လ္ဂုၚ်၊ သေပ်တေမ်ဗာ (၁၈)
ပ္ဍဲဍုၚ်ဗၟာ အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် မွဲကရောံၚုဟ်ဂဥုဲကေန်သာ သၠုၚ်တိုန်ကၠုၚ် ဂၠိုၚ်ကဵုဆဂှ် သီုကဵုရာန်ဂဥုဲဟွံမာန်တံဂှ်ရ တၠဝေဒနာယဲကေန်သာတံ ဒးဆေၚ်ဒၟံၚ်မုက်ကဵု အကာဲအရာ သာဇီုကပိုက်ကၠုၚ် ကုအန္တရာယ်လမျီုတံရဂှ် တၠပညာဂဥုဲဇဗတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သွက်ဂွံပၠောပ်ဂဥုဲကေန်သာတံဂှ် ကၠာတေံ စုတ်စရၚ်ပ္ဍဲရုၚ်ဂဥုဲဇၞော် မဆေၚ်စပ်တံတုဲ မၚ်ကဵုအလန်တုဲ နကဵုၚုဟ်တန်န်ဂှ် ပၠောပ်ကၠုၚ်ဂဥုဲမာန်ကီုလေဝ် အခါလၟုဟ် အခေါၚ်ဂွံပၠောပ်ဂဥုဲ ပ္ဍဲရုၚ်ဂဥုဲဇၞော်တံဂှ် ဟွံလောဲသွာဂှ်ရ ဗွဲမဂတာပ်အခိၚ် သွက်ဂွံပၠောပ်ဂဥုဲဂှ် ရာန်ကေတ်ဂဥုဲ ပ္ဍဲဗ္ဒမ်ဂဥုဲမ္ၚးတံဏံတုဲ ဒးပၠောပ်ဒၟံၚ်ညးသ္ကအ်အိုတ်ရ။
ဆ္ဂး ၚုဟ်ဂဥုဲကေန်သာတံဝွံ ဗွဲကြဴဒပ်ပၞာန်သီအဝဵုတုဲဂှ် တၠဝေဒနာကေန်သာတံ ဒးဆေၚ်ကၠုၚ်မုက် ကုအကာဲအရာၚုဟ်သၠုၚ်တိုန်ကၠုၚ် ဗၞတ် (၃) ဆ ဇၞော်ကဵုဇြဟတ်ရ။
ဟိုတ်နူၚုဟ်ဂဥုဲကေန်သာတုဲ တၠဝေဒနာဗွဲမဂၠိုၚ်ဂှ်ဝွံ သွက်ဂွံပၠောပ်ဂဥုဲ ဟွံသၟဟ်ရထဂှ်ရ မၞိဟ်ယဲမ္ဒးဇီုကပိုက်ကၠုၚ် အန္တရာယ်လမျီုတံ နွံကၠုၚ်ရဂှ် တၠပညာဂဥုဲဇဗမွဲတၠ ဟီုရ။
“ ဒဵုကဵုအခိၚ်လၟုဟ် ပြသၞာအဓိကဂှ်တှ်ေ ပြသၞာၚုဟ်က္ဍၚ်တံရ၊ ဂဥုဲဇဗတံ ပိုတ်အာကွေံကွေံဂှ် ဟွံမွဲဏီပုဟ်၊ ၚုဟ်က္ဍၚ်ကၠုၚ်ဂှ်ရ နကဵုသၟာကေန်သာတံ သွက်ဂွံရာန်ဂဥုဲဂှ် ဗွဲမလောဲသွာ ဍဟောဝ်ဟွံစိုပ်ဂှ် ဒှ်ပြသၞာအဓိကရ” သာ်ဝွံ ဒံက်တာတေန်ထောန်နာၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တၠဝေဒနာကေန်သာတံဝွံ ပါ်ကရေက် ကလောံကလေန်ကေန်သာတံတုဲမ္ဂး ညံၚ်သေဝ်(လ်)ကေန်သာ ဂွိုအ်ဗျာပ်တြးအာ ပ္ဍဲခန္ဓဇကုတံဂှ် ညံၚ်လၟိဟ်ဂွံပေၚ် ဒးဒုၚ်ဝဳ ပၠောပ်ဂဥုဲကေန်သာ မပ္တံ ကဳမိုဝ်၊ HERS2 တံ ဒဵုလ္တူနူ (၁၀) ဝါရ။
ဆ္ဂး အခိၚ်လၟုဟ် ၚုဟ်ဂဥုဲဇဗကေန်သာတံ သၠုၚ်တိုန်ကၠုၚ်ဒၟံၚ် ကဵုဆဂှ်ရ လှုဲလှာ်ဟွံမာန်ရတုဲ ဗွဲမဂတာပ်အခိၚ် ပၠောပ်ဂဥုဲဟွံမာန်ကီု၊ ဟွံဆက်ပၠောပ်ဂဥုဲရတုဲ သ္ပထောံမၛ္ဇဟ်ကဵုယဲတံဂှ်ရ ဒးဆောံလေၚ်ကၠုၚ် လမျီုတံဂှ် သာဂၠိုၚ်ကၠုၚ်ရ၊ စပ်ကဵုအကာဲအရာဏံတုဲ တၠဝေဒနာကေန်သာမွဲတၠဂှ် ဟီုလဝ် ဗီုဏံရ။
“ပၠောပ်ဂဥုဲ ကဳမိုဝ် သွက်ကေန်သာဂှ် ကၠာတေံ ဒတုံကၠုၚ်လဝ် ၜိုတ် ပိကိုဋ်ရကီုလေဝ် လၟုဟ်မ္ဂး ဒးဂဗဒၟံၚ် ၜိုတ်ပွဳပွူ (၅) ကိုဋ်ရ၊ ဣဏံဂှ် အခက်အခုဲဂဥုဲဇဗရ၊ သွက်ဂွံဂွံဂဥုဲလေဝ် အခက်အခုဲနွံ၊ အဲမ္ဂး ကေန်သာလေဝ် နွံ၊ ယဲကောန်တၟံလေဝ် နွံ၊ ယဲဆီၜေတ်လေဝ် နွံ၊ အေဂှ်တှ်ေ ရာန်ဂဥုဲဟွံဂွံတုဲ ဒၞါဲဒးသုၚ်ၜါအလန်ဂှ် ခၞေံတုဲ သုၚ်ထောံမွဲအလန်ဓဝ်လေဝ် ဟွံဂွံပုဟ်၊ ခန္ဓဂှ် ဒးဒုၚ်စသိုၚ်ဝေဒနာတံရ” သာ်ဝွံ သ္ဂးရ။
ၚုဟ်ဂဥုဲတံဝွံ ဟိုတ်နူကံၚ်ဇြဳပၞာန် လလောၚ်ပ္တိတ်လဝ် တၚ်သၞောတ်ဗ္ၜတ်ပၠောပ်ပ္တိုန်စပ်ကဵု ကပေါတ်ဂဥုဲတံကီု၊ သွက်ဂွံပၠောပ်ပ္တိုန်ဂဥုဲဂှ် ရာန်ဒဝ်ဠာ ၜိုတ်နွံပၟိက်ဟွံဂွံကီု၊ အခက်အခုဲ လာၚ်ဇြေန်ဗၞိက်ပၠောပ်တံကီုဂှ်ရ မၞိဟ်ပၠောပ်ပ္တိုန်ဂဥုဲဍုၚ်သ္အာၚ်တံ ဒးဂဗကၠုၚ် အခက်အခုဲအိုတ်ရတုဲ ၚုဟ်ဂဥုဲဒးသၠုၚ်တိုန်ကၠုၚ် ဂၠိုၚ်ကဵုဆရ။
မၞိဟ်ပၠောပ်ပ္တိုန်ဂဥုဲ ကေုာံ ကပေါတ်ဂဥုဲ နူဍုၚ်သ္အာၚ်တံဝွံ နကဵုအစဳဇန်ဇကုဇကု ရာန်ကေတ်ဒဝ်ဠာတံ ဟွံဂွံတုဲ သောၚ်ကဵုသၠုဲ လ္ပာ်မၞိဟ်သွံတေံမာန်မှဟေၚ် ပ္တိတ်ကဵုလာၚ်ဇြေန်ဗၞိက်ပၠောပ်ရောၚ် တုဲကၠုၚ်ဂိတုဂျူလာၚ်တေံ ကံၚ်ဇြဳပၞာန် လလောၚ်ပ္တိတ်လဝ်ရ။
အခိၚ်လၟုဟ် ဂဥုဲဍုၚ်သ္အာၚ်နာနာတံဂှ် လ္တူနူကၠာတေံ ၚုဟ်သၠုၚ်တိုန်ကၠုၚ် စဵုကဵု ၜါဆပိဆဂှ်ရ နကဵုမၞိဟ်သွံပရးတံလေဝ် သွက်ဂွံသွံရာန် အခက်အခုဲနွံကၠုၚ်တုဲ ဆေၚ်ဂဥုဲလ္ၚဵု ဒးကၟာတ်ကၠုၚ်ယာယဳတံ မၞုံကၠုၚ်ဒၟံၚ်ရ။
ပရိုၚ်−သြၚ်လောန်တိုၚ်(မ်)