဓရီုကာစဵုဒၞါဇၞော်အိုတ် အပ္ဍဲဒေသ နွံဒၟံၚ်တုဲ အခိၚ်ကြုက် ပကတ်ပ္ကေၚ်ဒၟံၚ်ပရေၚ်ပၞာန် မွဲဒမြိပ်ထိုၚ်ဝါန်ဂှ်ကဵု ပရေၚ်ကြံၚ်မ္ၚိုဟ် ကုဖဳလေတ်ဖေန် သၠုၚ်တိုန်ဒၟံၚ်ဂှ် ဖျေံစွံလဝ် က္ၜၚ်ကျာထောံမခတိုဟ်ကဆံၚ်သၠုၚ်အိုတ် ၜါဖ္ဍိုက်သာ်ဏံရ။
သွက်ဂွံကၠောန်ဗဒှ်ကောံဓရီုကာစဵုဒၞါ ပ္ဍဲသေန်ကာပေါဝ်နွံဒၟံၚ်တုဲ ဗီုပြၚ်အလဵုအသဳထြာမ် ဂွံပြာပ်လုပ်ဒေသဏံဂှ် ဝန်ဇၞော်ကာစဵုဒၞါအမေရိကာန် ပိတ်ဟာတ်သေတ် သ္ဂောံသောၚ်ကလးကဵု နွံဒၟံၚ်ရ။
ပ္ဍဲဂိတုကၠုၚ်စိုပ်ဏံ ဗျိတိၚ် ဂွံဖျေံအာက္ၜၚ်ဖ္ဍိုက်က္ၜၚ်ကျာမွဲဖ္ဍိုက် ပ္ဍဲၜဳကြုၚ်သၠုၚ်ကျာဂှ် စၟဳစလဝ်ရောၚ် ကလုတ်တမာန်ဂမၠိုၚ် ဟီုလဝ်ရ။
လ္တူတကအ် မဒှ်ဒၟံၚ်ပရေၚ်ကယျာန်ဓဝါန် ပ္ဍဲၜဳကြုက်သၠုၚ်ကျာဂှ် ဒဒှ်ရက္ၜၚ်ကျာထောံမခတိုဟ် H-6 ၜါမ ပဝ်ယာန်ဒၟံၚ်ဂှ် ဂွံဆဵုကေတ် နူကဵုဂြိုဟ်ပတောံမွဲကဆံၚ်ရ။
ကြုက်သီလဝ် တ္ကအ်ပါရာသေဲတုဲ ဍုၚ်ဗဳယေတ်နာမ် ဒစဵုဒစးလဝ်ရ။
နူဂိတုမေ ၁၇ တေံရ ကြုက်ဖျေံစွံလဝ် က္ၜၚ်ကျာထောံမခတိုဟ်ဏံ ဒှ်မာန်ရောၚ် ညးလ္ၚတ်ဂမၠိုၚ် ဟီုရ။
ဍုၚ်ကြုက်ဂှ်တှ်ေ ဂကူက္ၜၚ်ကျာထောံဂြာတ်မခတိုဟ်သာ်ဏံဂှ် အနာဂတ်ဂတတေံ ယဝ်ဒှ်ပၞာန်ကဵုအမေရိကာန်မ္ဂး သွက်ဂွံစဵုဒၞါ ဗ္ဒိုပ်ပၟိက်ဇၞော်ညးတအ်တုဲ လေပ်ဖျေံစွံလဝ် ပ္ဍဲၝောံဍုၚ်သၟးရ။
ဗရူနာၚ်၊ အေန်ဒိုဝ်နဳယှာ၊ မလေဝ်ယှာ၊ ဖဳလေတ်ဖေန်၊ ထိုၚ်ဝါန် ကေုာံ ဗဳယေတ်နာမ်တအ် ဟီုလဝ် မဒှ်ဒေသအပိုၚ်ညးတံဂှ်ကီု သီုအလုံၜဳကြုက်သၠုၚ်ကျာမွဲဂှ် ကြုက်ဂှ်တှ်ေ ညးတံပိုၚ်ပြဳလဝ်ဏောၚ် ဟီုလဝ်ရ။
ဂလာန်ဗေကျေန် ဟီုဂးကၠုၚ်သာ်ဏံဂှ်ဝွံ အတိုၚ်သၞောဝ်ဍုၚ်နာနာမ္ဂး ဟွံလုပ်သၞောဝ်ပုဟ်ဂှ် ပ္ဍဲသၞာံ ၂၀၁၆ တေံ ရုၚ်သၞောဝ်ဓဝ်ပသောၚ်ပရေၚ်ကယျာန်ဓဝါန်ဍုၚ်နာနာ သ္ဂုတ်သွာတ်လဝ်ကီုလေဝ် ကြုက် တးပါဲလဝ်ရ။
Ref: Reuters