လ္ဂုၚ်၊ သေပ်တေမ်ဗာ (၂၁)
SIM Card မဗပေၚ်လဝ်တၚ်နၚ်ဍိုက်က်ပေၚ်ၚ် ဟွံမွဲတံဂှ် ကၟာတ်သီအာတုဲ သြန်သှ်ေဒၟံၚ် ပ္ဍဲ SIM Card တံဂှ်လေဝ် သီဂိုၚ်အာ နဒဒှ်သြန်ဘဏ္ဍာညးဍုၚ်ကွာန်ရောၚ် ဌာနက္ဍိုက်ပ်စၞောန်ပ္ညုၚ်ပရေၚ်ဆက်စၠောံ ကံၚ်ဇြဳပၞာန် လလောၚ်တြးလဝ်ရ။
SIM Card မသုၚ်စောဲဒၟံၚ်ဖိုဟ်တံဂှ် ယၟု၊ စၟတ်တၞးကာဒ်ကောန်ဍုၚ် မဗပေၚ်လဝ် အဃောမပ္တိုန်စရၚ်တံဂှ် နူဌာနဝန်ဇၞော်ကောပ်ကာဲပရေၚ်မၞိဟ်လုပ် ကေုာံ ဇြဟတ်ညးဍုၚ်ကွာန် စၟဳစၟတ်ပ္ကိတ်အာကဵု database မပ္တိုန်လဝ်စရၚ် ကဵုအဳလက်ထရဝ်နေတ်တံရောၚ် ကံၚ်ဇြဳပၞာန် ကဵုလဝ်သမ္တီရ။
ဟိုတ်နူကံၚ်ဇြဳပၞာန် ကၠောန်ကၠုၚ်သာ်ဏံဂှ်ရ နကဵုညးသုၚ်စောဲ SIM Card တံဂှ် ဒးဂွိၚ်ဒၟံၚ်ကဵု ပရေၚ်ဂီုကၠီုတုဲ သၠေဟ်ပၟာတံလေဝ် က္တဵုဒှ်ဒၟံၚ်ဂှ် ညးသုၚ်စောဲ SIM Card မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ချိုတ်ပၠိုတ်ဂှ်တှ်ေ ဟွံဂီုကၠီုလးလးရ၊ နူကဵုဍေံတံ သီထောံအပိုၚ်ဂှ် သီုဖအိုတ်(ဖုၚ်)ဂှ် မိက်ဂွံကၠတ်ကလၚ်တှ်ေ ကလေၚ်ဏောၚ်၊ တၚ်နၚ်ဍေံတံ မိက်ဂွံဂွံတံဂှ်တှ်ေ ကော်လဝ်ဖုၚ်ကဵု ညးဂှ်ရောၚ်၊ သီုကဵု လိက် မပလံၚ်လဝ်တံဂှ်ရ ဂီုကၠီုဟွံမွဲပုဟ်ဂှ် ချိုတ်ပၠိုတ်ရ၊ ဍေံတံလေဝ် (ကံၚ်ဇြဳပၞာန်) ဒှ်ညးပတှ်ေဂွံ ဟွံသေၚ်တုဲ သုၚ်စောဲတၚ်နၚ်တံဏံတုဲ ဍေံတံ ရပ်စပ်အာ သွက်လဵုရော၊ အေဗီုဏံ ဒးဒှ်ဒၟံၚ်သၠေဟ်ပၟာရ” ဂှ် ညးသ္ဂးရ။
ပ္ဍဲဂိတုသေပ်တေမ်ဗာ (၁၆) ဂှ်လေဝ် နူကဵုတိုက်သြန်ဗဟဵု သၟဝ်တဲကံၚ်ဇြဳပၞာန်တံဂှ် ပ္ဍဲကဵုအကံက်သြန်မဝ်ဗိုၚ် Wave Money, KBZ Pay မသၠုၚ်ပ္တိုန်လဝ် Level-2 ဟွံမွဲတုဲ အကံက်တၚ်နၚ်ပူဂဵု ဟွံဍိုက်ပေၚ်တံဂှ် ကၟာတ်သီအာဒတုဲရောၚ် လလောၚ်ပ္တိတ်လဝ်ရ။
နကဵုညးသုၚ်စောဲ SIM Card မဝ်ဗိုၚ်တံဂှ် မ္ၚးနူကော်ဖုၚ်၊ ပလံၚ်လိက်၊ ပလံၚ်အဳမေလ် တံဂှ် ပ္ဍဲကဵုကေတ်သြန်သၠုဲမဝ်ဗိုၚ်တံဂှ်လေဝ် ပရေၚ်ဂီုကၠီုတၚ်နၚ်ပူဂဵုတံ ဟွံမွဲရပုဟ်ဂှ် သာတုဲဂွံဒုၚ်စသိုၚ်ကၠုၚ်ရ ရဴဝွံ သ္ဂးရ။
ဌာနဝန်ဇၞော်ပရေၚ်ပလံၚ်ဗစိုပ် ကေုာံ ပရေၚ်ဆက်ဆောံ၊ ဌာနက္ဍိုက်ပ်စၞောန်ပ္ညုၚ် ပရေၚ်ဆက်စၠောံတံဂှ် အတိုၚ်ဍေံတံ မစဳစောတ်လဝ်ဂှ်မ္ဂး ညးမသုၚ်စောဲ SIM Card လ္ၚဵုတံဝွံ ယၟု၊ စၟတ်တၞးကာဒ်ကောန်ဍုၚ် တၚ်နၚ်မဖှ်သာ်ဏံတံဂှ် ဗပေၚ်လဝ် ဍာံဍာံပြပြဟွံမွဲတုဲ သုၚ်စောဲဒၟံၚ်အိုတ်ရဂှ် သ္ဂးရ။
နကဵုညးမရပ်စပ်စကာတံ အခိၚ်ရာန်သုၚ်စောဲ SIM Card တံဂှ် တၞးကာဒ်ကောန်ဍုၚ်ဇကုဇေတ်တ်၊ ယၟု၊ စၟတ်တၞးကာဒ်ကောန်ဍုၚ်တံဂှ် ဗပေၚ်ဍာံဍာံပြပြတုဲ ပ္တိုန်စရၚ် စှ်ေကဵုသၞောတ်တုဲမှဟေၚ် သွက်ဂွံရပ်စပ်အိုတ်ဂှ် လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ (၂၀) တေံရ။
ကြဴနူပၞာန်သီအဝဵုတုဲဗက် အဝ်ပရေတာ ပရေၚ်ဆက်စၠောံၜါ MPT အလဵုအသဳပိုၚ်ဂှ်ကဵု Mytel ဒပ်ပၞာန်ပိုၚ်တံဂှ် ကံၚ်ဇြဳပၞာန် ထိၚ်ဒက်လဝ်တုဲ လက္ကရဴဏံ အဝ်ပရေတာ ပရေၚ်ဆက်စၠောံကၟိန်ဍုၚ်သ္အာၚ် ပုဂ္ဂလိကပိုၚ် Telenor ကဵု Ooredoo တံဂှ်လေဝ် သွံဏာလဝ် ကုဗွိုၚ်ပရေၚ်ပိုန်ဒြပ် မဆက်စပ်ဒၟံၚ်ကဵု ဒပ်ပၞာန်တံပၠန်ရ။
ပရိုၚ်−သြၚ်လောန်တိုၚ်(မ်)