ဘာပန်၊ သေပ်တေမ်ဗာ (၁၉)
ပ္ဍဲခရိုၚ်ဘာပန် ဗော်သွးကောန်ဂကူကရေၚ် KNU ဂှ် အပ္ဍဲပွိုၚ်ၜါသတ္တာဟ တုဲကၠုၚ်တေံ နူဂိတုသေပ်တေမ်ဗာ (၁) စဵုကဵု (၁၅) ဂှ် အကြာပေါဲဗ္တိုက်ဒပ်ကံၚ်ဇြဳပၞာန်ကဵု ဒပ်မဟာ စၟတ် (၅) ဒပ်ပၞာန်ကဝ်တူလေဝ်တံ က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဇီုကပိုက်ပြဟ်လလုဲဂၠိုၚ်လဝ်ဂှ် ဒပ်မဟာ (၅) KNU လလောၚ်ပ္တိတ်လဝ်ရ။
အပ္ဍဲခရိုၚ်ဘာပန် KNU ဂှ် အပ္ဍဲပွိုၚ်ၜါသတ္တာဟဂှ် အကြာဒပ်ကံၚ်ဇြဳပၞာန်ကဵု ဒပ်သၟဝ်တဲ ဒပ်မဟာ(၅) KNU တံ က္တဵုဒှ်လဝ် ပေါဲဗ္တိုက် (၆၈) ဝါတုဲ ပ္ဍဲကဵုပေါဲဗ္တိုက်တံဏံဂှ် လ္ပာ်ကံၚ်ဇြဳပၞာန် (၅၁) တၠ ချိုတ်အာတုဲ (၃၁) တၠ ဂွံလဝ်ဝပ်ရောၚ် ပါလုပ်လဝ် ပ္ဍဲတၚ်လလောၚ်တြးဂှ်ရ။
အပ္ဍဲကဵုဂှ် ညးမဒးချိုတ်အာ လ္ပာ်ဒပ်ကံၚ်ဇြဳပၞာန်တံဂှ် သီုကဵုသ္ကိုပ်ဒပ်ပါ် (၁) တၠ မပါလုပ် မၞိဟ်ကဆံၚ်ဗိုလ် (၁) တၠ ကေုာံ ပ္ဍဲကဵုညးမကလိဂွံလဝ်ဝပ်တံဂှ် သ္ကိုပ်တမ်ဒပ် (၁) တၠ ကေုာံ ဒုသ္ကိုပ်တမ်ဒပ် (၂) တၠ ပါလုပ်ဂှ် ဒပ်မဟာ (၅) သ္ဂးလဝ်ရ။
အပ္ဍဲကဵုပေါဲဗ္တိုက်ဂှ် လ္ပာ်ဒပ်မဟာ (၅) ဒပ်ပၞာန်ဗၠးၜး ကောန်ဂကူကရေၚ် KNLA ဂှ် ကောန်သ္ဂံၚ်မွဲတၠ ချိုတ်အာလဝ်တုဲ (၁၁) တၠ ဂွံလဝ်ဝပ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၇) တေံဂှ်လေဝ် ဒဒှ်ရဒပ်မၚ်ပယျဵု စၟတ် (၁၀၁၄) သၟဝ်တဲကံၚ်ဇြဳပၞာန်တံ ပန်ဂစိုတ်လဝ် ကောန်ကွာန်တလာအအ်ခိုဝ်၊ ပွိုၚ်ဍုၚ်ဗူတိုက်၊ ခရိုၚ်ဘာပန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဒပ်မဟာ (၅) KNU ရ။
ပ္ဍဲခရိုၚ်ဘာပန် အပ္ဍဲပွိုၚ် (၂) သတ္တာဟဂှ် ဒပ်ကံၚ်ဇြဳပၞာန် ပန်ပှော်လဝ် လွဟ်လက်နက်ဇၞော်ကြာန်န် ဟွံအောန်နူကဵု (၃၂) မ နွံဂှ် ဒပ်မဟာ (၅) သ္ဂးလဝ်ရ။
ပ္ဍဲခရိုၚ်ဘာပန် တိဍာ်ထိၚ်ဒဝ် ဗော်သွးကောန်ဂကူကရေၚ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ဂှ် ဟိုတ်နူပေါဲဗ္တိုက် ဒပ်ကံၚ်ဇြဳပၞာန်ကဵု ဒပ်ပံၚ်ကောံဒပ်ပၞာန်ဗၠးၜးကောန်ဂကူကရေၚ် KNLA တံတုဲ ညးဒေသမွဲကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် စဴဌာန်ဒၟံၚ်ဟွံမာန်ဏီရ။
ပရိုၚ်−သြၚ်လောန်တိုၚ်(မ်)