မတ်မလီု၊ သေပ်တေမ်ဗာ (၁၈)
ပ္ဍဲကဵုအကံက်သြန်မဝ်ဗိုၚ် Wave Money, Kpay တံဂှ် သၠုၚ်လဝ်ကဆံၚ် Level-2 ဟွံမွဲတုဲ တၚ်နၚ်ပူဂဵု ဟွံဍိုက်ပေၚ်တံဂှ် ကၟာတ်သီအာဒတုဲရောၚ် တိုက်သြန်ဗဟဵု ကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ (၁၆) တေံရ။
ယၟု၊ စၟတ်တၞးကာဒ်ကောန်ဍုၚ်၊ မဂၞန်သေမ်ကာဒ် (ကာဒ်ဖုၚ်) မဗပေၚ်လဝ် ပ္ဍဲစရၚ် အကံက်သြန်မဝ်ဗိုၚ်တံဂှ် နူဌာနဝန်ဇၞော် ကောပ်ကာဲပရေၚ်မၞိဟ်လုပ် ကေုာံ ဇြဟတ်ညးဍုၚ်ကွာန် ကဵု ဌာနက္ဍိုက်ပ်စၞောန်ပ္ညုၚ် ပရေၚ်ဆက်စၠောံ သၟဝ်ကံၚ်ဇြဳပၞာန်တံ ပကိတ်စၟဳစၟတ်အာကဵု သ္ဇိုၚ်တၚ်ဏှ်(database) မပ္တိုန်လဝ်စရၚ် အဳလေတ်ထရဝ်နေတ်ဂှ်ကဵု သ္ဇိုၚ်တၚ်ဏှ် မပ္တိုန်လဝ်စရၚ် သေမ်ကာဒ်တံရောၚ် သ္ဂးရ။
ပ္ဍဲကဵုဒၞါဲစၟဳစၟတ်ပကိတ်သာ်ဏံဂှ် နကဵုညးသုၚ်စောဲ အကံက်သြန်မဝ်ဗိုၚ်တံ ဒးဗပေၚ်လဝ် တၚ်နၚ်ဍိုက်က်ပေၚ်ၚ်တုဲ အပ္ဍဲအခိၚ်ကာလ မစၟတ်လဝ်ဂှ် ယဝ်ရဗပေၚ်လဝ် ဟွံမွဲမ္ဂး စရၚ်သြန်မဝ်ဗိုၚ်တံဂှ် ကၟာတ်သီအာဒတုဲရောၚ် သာ်ဝွံ ပါလုပ်ဒၟံၚ် ပ္ဍဲတၚ်လလောၚ်တြးဂှ်ရ။
နကဵုညးသုၚ်စောဲ သၞောတ်ကဵုကေတ်သၠုဲမဝ်ဗိုၚ်တံဂှ် အာစိုပ်ပ္ဍဲညးစၞးတံ ၊ တိုက်သြန်မကြပ်တံဂှ်တုဲ သွက်ဂွံသၠုၚ်ပ္တိုန် တၚ်နၚ်ပူဂဵုဇကုတံ ကဆံၚ် (၂) ဂှ် နွံပၟိက်တုဲ နကဵုညးဟွံမိက်သၠုၚ်ပ္တိုန်တံဂှ် နဲကဲဂွံသုၚ်စောဲသြန်သှ်ေဇကုတံမာန် ကေတ်အဆက်ရေၚ်တၠုၚ်ကဵု တိုက်သြန်တံ၊ ကမၠောန်ရေၚ်တၠုၚ် မဝ်ဗိုၚ်တံမာန်ရောၚ် သ္ဂးလဝ်ရ။
ဒးစၟဳစၟတ်ကၠုၚ် အကံက်သြန်မဝ်ဗိုၚ်တံဂှ်ဝွံ မၞိဟ်ဟွံတပ်တးတံ ဟွံဗပေၚ်တၚ်နၚ် ဍာံဍာံပြပြမွဲသာ် စကာသၞောတ်သြန်မဝ်ဗိုၚ်တံတုဲ ဟိုတ်နူလှဲပြံၚ်သြန် ဟွံလုပ်သၞောဝ်တံ၊ လီဠာန်ဒၟံၚ်သြန်တံ နွံဂှ်ရ ဒးကၠောန်သ္ပလဝ်ရောၚ် တိုက်သြန်ဗဟဵု ကံၚ်ဇြဳပၞာန် လလောၚ်ပ္တိတ်လဝ်ရ။
တၚ်လလောၚ်တြး တိုက်သြန်ဗဟဵု ကံၚ်ဇြဳပၞာန်ဝွံ နူကဵုသၞောတ်မဝ်ဗိုၚ်မွဲကဆံၚ် ပွမထံက်ပၚ်ကဵုဒၟံၚ်သြန်လှုဲ ကုဂကောံဇြဟတ်ပၠန်ဂတးတံ ညံၚ်ဂွိုအ်ဂွံဂှ် ကၠောန်သ္ပလဝ်တုဲ ပ္ဍဲဒၞါဲပၠောပ်လှုဲ၊ ပ္တိတ်လှုဲဗီုကၠာတေံဂှ် ညံၚ်ဂွံခက်ခုဲဂၠိုၚ်ကၠုၚ် ကၠောန်ၜိုတ်လဝ်ရောၚ် ညးကၠောန်ကမၠောန်ရေၚ်တၠုၚ်သြန်လှုဲမွဲတၠ ဟီုရ။
တိုက်သြန်ဗဟဵု ကံၚ်ဇြဳပၞာန်ဝွံ တုဲကၠုၚ်ဂိတုတေံလေဝ် ပ္ဍဲကဵုဆေၚ်တံဂှ် စုတ်ကမ္မရာ CCTV တုဲ သွက်ဂွံတက်ဗီု ကေတ်လဝ်စၟတ်သမ္တီ ကုမၞိဟ်ပၠောပ်လှုဲ၊ ပ္တိတ်လှုဲတံ နကဵုကမ္မရာဓလုက်တံဂှ် စၞောန်ပ္ညုၚ်လဝ် ညးကၠောန်ကမၠောန်တံရ။
ပရိုၚ်−သြၚ်လောန်တိုၚ်(မ်)