မတ်မလီု၊ သေပ်တေမ်ဗာ ၃
ပ္ဍဲဍုၚ်ဗၟာ ဒပ်ပၞာန်သီလဝ်အဝဵု စဵုကဵုသၞာံဏံ ဂိတုအဝ်ဂါတ် အပ္ဍဲပွိုၚ်ပိသၞာံပြၚ်ဂှ် ညးဗြဴ ဂကောံပၞာန်တံ ပြိုက်ဂစိုတ်လဝ် ၁၁၀၀ ပြၚ်ဂှ် စၟတ်သမ္တီလဝ် သီုကဵုယၟုယၟာရောၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ်ရ။
အတိုၚ်လိက်ဒုၚ်စဳရေၚ် AAPP လလောၚ်ပ္တိတ်လဝ် ဂိတုသေပ်တေမ်ဗာ ၁ နကဵုယၟု “ညးဗြဴဒးဒုၚ်စုတ်ထံၚ်စာတ် အပ္ဍဲပေါဲဗ္တိုက်တမ်က္ညၚ်” ဂှ်မ္ဂး ညးဗြဴချိုတ်အာဂမၠိုၚ်ဝွံ ဟိုတ်နူဒးလွဟ်ဇၞော်၊ ဒးဒုၚ်ဗ္တိုက်ကဵုပၞာန်ကျာ ကေုာံ ဒးဒုၚ်ပန်ဂစိုတ်တံဂှ်ရောၚ် သ္ဂးရ။
သ္အာၚ်နူဂှ်ပၠန် ကြဴနူရပ်ဒက်တုဲ ဂစိုတ်ဂယိုၚ်ကီု၊ သ္ပအဓမ္မ ပြိုက်ဂစိုတ်သၟးဟွံက ချိုတ်အာ နကဵုနဲကဲတၞဟ်ဟ်တံလေဝ် နွံတုဲ ပ္ဍဲကဵုဏံ ကံၚ်ဇြဳပၞာန် ရပ်ဒက်တုဲ ပ္ဍဲကဵုထံၚ်စာတ် မဒှ်ဗ္ဒိုပ်ထိၚ်ဒဝ်မလုပ်သၞောဝ် ညးတံဂှ် ဒ္စါံတၠ၊ ပ္ဍဲဗ္ဒိုပ်ဗၠာဲသၟိၚ်ဂှ် ၜါတၠ ကေုာံ ပ္ဍဲဗ္ဒိုပ်စၟဳတ်တံဂှ် ပန်တၠ ဒးဒုၚ်ဂစိုတ်လဝ်ရ။
ကိုဝ်တိုက်ထောန်ဥူ ညးမၞုံအခေါၚ်ဟီုဂး ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM ဂှ်မ္ဂး အပ္ဍဲကာလသီအဝဵုဏံ ညးဗြဴဒးဒုၚ်ရပ်ဒက်ဂမၠိုၚ်ဝွံ ဒးဒုၚ်ဖ္ဍိုက်ဂရိုက်စပ်ကဵုလိၚ်ကီု၊ ဒးဒုၚ်ရပ်ဒက်ဂစိုတ်ဂယိုၚ်တံကီုဂှ် ဒးဆေၚ်ဒၟံၚ်မုက် ပရေံအိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ၜိုတ်ကဆံၚ်လဵုပရေံရောဟီုတှ်ေ ထံၚ်လ္ၚဵုတံဂှ် ဒၞါဲညးဗြဴဟုံဍာ် ဒၞါဲညာတ်ကေတ်မာန်တံဂှ် စုတ်လဝ် CCTV ကီု၊ ထ္ၜးဟိုတ် ဂၠါဲဗ္ဒမ်တိက် ညးဗြဴတံတုဲ လုပ်ဂၠိုက်ဂၠါဲပလာပ်ပထုဲတံဂှ်လေဝ် ကၠောန်ဒၟံၚ်ရ။ တုဲပၠန် ဟွံမွဲကဵုဓဝ်ဗ္စာရဏာ မအရေဝ်ရုန်မဵုကြံၚ်မ္ၚိုဟ်၊ မအရေဝ်ကေတ်ဖျုန်လ္တူညးဗြဴတံဂှ် ရပ်စပ်စကာတုဲ ဆက်ဆောံဒၟံၚ် လ္တူညးဗြဴတံလေဝ် ကၠောန်ဒၟံၚ်ရ။ ညအ်ဂှ်လေဝ် ကောန်ထံၚ်ညးဗြဴဂမၠိုၚ် ပါလုပ်သီုကဵုကောန်ထံၚ်ပရေၚ်ဍုၚ်ကွာန်ဗြဴတံ ဒးဒုၚ်စသိုၚ်ဆေၚ်ဒၟံၚ်မုက်အိုတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ဇၞော်ထံၚ် ကံၚ်ဇြဳပၞာန်တံဝွံ ကောန်ထံၚ်ဗြဴတံဂှ်မ္ဂး ဍဵုဍိုက်ဂၠိုၚ်နူကဵု ကောန်ထံၚ်တၞဟ်ဟ်တံကီု၊ ထ္ၜးဟိုတ်နာနာ ၜုၚ်တက်စၟဳတ်တံသၟးဟွံက ရပ်စပ်နဲကဲနာနာသာ်တုဲ သ္ပမာန်ဒၟံၚ်တံဂှ်လေဝ် ကၠောန်သ္ပဒၟံၚ်ရောၚ် ညးဆက်ဟီုရ။
အတိုၚ်တၚ်လလောၚ်တြး AAPP ဂှ်မ္ဂး အလုံဍုၚ်မွဲ နကဵုတၚ်ထ္ၜးဟိုတ် ပရေၚ်ဍုၚ်ကွာန်ဂှ် ညးဗြဴ ၅၆၀၀ ပြၚ် ဒးဒုၚ်ရပ်လဝ်တုဲ ဗွဲမဂၠိုၚ်ဂှ်ဝွံ နူကဵုဒေသလ္ဂုၚ်၊ မာန္တလေဝ် ကေုာံ ရးဒေသသက်ကိုၚ်တံ ပါလုပ်ဒၟံၚ် ဂၠိုၚ်အိုတ်ရ။
ဂကောံပၞာန်တံ ရပ်ဒက်၊ ဂစိုတ်ဂယိုၚ်၊ ဍဵုဍိုက်ပျဲပျာံ လ္တူညးဗြဴတံဂှ်သၟးဟွံက ပွပကီုပရာပ် စပ်ကဵုလိၚ်တံဂှ် နကဵုဍုၚ်သ္အာၚ်တံ သွက်ဂွံကေတ်ကဵုအရေဝ် ဗွဲမစိုပ်တရဴဂှ် AAPP ဖ္ဍိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ